台文通訊BONG報330期(2021年9--月)
編輯室ê話
做伙來唸詩
郭伊貞
1
柯柏榮
2
吳義舜
4
張芳莉
熱--人ê學校
熱--人ê學校
4
台語sa攏有講座
主講／江文瑜
記錄／戴如意
6
台文通訊30歲
8
阿瑞--ā話仙
藍春瑞
甜粿
11
甜粿
11
醫學台文
12
Lán來講看māi
Bóng講笑
黃靜惠
姊夫——「牛屎kap蛇精」笑詼輯（三）
17
姊夫——「牛屎kap蛇精」笑詼輯（三）
17
文學káng「台」
石牧民
台語ê條件
18
台語ê條件
18
生活ê藝術
王秀靖
囚室日記
20
囚室日記
20
張寶明
大自然ê洗禮
22
大自然ê洗禮
22
光景bóng uē
Koa Hoàn-jiû
台南北門
23
台南北門
23
陳昭穎
4--月ê三角湧 25
4--月ê三角湧 25
台灣人寫真
吳柏鴻
武漢肺炎疫情下ê生活
26
武漢肺炎疫情下ê生活
26
李沛芹
Guá Siōng Kah-ì ê Lâng
28
Guá Siōng Kah-ì ê Lâng
28
林淑卿
七娘媽粿
29
七娘媽粿
29
農民食堂
主講／林大米、林正芳
記錄／戴如意
林正芳招你來宜蘭食平安糜——是文史工作者mā是煮糜gâu人
31
林正芳招你來宜蘭食平安糜——是文史工作者mā是煮糜gâu人
31
Sann-kap讀小說
張家榮
玄奇ê囡仔仙（十五）
32
玄奇ê囡仔仙（十五）
32
杜信龍
情刀（一）
35
情刀（一）
35
讀冊開講
相思nâ
有眼不識泰山
有眼不識泰山
38
寫hō͘學生朋友ê代誌
陳雷
寫台語文學ê滋味
寫台語文學ê滋味
Siá Tâi-gú Bûn-ha̍k ê Chu-bī
40
40
台羅會交流道
Tân Lī-bûn
Siu-kiaⁿ Sîn-kong-lêng
Siu-kiaⁿ Sîn-kong-lêng
42
Khu Phek-hôa
Si Saⁿ Siú
Si Saⁿ Siú
43
更正啟事
330期
目錄頁
「生活ê藝術」專欄第二篇文章
〈大自然ê洗禮〉ê作者m̄是張日東，應該是張寶明tsiah tio̍h。
編輯部失覺察，kā作者ê名hut m̄-tio̍h，
阮tī tsia更正，mā kā作者kap讀者會失禮。
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
4--月ê三角湧
作者：陳昭穎
（作者是長庚大學中醫學系ê學生 ）
細漢ê時tsūn，tī小可仔hip熱ê 4--月，我ê阿爸tiānn-tiānn tshuā我kap弟弟妹妹去peh鳶山。Hit-tsūn弟弟妹妹iáu真細漢，iáu未到山跤就tī車頂lóng睏--去。阿爸只好一手抱一个，慢慢仔tuì溪邊行，我就ná行ná sńg。4--月ê山有啥好sńg--leh？上基本就是路邊ê鹽酸仔，一手khiú一个，然後kā斷--去ê hit个食掉，酸酸mā是真好食。
「一手抱一个，iáu-koh beh peh山--ooh！」過路ê阿伯講。
「等--leh ē-tàng sńg就ē醒--ah！」阿爸講。
等弟弟妹妹lóng精神，已經到油桐花開ê所在，白色ê花lak tī塗跤，親像地毯仝款。阮就kā花插tī頭鬃，互相打扮做新娘仔行--過-去。阿爸koh有紮結冰ê碧螺春，鼻著真芳，若是喙ta就ē-tàng lim，若是熱就ē-sái提來ù頷頸仔。行到山頂天已經暗--ah，火金蛄ê表演就beh開始。Hit个時tsūn滿坑滿谷lóng是閃爍ê星，阮就學指揮ê姿勢，kā火金蛄當做合唱團，kā溪水流--過ê聲當做伴奏，án-ne sńg規點鐘。
落山了後，阿爸ê車頂有lim了ê碧螺春、khioh--tńg--來ê pùn-sò、兩三蕊油桐花，koh有三个睏--去ê囡仔。
