輕可代
作者：Aminegy Khó͘
Bô lâng chai-iáⁿ, góa mā sī ē-hiáu thâi-lâng--ê. Hō͘ i siau-sit, bô koh chhut-hiān. M̄-koh, góa m̄ sī lām-sat ê lâng, nā-sī kap góa bat sio-kìⁿ-bīn, ia̍h-sī hán-hán--à pôaⁿ-nóa--chi̍t-ē ê lâng, góa chiū m̄-kam kā thâi. Beh thâi--ê, lóng sī liân sī án-chóaⁿ ē chiâⁿ-chò “pêng-iú” to bē-kì--tit ê lâng.
Beh kā in thâi, hō͘ in siau-sit, tio̍h kéng 1 ê hó-ji̍t.... Ah, tō sī i ê seⁿ-ji̍t hit kang! M̄ sī chhìn-chhái kéng--ê, in-ūi kan-taⁿ hit kang, Facebook ē tī tiān-náu thang-á ê 1 ê piⁿ-á-kak tiám-tuh: “Kin-á-ji̍t sī bó͘-mí-lâng ê seⁿ-ji̍t, ....”
Thâi-lâng, chi̍t-tiám-á to bē kan-khó͘, kō͘ chńg-thâu-á kap khí-pôaⁿ tō ē-ēng--tit, bô lâng lâu-hoeh mā bô lâng ē thiàⁿ. Chhi̍h--lo̍h-khì, koh chhi̍h--lo̍h-khì, bûn-bûn-á-chhiò tī sim-lāi, “Kín-á-ji̍t sī lí ê seⁿ-ji̍t, mā sī lí ê sí-kî.”
