作者：周羿 （作者是Ē-liàn-tńg讀寫班結業學員）
我細漢ê時tī東港ê庄跤kap阿媽做伙生活。一直到五歲，我ê爸母tsiah tshuā我去高雄讀書。阮兜是一个全台語家庭，所有ê親tsiânn mā是lóng講台語。講台語對我來講是生成ē-hiáu ê代誌。
Tī我國中進前叫是講逐家kap我仝款，tī厝講台語，去學校講華語；後--來發現，有人是bē-hiáu講台語--ê，有人是聽有但是bē-hiáu講。13歲ê我tsiah開始有意識「原來m̄是所有ê人lóng ē-hiáu講台語」。我koh想……原住民ê同學為啥mi̍h mā真少講家己ê母語？！母語ê認同問題，tī我來台北讀書進前lóng m̄是問題，因為講台語是生活中上自然ê代誌。
來到台北了後，若是講台語tiānn-tiānn拄著兩種反應，一種是笑我sông，一種是呵咾我台語哪ē tsiah-nī liàn-tńg。M̄管是佗一種lóng hōo我感覺真奇怪！我ê姊姊hit-tang時kap我仝款tī台北生活食頭路，有一擺我去揣--伊，伊tuì頭到尾lóng kap我講華語。我問伊為啥mi̍h beh án-ne？伊講：「公司規定bē-tàng講台語。」我無法度接受tsit種規定。我kā姊姊講：「Lán自細漢講台語，若是來揣--你bē-sái講台語，án-ne以後我ē khah mài來--leh……。」Tse是十年前ê狀況，tsit-má ê台北kám有khah好？
我做演員ê時，tiānn-tiānn拄著ài講台語ê劇本，但是因為我少年，我ê台語能力hōo人質疑，tse是真趣味ê代誌。台語是我ê母語，我suah ài證明我是ē-hiáu講--ê！雖然我tī高雄m̄免證明啥mi̍h，但是tī台北我需要tsit个證明ê過程。
台語用字寫--出-來，我mā真認同。學ē-hiáu寫字了後，我ē-tàng koh-khah有自信講：「我mā是台語通ōo！」
#心內話 專欄，本文使用教育部推薦漢字kap臺灣閩南語羅馬字拼音方案。
台文通訊BONG報331期，2021年10月出刊。
--------------------------------------------
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。