#光景bónguē 專欄，本文使用教育部推薦漢字kap臺灣閩南語羅馬字拼音方案。
#台文通訊BONG報 330期，2021年9月出刊。
--------------------------------------------
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
平埔族夜祭～ Makatao嘉臘埔公廨夜祭ê尪姨
作者：蔡玉媐
（作者是高雄市第一社區大學台語課ê學員，感謝陳金花老師推薦投稿 ）
莿桐花開紅紅紅。古早平埔社若來到春天ê時，莿桐樹就開kah紅紅紅，隨koh花開花謝。Makatao族人tī嘉臘埔徛起m̄知幾若百年--ah，莿桐樹邊ê公廨阿姆祖恬恬仔tī hia守護伊ê囝囝孫孫。
每年ê舊曆11/15，社內辦夜祭，是真重要ê日子。尪姨是祭典ê靈魂人物，由伊開hiàng水。拜天公kap點豬——點豬ê儀式是尪姨khe̍h兩枝竹管仔，tī豬羊ê身軀uì頭點到尾，tsit个動作表示祖靈已經收著族人ê祭品--ah。接suà--落-來，是轉豬，kā豬羊se̍h頭轉向阿姆祖，由尪姨tshuā領逐家kā阿姆祖祈求平安豐收kap感謝。Koh來，是跳戲吟唱遙遠年代古早ê曲調，tse是祖靈熟sāi ê歌謠。尪姨kap族人tī月光下，手牽手唱歌跳舞，用家己ê話語siàu念祖靈，tī tsit个時tsūn，逐家心靈sio倚。
尪姨ti祭典ê時tsūn扮演--ê是kap祖靈溝通ê人，tī Makatao族ê傳承制度內底，是由查某人來擔任，代代傳hōo查某囝iah是新婦。伊ē-hiáu法術，平常時幫贊族人收驚、消災解厄ê khang-khuè。
平埔族屬於南島語族，有家己ê信仰文化。M̄-koh，經過tsiah濟殖民政府kap漢人大量入侵參通婚ê影響，平埔族文化被漢化，加上無文字記錄，致使夜祭ê細節可能已經失去原味--ah。真無彩平埔ê語言文化一直teh消失中，好佳哉tsit幾年來平埔族意識形成，in開始beh走揣家己ê根，文化工作者mā開始研究平埔族群ê分佈kap文化，mā hōo真濟人來做伙關心夜祭。我感覺祭典當中，上充滿神奇力量色彩--ê是尪姨，真想beh進一步去了解，m̄-koh欠缺正港ê文史資料，只是聽過口語化ê傳說。真希望政府公部門ē-tàng撥經費幫贊做文化收集kap田野調查，hōo夜祭文化ē-tàng koh-khah真實、完整呈現--出-來，tse mā是當地族人ê ǹg望。
高雄市第一社區大學ê打狗台語開講社團，為著beh kap本土文化做連結，阮tī 2016年舊曆11月15月圓tsit日，來到嘉臘埔親身體驗夜祭。逐家分頭觀察記錄每一个儀式，beh用台語文書寫ê方式合齊做一份完整ê報告。我負責記錄尪姨，m̄-koh尪姨uì頭到尾lóng teh kap祖靈溝通對話，是一个神聖ê khang-khuè，bē-sái kā伊攪擾，所以無法度請教伊相關ê細節。M̄-koh，阮感受著伊是阿姆祖kap族人中間穿針引線ê人。Tī嘉臘埔，阿姆祖kap尪姨是Makatao族人ê精神寄託。
註一：嘉臘埔徛tī tsit-má ê屏東縣高樹鄉泰山村。
註二：我hit日有請教汪主任委員，關於尪姨tsit个語詞是m̄是被漢化，伊mā感覺確實是án-ne；所以社內真濟人想beh kā尪姨正名做hiàng婆媽，m̄知影啥mih時tsūn tsiah有共識。
#光景bónguē 專欄，本文使用教育部推薦漢字kap臺灣閩南語羅馬字拼音方案。
台文通訊BONG報330期，2021年9月出刊。
--------------------------------------------
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
台南北門
作者：Koa Hoàn-jiû
