 |
| photo by Taiffalo |
Beh投稿，請tī E-mail標題（iah是批lông頂面）註明「通訊30歲投稿」，感謝。
《台文通訊BONG報》ê前身是1991年7--月創刊ê《台文通訊》kap 1996年10--月創刊ê《台文BONG報》，落尾tī 2012年2--月合刊，也就是講，到kah今年ê熱--人，就是阮30歲ê坎站--looh！創刊hit當時，眾人對台灣母語ê發展有gua̋大ê ǹg望，tsit條台語路行過30冬，m̄知阮kám有ha̍h人意，hōo本土語言出頭天--ah？
翻頭tńg去看beh 30年前hit跤兜，台灣人知見著民主改革大變化ê流擺，規kuānn sio連suà ê運動，爭取母語人權ê議題也無欠席。30年來，tuè政治勢面起起落落，語言政策ê論戰無時停，路途就算講坎坎坷坷，語言運動ê成果suah也沓沓仔粒積——2018年尾，立法院三讀通過《國家語言發展法》，到tsia，所有本土語言ê發展tsiah平等得著法律上ê保障。
現此時，國校kap大學、研究所lóng已經有本土語言ê課程，koh，《國家語言發展法》明訂，自明年（2022）開始，國、高中mā ài有本土語言課。國家級ê語言認證考試tsîng 2010辦到tann，愈來愈成熟。公視台語台tī 2019年7--月開播，多元ê台語節目一个一个出--來；《小王子》台語版舊年3--月一下出版，即時tī冊店ê排行榜tshìng-tsiūnn頭名，包括阿却賞囡仔故事繪本系列在內ê各種台語文創作ná來ná受注目。本土語言ê復振，tsiânn做規个社會共同思考ê議題。
30冬ê tsit條路--裡，逐家手頭ê tsit本雜誌m̄ bat斷站，uì美國到台灣，uì 1991年到tann，kā濟濟sia̋n-pái、前輩ê心血khioh做伙，kap tńg半沿甲子ê台語運動做伴、kap各位關心母語ê有志做伴。阮30歲--ah，雖然是通世界iáu leh發行ê台語文雜誌內底歷史上kài久長--ê，也不過是一个「文青」——台文ê青年——nā-tiānn。人講，少年--ê khah táng-hiánn，30冬ê青春台語路阮行了按怎，阮家己歹講話，就交hōo讀者來回答。
Uì tsit-tsūn開始，阮誠懇徵求「台文通訊30歲」稿件，歡迎逐家來鬥鬧熱，看beh分享你kap《台文通訊BONG報》ê故事，iah是提供對阮ê建議。一本台語文雜誌beh行過30冬無簡單，若無各位讀者sio-thīn kap oo-ián，阮無可能堅持到tann。Tī tsia，編輯部koh再一擺表示上大ê感謝，期待有志ê來稿。
歡迎投稿
◎文字編輯：
作者tio̍h同意作品hōo編輯部做文字編輯，羅馬字部份阮接受教育部臺灣閩南語羅馬字拼音方案、傳統白話字兩種系統，原則上照作者ê意思採用。有beh特別表現家己腔口--ê，請註明羅馬字hōo編輯部thang參考；無--者，一律照《教育部臺灣閩南語常用詞辭典》標示ê「主音讀」做標準。
◎有關著作權：
錄取ê作品，作者ài保證無侵害別人著作權kap違背著作權法等等現行逐項法規ê行為；若有侵權iah違法ê狀況，作者tio̍h家己負擔法律責任mā ài賠償對《台文通訊BONG報》造成ê損害。本刊保留以電子期刊、錄音iah光碟、做tshuā讀影片等多元格式發行ê權利，有採用ê著作無koh另外付稿費。若作品是翻譯iah是改寫--ê，ài提供原作者同意ê證明。
◎投稿請寄來：
Email：bongpo1996@gmail.com
108002 台北市萬華區中華路一段106號9樓
◎投稿請註明真實姓名（發表ē-sái用筆名）kap職業、e-mail、身份證號碼、通訊hām戶籍地址、電話（手機）、匯款口座（請優先提供「郵局」iah是「華南銀行」口座）。即時起，若無beh領稿費，就免簽領據（mā無捐款收據）。（註：國外匯款手續繁複koh雙爿手續費真傷重，投稿者若無台灣國內銀行iah郵局口座，就無稿費，請包涵kap體諒。）
◎請m̄-thang一稿兩投；來稿無退還，敬請家己留底；投稿了後，若無接著本刊「收--著」ê回覆，請koh寄批來確認。
◎若有beh提供圖片，請m̄-thang囥tī word檔案內底，文字kap圖片檔案ài分開，tsiah bē影響圖ê解析度，印刷效果khah好。
◎審稿說明
雜誌篇幅有限，為著beh hōo內容有多元ê呈現kap鼓勵新作者寫作，原則上仝作者ê作品（包括詩、散文）ē làng月刊，也就是一年極ke刊六篇；小說kap其他連載性質ê專欄，無受六篇ê限制。若一擺投真濟篇，koh lóng有錄取--ê，凡勢ài一年以上tsiah thang tsiâu刊。新作者ê投稿，阮ē優先錄取，mā鼓勵作者盡量寫無仝文體ê作品。
編輯部收著投稿了後，lóng ē斟酌看--過tsiah回批，m̄-koh目前編輯人力有限，致使部份投稿khah uànn回覆，敬請作者原諒。若有leh趕緊iah是有其他ê疑問，ē-sái koh寫批--來。審稿流程ê疏忽，若造成逐家ê不便，編輯部tī tsia會失禮！
◎更正啟事：
月刊ê編輯時間真有限，無法度一位一位hām作者確認，若文字編輯內容有tîng-tânn，請作者主動寄批反應。編輯部ē tī收著批了後ê後一期照作者ê意思，刊更正啟事kā讀者說明。
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
