吳瑞琪
日頭lâu月光談戀愛
Ngit-thèu lâu ngia̍t-kông thàm lien-oi
拜託星仔傳情書
Pai-thok sên-é chhòn chhìn-sû
一陣ngiap-lang打雷公
Yit-chhṳn ngiap-lang tá lùi-kûng
點點星光跌落大安河
Tiám-tiám sên-kông tiet-lo̍k Thai-ôn-hò
蜂糖甜个河水
Fûng-thòng thiàm ke hò-suí
灌注白布帆个大地
Kon-chu pha̍k-pu-fàm ke thai-thi
樹頭
Su-thèu
竄出一粒粒个青綠
Chhon-chhut yit-lia̍p-lia̍p ke chhiâng-liu̍k
借農家个手
Chia nùng-kâ ke sú
牽線
Khiân-sien
日頭lâu月光因此
Ngit-thèu lâu ngia̍t-kông yîn-chṳ
結成正果
Kiat sṳ̀n chṳn-kó
長圓个身形橫切
Chhòng-yàn ke sṳ̂n-hìn vàng-chhiet
一片一片个星é果
Yit-phién yit-phién ke sên-é-kó
係做得入嘴个愛語
He cho-tet ngi̍p-choi ke oi-ngî
講等戀人个誓言
Kóng-tén lien-ngìn ke sṳ-ngiàn
甜入心
Thiàm ngi̍p sîm
送心愛个佢
Sung sîm-oi ke kì
一粒果子做情書
Yit-lia̍p kó-chṳ́ cho chhìn-sû
字字寫等
Sṳ-sṳ siá-tén
不變个情意
Put-pien ke chhìn-yi
如日月星个永恆
Yì ngit-ngia̍t-sên ke yún-hèn
大安河千年个水流
Thai-ôn-hò chhiên-ngiàn ke súi-liù
見證
Kian-chṳn
倆儕
Lióng-sà
天長地久个愛情
Thiên-chhòng thi-kiú ke oi-chhìn
註解：
1. lâu：kap。2. ngiap-lang：sih-nà，『閃電』。3. 倆儕：兩个人。
（客語顧問邱淑華做文字整理kap加註解）