（作者是中原大學應用外國語文學系ê學生 ）
阮阿爸hit爿ê阿公阿媽hia是台南北門，hit个所在倚海，可能是因為án-ne，阮阿爸tsiah ē一直講伊ê台語是海口腔，m̄-koh我聽伊ê腔明明就是台南市腔。台南北門ê入口有起一个叫『虱目魚小子』ê雕像，伊生kah……tsiânn特別，逐家ē-sái去查看māi。我逐擺經過lóng ē kā伊thuh臭，m̄-koh看hiah-nī濟冬mā是有感情--ah--lah，tsit-má看--伊mā算bái-bái仔古錐。
台南北門ê井仔跤tsiânn有特色，hia上出名--ê是一格一格ê鹽埕，tī hia看beh暗仔落山ê日頭特別suí；井仔跤mā有步道kap鐵馬道，ē-sái去hia散步iah是騎鐵馬，kā心情放hōo輕鬆，m̄-koh我kánn-ná無看過有人leh稅人鐵馬，所以若是beh去hia騎鐵馬，可能ài家己tshuân。
北門iáu有一个趣味ê所在叫『錢來也』，khah早iáu-koh有鹽廠ê時tsūn是鹽工ê福利社，tsit-má kánn-ná是賣紀念品ê所在。福利社kha̋ng-páng ê文字古錐koh有古早味，ē-tàng看著歷史ê痕跡。Koh無偌遠有一間「烏跤病醫療紀念館」，阮細漢ê時tsūn lóng ē來se̍h--一-下，ná看ná聽序大人講進前發生ê代誌，認bat家己ê土地。
當然北門m̄-nā tsit寡所在thang去，m̄-koh我對tsia-ê所在記憶khah深，所以來小可仔介紹--一-下。疫情結束了後，逐家若是有機會，歡迎來台南北門tshit-thô！
#光景bónguē 專欄，本文使用教育部推薦漢字kap臺灣閩南語羅馬字拼音方案。
台文通訊BONG報330期，2021年9月出刊。
--------------------------------------------
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
大自然ê洗禮
作者：張寶明
歇睏日來郊外ê淺山仔行行--leh，享受秋凊ê涼風，走揣樹林ê祕密。Nah光iānn-iānn ê日頭，頗略仔燒lō；唚微微仔吹ê秋風，淡薄仔冷淡。Am-poo-tsê bih leh樹林偷叫幾聲仔，吱叫尾站ê歲月；愛sńg ê膨鼠踮leh樹頂sńg走sio jiok，舞弄青春ê活力。孤一種ê野花霸占山崎，開滿淺粉紅仔色ê花蕊，講he是伊ê花海。行tī tsit條山路bē寂寞，尪仔頭ê影像phong-phài多變，心情透lām精彩ê氣氛，sù-sī koh輕鬆，是一tsuā大自然風味ê旅行。
Tīnn滿視線ê草仔埔，beh坐、beh the、beh倒，隨在--你。無體統mā免歹勢，無人tshap--你。雙手歡迎，享受大自然ê tshenn-tshau，suh飽清氣koh新鮮ê空氣，無人ē講你貪心、講你過份，tsia本tsiânn就是大自然食kah飽--ê。Tī tsia感受--著ê心思、iah--出-來ê心情，貼tī面肉，無人管你leh想啥？就hōo你ê心，kap一人一樣無親像ê表情款，tuè風去飛，tháu放一切，sńg hōo夠khuì tsiah講。
翻頭慢慢仔、輕輕仔行tī平靜ê大路，koh來放空頭殼，放飛心思。欣賞苦楝舅變色ê花果，安搭心靈，tháu放鬱積ê壓力，tng tio̍h時；吹凊冷ê微風，鼻秋ê氣味，tam起飛ê想像，tng tio̍h時。Tsín親像免收線ê風吹、免入櫥ê粉鳥、免回溪ê紅鰱魚，自由自在有夠好。
經過一遍koh一遍ê樹林，拍開心窗，空氣ê氣味有影無仝，he是心情輕鬆ê記持，he是beh叫醒細胞起來唱歌ê hoo-lú-bóng。目睭規个金--起-來，身軀規个精神--起-來。Tsit搭，有夠讚！有suí景做目睭仁ê畫布，hōo入秋ê風微微仔摸過面，靜靜仔聽大自然ê演奏，若ē-tàng配一杯俗俗--à ê lā-thé，沓沓仔kā tsit tsūn清閒ê滋味鼻芳--一-下，生活ê價值就tī tsit當時。
