主講／鄭勝吉
記錄／吳宛霖
本活動由台灣蠻野心足生態協會主辦，李江却台語文教基金會協助記錄。
今仔日ê「台語行讀」是安排鄭勝吉老師（台灣傳統建築講師）tshuā逐家來熟sāi lán ê舊厝邊——松山薰廠1。早起雨水落bē煞，到kah下晡按捷運站出--來準備beh去會合點ê時，雨水猶原是tsha̍p-tsha̍p滴。Ua̋！今仔日ê活動kám ē hōo雨水影響，suah無人來--leh？心肝內giâu疑bóng giâu疑，跤步uân-ná無停睏，繼續ǹg敦化北路方向行，一直到kah beh正uat入去忠孝東路553巷ê時，e̋，巷仔內人聲tshi-tshi-tshā-tshā，koh一步uat--入-去——suí--lah！20外个人neh！跤步自án-ne suah輕鬆--起-來，趕緊行倚去hām眾人熟sāi、la-le--一-下。眾人哪ē lóng無hōo雨水tsùn-būn--著--leh，有leh分享頂kái行讀--ê、有講著施工中ê大巨蛋--ê、mā有牽著到「可悲」市長--ê，連薰廠內面ê鵝mā kha-tshng phia̍t--一-下phia̍t--一-下，行出來迎接兼陪hip相。
時間過了真緊，2點liam-mi到，松山薰廠行讀正式起鼓，若是一般tik ê活動，一定ài按薰廠大門開始進行，最後來到上後壁ê生態池tsiah結束。M̄-koh tsit kái老師suah無照án-ne行，顛倒是安排uì尾溜起行。我心內leh想，鄭老師確實是有用心tsiah ē án-ne安排，因為現此時ê「松山文創園區」若是拄著假日lóng mā人kheh人，若是beh做khah幼膩ê導覽介紹，就ke減ē受著影響。生態池附近環境幽雅sù-sī，遊客khah罕得來，真適合lán行讀ê進行。
1937年ê時代，薰m̄-nā是日常生活使用，mā已經是民間年節仔送禮ê時，大方koh實用ê禮物，台灣總督府專賣局2為著薰枝ê生理愈來愈ka-ia̍h，台北後車頭ê「台北煙草工場」3 ê生產規模已經bē-tàng應付市場ê需求，開始起造「松山煙草工場」。工場ê規劃參考國外先進ê工業村概念，除了火鼎間4、作業場、機械修理房kap煙草工場，koh有食堂、浴間、宿舍、托兒所、io嬰仔室、飼乳室、福利社、醫護室、手術室、藥局等，員工ê福利設備齊全，ē-sái講是lán台灣頭一間模範工場。工場用地選tī有縱貫線mā有瑠公圳分流ê所在。縱貫線ē-sái kā規箱規箱ê薰運送各地供應民眾，也ē-sái載去基隆tsiūnn船thang好外銷去南洋kap中國ê華中、華南地區，當然mā有利用公路系統運送--ê。薰枝ê生產mā ài用著大量ê水，利用工場內塯公圳支流，tsiânn做一窟大貯水池（thú-tsuí-tî）除外，koh有起造淨水池、水井kap淨水場。除了做消防用水以外，mā ē-sái供應清氣水hōo灶跤間、浴間使用，án-ne hiânn茶煮食koh兼hōo工人洗除規身軀ê薰味，工場四箍liàn-tńg也有護場河kap河溝來保護。
1939年「台灣總督府專賣局松山煙草工場」完工，開始生產薰枝，員工計共大概有1,200人。Hit時iáu無全自動ê包裝機，工場是半自動化，ài靠手工kā薰lok入去薰盒仔內tsiah-koh封--起-來。聽講hia-ê女工，因為逐工ê khang-khuè路lóng sio-siāng，尾仔練kah ná像lóng有kah一肢機器手--leh——手伸--出-去、la̍k--起-來拄拄好就是20枝，跤手liú-lia̍h，做kah tsiok自然--ê。工場內女工包裝ê過程，tsiânn做tsiok心適ê畫面。到kah 1987年，包裝機早就是全自動--ê，女工包薰ê手藝已經無「用武之地」，mā早就失傳，tsit年薰廠員工差不多有兩千人，薰枝ê生理tshìng kah bē講--得，松山薰廠ê總收入新台票210億，是「薰草局」5總收入ê三分一。
