主講／林大米（Podcast「米米之音」主持人）張弘典（「弘宇自然農場」負責人）
記錄／戴如意
「米米之音」是一个農村廣播節目，自2015年開播。主持人林大米當初辭頭路、搬去宜蘭，決定家己製作網路廣播，beh做「農民生活聲音紀錄者」。大米行踏全台灣，分享農業議題，記錄作穡人ê生活kap種作理念；ǹg望透過節目，走揣農村hām農業ê價值。Tsit篇是2021/2/28節目ê文字記錄，雜誌設「農民食堂」專欄kā刊出。
台灣人愛lim咖啡。根據國際咖啡組織ICO統計，lán一年lóng總lim 28億5千萬杯咖啡，平均一个人lim 204杯，市場規模有700億ê價值。舊年（2020年）農委會報告，台灣種咖啡ê面積是1,155公頃，十年來增加兩倍，年產量有1,000公噸，主要產地tī屏東、南投、台東kap嘉義。
「弘宇自然農場」就是其中一个種咖啡ê所在。Tsit集邀請著負責人張弘典，伊tī嘉義大漢，因為khah早in阿爸投資生理ê關係，時常來往台東。便若歇寒歇熱，張弘典就ē hông叫來tàu做田--裡ê khang-khuè。細漢ê時tsūn伊並無kah意做tsia-ê穡頭，感覺辛苦koh無聊。
到張弘典大漢，伊tsiah漸漸揣著種作ê趣味，退伍了後就隨投入農業，開始tī台東經營農場。農場ê咖啡品牌號做『艾蘭哥爾』（Alanger）， tse是台東ê古名；親像台灣叫做Formosa，16世紀ê葡萄牙人mā替台東號名，Alanger ê意思是「遙遠koh美麗ê所在」。
張弘典講，台東適合生活、無適合生存，因為lóng是山地，種作難度koh-khah kuân，所以伊注重有經濟性ê產業，tsiah thang永續發展。伊評估，台灣咖啡市場iáu-koh有三倍ê發展空間，希望轉變lán過去感覺咖啡siunn高貴ê印象，kā變做生活中ê「必需品」。
農場採用「多層次經濟作物栽培」，上kuân層是大欉樹仔，ē-sái做水土保持、kā下跤ê植物tsa̍h日頭；中間是bih tī樹仔跤ê咖啡樹，葉仔就是肥料；塗跤種超過400種ê天然野菜，維持生態平衡。野菜koh有家己ê品牌，叫做「阿比野菜」。
Tsia ê農作物lóng無leh掖肥料，人工種ê植物參大自然生活做伙，khah環保mā khah符合生態；無仝層ê植物ē互相幫贊、提供營養，變做一个物質循環ê箍仔，張弘典堅持：人為介入愈少，農法階層愈kuân。
面對台東少年人口流失，張弘典認為ài kā產業做完整，親像執行產學合作、職業訓練教學，吸引少年人tńg--來，hōo台東khah有活力。伊kā tsit个工程比喻做「第25孝」——留tī故鄉陪伴家己ê爸母。
經過tsiah濟冬，張弘典早就認定家己是台東人，用「生產hām生態共和，農業hām土地共存，經濟hām環保共生」ê理念，伊ē tī tsia繼續種作--落-去。
mimivoice 米米之音
#農民食堂 專欄，本文使用教育部推薦漢字kap臺灣閩南語羅馬字拼音方案。
台文通訊BONG報331期，2021年10月出刊。
--------------------------------------------
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。