自生--來，節氣ê記持kám kan-ta是循環ê時間niâ？生活ê路草kám kan-ta是來kap去ê空間niâ？Kám tio̍h hông捆縛？我看iáu是隨時掠ân tsit當時，行出火拭盒仔狹tsinn ê生活，nǹg入大自然曠闊ê心懷，thuā淨人生ê uè-suè，剝落規身ê舊皮囊，鬥新pān ê精、氣、神， 快樂活tī suà--落-來ê日子，精彩lán ê人生。
#生活ê藝術 專欄，本文使用教育部推薦漢字kap臺灣閩南語羅馬字拼音方案。
台文通訊BONG報330期，2021年9月出刊。
--------------------------------------------
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
囚室日記
作者：王秀靖
想bē到有史以來，阮旅社蹛上久ê一kái——七暝七工，就是tī疫情tng-leh燒ê時， hōo人掠做是去蹛「防疫旅館」。厝頭家tshuā師傅來看阮兜ê浴間仔，講阮ê浴間仔漏水，漏到樓跤去。為著beh做浴間仔ê防水工程，規个浴間仔lóng ài khà掉重做，ài七工tsiah做ē好。
自án-ne，阮就包袱款款--leh，去蹛旅社。我感覺tsiânn無奈，無代無誌關tī旅社七工，三頓lóng ài冒險出去買，早時mā無法度lim家己煮ê咖啡，真鬱卒。 阮對樓跤ê厝邊感覺歹勢，hōo in承阮ê lah-sap水。厝頭家kap師傅一直講新ê浴間仔ē tsiok suí--ê，阮mā無期待，阮對本底ê浴間仔已經真滿意--ah。
雖然旅社是阮家己揣--ê，m̄-koh驚厝頭家嫌siunn貴，無願意tàu付，阮m̄敢揣khah sù-sī--ê，清氣就好。本來『宅』tī厝，mā有20坪；tsit-má，關tī tsit間旅社ê房間：一塊桌仔、兩塊椅仔、眠床kap浴間仔，鬥--起-來tsiah四、五坪niâ。
規工m̄是坐tī椅仔頂，就是倒tī眠床頂；椅仔到眠床免一步，眠床到便所免十步，tse是「上遠ê距離」。逐工就是椅仔、眠床、便所換來換去，親像leh坐監。頭一工蹛了真無爽快，suah人siān-siān，規工nuà tī眠床頂，無做半項代誌，hōo我有罪惡感。了後，精神khah好--一-點-仔；m̄-koh，看冊、tsiūnn網路mā無法度維持偌久。
為著振作，我開始寫日記——用台語來寫日記。無意料效果tsiânn好，m̄-na無睏--去，精神koh tsiânn好。寫日記度時間，ná寫ná查詞典，ke減學一寡仔台語詞，tsiânn無閒。朋友講「追劇」khah好刣時間；我寫日記刣時間，寫kah真歡喜。
總算beh出關--ah，想beh tńg去看新ê浴間仔生做啥款。人ê潛力tsiânn實無可限量，tshím頭，我感覺tī tsit个囚室內蹛七工，我ē起痟；等揣著心適ê代誌thang做，真緊就bē記得無爽快ê所在，漸漸仔慣勢tsia ê環境。Tī tsia，有thang lim、有thang食、有thang寫、有thang學、koh有thang運動——原地走標，無啥mi̍h好埋怨。
我想起《安妮日記》，he是伊leh避難ê時tsūn，bih tī祕密ê小閣樓所寫--ê。伊是leh bih Nazi（『納粹』）大屠殺，阮是leh bih武漢肺炎ê疫情；伊bih tī小閣樓，我bih tī小旅社；阮lóng leh寫日記，記錄人生。
Ǹg望疫情趕緊退--去，阮兜ê浴間仔永遠bē koh漏水。
#生活ê藝術 專欄，本文使用教育部推薦漢字kap臺灣閩南語羅馬字拼音方案。