當年ê薰廠，除了鐵枝路kap車路以外，邊--a m̄是田就是園；後--來，人口增加經濟發展，薰廠已經hōo鬧熱ê台北市東區所包圍，上siânn--人--ê就是tsit phiàn有價值ê土地。Mā有傳出政府機關beh用kōo廠區做其他ê路用，致使薰廠ê提昇計劃受著影響、阻擋，產量按上kuân ê 200萬箱調降到100萬箱，員工sok到800人。尾手koh因為「巨蛋案」ê緣故，1998年松山薰廠正式停止生產，人員、機器設備搬徙去台北薰廠。2001年台北市政府kā松山薰廠指定做第99處市定古蹟，其中辦公廳、工作場、火鼎間、一號到五號倉庫是古蹟本體，蓮花池、運輸軌道kap戰後新起ê倉庫mā是古蹟保存範圍。2011年松山薰廠轉型tsiânn做「松山文創園區」對外開放。園區hōo工場內部空間koh活，隨時lóng有各種展覽kap小型活動。展覽ê內容kap款式多元變化，有民間家己主辦、也有國外專工來展覽--ê，mā有藝術家sio招聯合展覽等等，各種主題由在你看，ē-tàng滿足無仝世代ê需求。
薰廠後壁面ê綠色屏風「suan籐」khàm kah密密密ê牆圍，摃掉了後，封閉ê貯水池變做開放ê生態池，工業、消防ê作用已經退化，只賰瑠公圳ê人文意義kap大台北市區內底罕得有ê半人工、半自然生態池、綠地。托兒所hōo電視台借去拍連續劇，戲內底tsia是一間冊店，連續劇戲搬煞，冊店suah「搬bē煞」，真正有人來tsih接去經營「閱樂書店」。廠內原本hōo員工sńg野球kap排球ê中庭，1958年由林元朗設計做歐洲式古典庭園，用簡單ê圖形切割，對中是三層水盤ê噴水池，噴水池四周圍是四个三角水池，美觀造景兼消防蓄水，美麗原在。薰廠ê南爿運動場hām包裝材料廠已經無看見形影，面頂只有tng-leh施工ê大巨蛋工程。
聽老師ê說明，行過園區看著恬靜ê歷史建物，想著lòng-lòng叫ê機器運轉聲中工人ê勞動形影；想著貯水池làu水了後，一陣人tī hia hán-huah掠魚ê光景；想著跤手緊mé leh包裝ê女工；想著浴間內洗掉臭汗酸兼薰味ê工人；想著中庭快樂ê野球賽……。當然mā想著廠長永遠lóng是in leh做， lán ê人是永遠ê副廠長，廠長是做官人，廠務當然是副廠長leh負責。Mā想著tī風雲變色ê年代，二二八是因為薰來起致……。
- 1937年台灣總督府專賣局起造「台灣總督府專賣局松山煙草工場」；1945年戰後，由台灣省專賣局接收，改名「台灣省專賣局松山菸草工廠」；仝年台灣省專賣局koh改制成立台灣省菸酒公賣局，改名「台灣省菸酒公賣局松山菸廠」；1998年松山薰廠停業，人員、機器設備搬徙去台北薰廠。
- 1901年設立，日本時代專賣項目lóng總有十項：鴉片、鹽、樟腦、薰草、酒、酒精、石油、番仔火、度量衡、鹽滷（iâm-lōo）等等。1945年6月17廢除鴉片，變成九項。
- 台北薰廠tī日本時代ê名，為著配合國民黨政府ê「疏遷計畫」，tī 1966年開始搬徙到新北市新店區安康路二段235號。原本ê廠區是現時「台北轉運站」ê一部份。
- 華語叫『鍋爐房』，日語叫「汽罐室」。
- 「菸酒公賣局」民間俗稱做「薰草局」。
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會