Káu kap Lâng
（本文是漢羅合用kap全羅馬字一段一段對照）
作者：陳雷
前--ā阮兜有飼一隻軍用狗，chēng狗仔囝ùi朋友hia抱--來--ê。阮kā伊號名Wolf。大漢了大欉koh勇壯，bē輸豺狼。性地mā chiok食硬，啥mi̍h lóng m̄驚。有一擺受氣，kā一枝椅仔跤咬咬--斷。所以阮m̄敢hō伊見生份人，罕得chhōa伊出門，lóng關tī厝--裡，ia̍h是放tī後壁埕，圍牆仔圍--起-來。
Chêng--ā goán tau ū chhī 1 chiah kun-iōng-káu, chēng káu-á-kiáⁿ ùi pêng-iú hia phō--lâi--ê. Goán kā i hō-miâ Wolf. Tōa-hàn liáu tōa-châng koh ióng-chōng, bē-su châi-lông. Sèng-tē mā chiok chia̍h-ngē, siáⁿ-mi̍h lóng m̄ kiaⁿ. Ū 1 pái siū-khì, kā 1 ki í-a-kha kā-kā--tn̄g. Só͘-í goán m̄ káⁿ hō͘ i kìⁿ chheⁿ-hūn-lâng, hán-ti̍t chhōa i chhut-mn̂g, lóng koaiⁿ tī chhù--nih, ia̍h-sī pàng tī āu-piah tiâⁿ, ûi-chhiûⁿ-á ûi--khí-lâi.
有一回無細膩，hō͘伊ùi圍牆仔走--出-去，無人知影。伊一下就chông去阮兜頭前ê大路。路頂車suh-suh叫來來去去，隨就hō車撞--著。M̄知偌久，阮chiah發見狗無--去。走出去看，倒tī厝頭前樹仔跤，目睭kheh-kheh，iáu teh喘khùi。Chông倚--去，伊目睭thí金kā我看--一-下，隨就koh kheh--去，已經bē tín動--ah。送去急診，診斷腹內出血，跤斷一肢。無半點鐘bē赴手術就來過身，目睭無koh thí金。
Ū 1 hôe bô sè-jī, hō͘ i ùi ûi-chhiûⁿ-á cháu--chhut-khì, bô lâng chai-iáⁿ. I chi̍t-ē tō chông khì goán tau thâu-chêng ê tōa-lō͘. Lō͘-téng chhia suh-suh-kiò lâi-lâi-khì-khì, sûi tō hō͘ chhia tōng--tio̍h. M̄ chai gōa kú, goán chiah hoat-kiàn káu bô--khì. Cháu chhut-khì khòaⁿ, tó tī chhù thâu-chêng chhiū-á-kha, ba̍k-chiu kheh-kheh, iáu teh chhoán-khùi. Chông óa--khì, i ba̍k-chiu thí-kim kā góa khòaⁿ--chi̍t-ē, sûi tō koh kheh--khì, í-keng bē tín-tāng--ah. Sàng-khì kip-chín, chín-toàn pak-lāi chhut-hoeh, kha tn̄g 1 ki. Bô pòaⁿ tiám-cheng bē-hù chhiú-su̍t tō lâi kòe-sin, ba̍k-chiu bô koh thí-kim.
結局伊hō͘車撞了，斷跤家己ùi大路爬tńg來到厝頭前，差不多有15公尺遠。實在勇koh硬táu。 Che車禍完全我ê錯。我無kā狗顧好。
Kiat-kio̍k i hō͘ chhia tōng liáu, tn̄g-kha ka-tī ùi tōa-lō͘ pê tńg-lâi kàu chhù thâu-chêng, chha-put-to ū 15 kong-chhioh hn̄g, si̍t-chāi ióng koh ngē-táu. Che chhia-hō oân-choân góa ê chhò. Góa bô kā káu kò͘-hó.
兩工後，阮兜頭前一pak鮮花，m̄知啥人囥--ê。內底一張khá-loh，一chōa整齊手寫ê字：「I am so sorry.（我真正chiok失禮。）」應該是車禍ê人囥--ê，kā阮會失禮。伊可能iáu m̄知影，Wolf已經過身--去--ah.
2 kang āu, goán tau thâu-chêng 1 pak chhiⁿ-hoe, m̄ chai siáⁿ-lâng khǹg--ê. Lāi-té 1 tiuⁿ khá-loh, 1 chōa chéng-chê chhiú-siá ê jī: “I am so sorry. (Góa chin-chiàⁿ chiok sit-lé.)” Eng-kai sī chhia-hō ê lâng khǹg--ê, kā goán hōe-sit-lé. I khó-lêng iáu m̄ chai-iáⁿ, Wolf í-keng kòe-sin--khì--ah.
Che就是以後阮兜lóng無koh飼狗ê原因。
Che tō sī í-āu goán tau lóng bô koh chhī káu ê goân-in.
#寫hō͘學生朋友ê代誌 專欄，本文使用教育部推薦漢字kap傳統白話字。
台文通訊BONG報331期，2021年10月出刊。
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。