台文通訊BONG報330期，2021年9月出刊。
--------------------------------------------
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
台語ê條件
作者：石牧民
（作者是台灣師範大學、靜宜大學台文系兼任助理教授 ）
三級防疫警戒降做二級了後，文藝界頭一層大事，就是綠光劇團〈人間條件．七：我是一片雲〉beh tī國家戲劇院公演。〈人間條件〉tsit个系列，在來lóng吳念真編劇，是通人呵咾ê台灣齣。講「台灣齣」是無超過。綠光劇團家己leh宣傳lóng mā講in tse「國民戲劇」。In án-ne宣傳kap〈人間條件〉一向ê內容mā有對同，全然是1945年太平洋戰爭收煞了後，台灣在地ê經驗。
Tsit斗〈人間條件．七〉拄好leh講1945戰後出世tsit沿台灣女性ê故事。Hit个時代台灣人大面mā散，義務教育kan-na六冬；濟濟人國校出業就去踮工廠趁食，月給寄tńg去庄跤、下港厝--裡，tàu io飼小妹、小弟。〈人間條件．七〉ê女主角，細漢就pun人做新婦仔ê素蘭，家己講：「代做紡織，koh來電子工廠，la-jí-ooh、電視機lóng mā bat做。」Án-ne講hit-tsūn，素蘭19歲，出外作穡五、六冬--ah。〈人間條件．七〉就是素蘭自細漢到6、70歲仔ê故事。伊tī工廠ê姊妹、無緣ê愛人仔，kap伊仝款，lóng是未曾未大漢就leh討趁ê艱苦囡仔。
編劇吳念真按怎表現素蘭tsit陣人？伊用台語！〈人間條件．七：我是一片雲〉ē-sái講是一齣全台語ê戲劇作品。內底角色無一个m̄是台語人。「吳念真」ê大名，自1980年代「台灣新電影」就有出脫；lán雖bóng bē kā掠做台文創作者，總--是，伊tī戲劇內底撙節台語ê功力lán無話講。Tsit齣全台語ê〈人間條件．七〉m̄-nā真tuann-tiah表現1960、1970年代ê語言環境，而且kā素蘭tsit沿台灣人ê運命描寫了tsiânn suí-khuì。素蘭tī工廠ê查某伴講著領班拍死蝶仔，同齊時講：「飛ē入--來，就hōo你飛bē出--去」，bē輸leh kap工廠女工、艱苦囡仔ê境遇sio叫應。吳念真是tsiok頂真beh hōo tsit世代台灣囡仔ē理解in序大hit沿台灣人所吞忍ê苦楚。
總--是，吳念真tsit齣全台語作品，無疑悟mā leh kap現此時tsiânn傷重ê台語sio叫應。Tī〈人間條件．七〉內底，kan-na三搭位仔出現華語；tsit三搭位仔，lóng總khah無三分鐘，卻是bē輸leh讖講台語死失ê運命。三搭位仔其中兩搭位仔，講華語ê人是工廠主管kap公所職員；mā-koh in講話內容lóng是leh宣佈政策，iah是溝通公共性質ê事務。Tuì án-ne，拄好ē-tàng kap台語ê部份來比pìng。〈人間條件．七〉內底，講台語ê場所，是工廠寮仔、翁仔某ê房間內；若講都合，是情伴leh講心聲iah是查某伴kheh tī眠床頂leh開講。Tī tsit齣全台語戲劇內底，lán已經看ē著，台語leh失去空間，失去活力；見若講公共事務，講私人以外ê代誌，華語tsiah有對pān。
Iáu一搭位，就是「我是一片雲」。He是tsit齣戲ê名，mā是鳳飛飛ê歌曲。Tsit塊歌，tī〈人間條件．七〉內底，象徵素蘭ê運命kap心聲；pun人做新婦仔，tī各種hōo人輾目屎ê遭遇中間飄浪、連回。規齣戲，見擺「我是一片雲」響起，bē輸素蘭leh唱伊家己無依倚，浮雲一樣ê人生。總--是，he是一塊華語歌曲。Tse m̄-nā一首歌niā-niā，tio̍h-ài看做規齣戲感情ê核心。吳念真骨力創作一齣全台語ê戲劇，真幼路leh描寫台灣艱苦人ê一生；m̄-koh，bē輸規个作品「桶箍」ê tsit塊歌，suah是華語歌。Lán kan-na ē-tàng講，伊是「寫實」kah有賰。素蘭hit沿ê人，聽鳳飛飛ê歌，讀瓊瑤ê小說來tháu放感情。Hām tng當時描寫素蘭hit款艱苦人ê工人作家楊青矗，mā無thang親像現此時吳念真án-ne，用台語來寫實，tio̍h-ài用華文來寫素蘭tsit款人物。
〈人間條件．七〉用台語講素蘭tsit个歹命囝ê故事。同齊時hōo lán看--著，台語mā是hit个歹命囝。Lán tsia-ê看〈人間條件．七〉ē m̄甘ê台語人，thìng好比吳念真koh進一步，用台文來寫台語人ê故事。
#文學káng「台」 專欄，本文使用教育部推薦漢字kap臺灣閩南語羅馬字拼音方案。
#台文通訊BONG報 330期，2021年9月出刊。
--------------------------------------------
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
姊夫——「牛屎kap蛇精」笑詼輯（三）
作者：黃靜惠
牛屎：蛇精，你mài逐工lóng妝kah hiah suí，好--無？
蛇精：你kā人管！你是m̄ bat聽過「管人生，管人死，管人化妝無天理」tsit句話，是--無？
牛屎：我m̄管--lah！你koh án-ne妝--落-去，伊『幾乎』kiōng-kiōng beh去hōo你sannh著頂腹蓋--lah！
蛇精：你是leh烏白亂講啥，我a̍h m̄ bat in姊夫啊。
牛屎：M̄是--lah！我是講華語ê『幾乎』--lah！
蛇精：Ooh！原來，你又koh台語、華語lām leh做伙講--ooh！拜託--leh，你mài tiānn-tiānn án-ne，好--無？害人神經錯亂，你ài負責neh。
牛屎：蛇精，你放心，我一定ē娶--你，照顧你一世人。
蛇精：我m̄是tsit个意思--lah！你是刁故意來氣--我是--無？無愛kap你講--ah，真正是講kah你bat，喙鬚to ē拍kat。
牛屎：蛇精，你a̍h無喙鬚啊，是佗位beh拍kat？
蛇精：Ái-iō，救人--ooh！我頭毛拍kat，án-ne ē-sái--無？
牛屎：Án-ne mā khah差不多。
蛇精：＠＃＄％＆＊……
#Bóng講笑 專欄，本文使用教育部推薦漢字kap臺灣閩南語羅馬字拼音方案。
台文通訊BONG報330期，2021年9月出刊。
--------------------------------------------
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
公部門ài實施語言平等教育， 尤其ài tuì司法部門做起！
作者：孫博萮
筆者是日常全台語使用者。進前因為kā人提告，赴宜蘭地檢署出庭ê時，發生檢察官用野赤ê態度，要求筆者改用「國語」陳述ê代誌，嚴重無尊重筆者對自然語言ê選擇kap使用。伊ê理由是：書記官ê台語無啥好，無法度完全聽有台語；筆者講siunn緊，書記官聽無ē造成記錄錯誤；看筆者ê年歲無成只ē-hiáu講台語；筆者用台語讀具結文字mā有錯誤，伊m̄願替筆者（kā書記官）「翻譯」等等。
筆者ê台語語速並無特別緊，而且mā表示m̄願改換使用ê語言，ē kā講話速度放慢，書記官若是聽無mā ē-tàng表達，我ē koh解sueh等。Hit位檢察官猶原用各種倚近壓迫ê語詞要求筆者「講國語」；最後是筆者一直堅持，甚至允准願意家己承擔（若有）記載錯誤ê風險，tsiah ē得繼續用台語陳述。
《國家語言發展法》第11條規定：『國民參與政府機關（構）行政、立法及司法程序時，得使用其選擇之國家語言。政府機關應於必要時提供各國家語言間之通譯服務。』《公民與政治權利國際公約》第14條第3款第6目：『如不通曉或不能使用法院所用之語言，應免費為備通譯協助之。』仝法第26條：『人人在法律上一律平等，且應受法律平等保護，無所歧視。在此方面，法律應禁止任何歧視，並保證人人享受平等而有效之保護，以防因種族、膚色、性別、語言、宗教、政見或其他主張、民族本源或社會階級、財產、出生或其他身分而生之歧視。』仝法第27條：『凡有種族、宗教或語言少數團體之國家，屬於此類少數團體之人，與團體中其他分子共同享受其固有文化、信奉躬行其固有宗教或使用其固有語言之權利，不得剝奪之。』
檢察官若是真心煩惱書記官聽無台語，無法度確實記載陳述人ê陳述、恐驚對陳述人不利，應當ài主動派通譯協助。地檢署平常時家己ài加強對人員ê訓練，mā ē-tàng照當事人需求，揣台語聽力能力khah理想ê書記官來記。若因為書記官語言聽力能力不足，致使記載錯誤ê風險，無應當由民眾家己來承擔。《國家語言發展法》、《國際人權公約》lóng特別明文保障使用固有語言tī司法過程中ê人權，司法人員就應該確實遵守。
一个語言若是無法度、無機會thang tī日常生活中普遍使用，就ē漸漸消失、死亡。Tse mā顯示筆者進前主張台灣母語若beh復振，除了教育以外，koh ài配合公職人員考試母語專長加分ê重要性。Tse是對母語使用者ê基本保障，m̄-nā是保障人民對公部門使用母語ê自由，mā是保證母語未來ē-tàng正常tī社會上繼續流通ê機會。
Suà--落-來，因為早前tī面冊批評公家／官方機關無應當使用「台語火星文」ê爭議，去hōo無熟sāi ê網民侮辱（hông講是『智障』、『低能兒』……），我對in提出公然侮辱告訴。明明tsit款用詞若是用華語sio罵ê時，tiānn-tiānn lóng是有罪判決，宜蘭地檢署ê檢察官suah判斷he是：『可受公評之事』、雖然『用詞尖酸刻薄、使人不快』，但是iáu算是『適當／合理之評論』、『難認被告具有誹謗之真正惡意』，判in無起訴，實在有夠厭氣。
現此時ē tī司法程序中使用母語陳述ê人，大部份是社會中khah弱勢ê人。Tsit款裁判顯示，就算tī《國家語言發展法》通過ê台灣，tsit个社會對母語使用者ê惡意、歧視已經普遍，自然到檢察官lóng感受bē著，mā等於默許hia-ê人用tsit款用詞來侮辱、霸凌母語使用者。加上進前宜蘭地檢署檢察官tī偵查庭威脅、要求筆者ài用「國語」陳述ê狀況（過去mā bat tī台北ê法院看過法官壓迫被告受訊問ê時「ài講國語」），有一寡司法人員本身就是加速母語衰亡ê加害者。
Beh保障人民使用固有語言權利ê普世價值，若無法度tī司法程序kah裁判中落實，《兩公約施行法》內底『保護人民不受他人侵害，並應積極促進各項人權之實現』、《國家語言發展法》保障各族群使用自然語言、『國家語言一律平等、國民使用國家語言應不受歧視或限制』、『促進國家語言之傳承、復振及發展』等等ê條文就bē輸是白寫--ê。中華民國ê司法人員若是lóng用tsit款立場來庭訊、裁判，未來母語使用者ê處境定著是koh-khah艱難，所以筆者認為：親像性別平等教育仝款，政府應該ài對公部門實施語言平等教育，尤其應該ài先tuì司法部門做起！
#Lán來講看māi 專欄，本文使用教育部推薦漢字kap臺灣閩南語羅馬字拼音方案。
台文通訊BONG報330期，2021年9月出刊。
--------------------------------------------
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
是按怎bat tio̍h過武漢肺炎mā是建議ài koh注疫苗？
作者：羅九安
為怎樣bat tio̍h過武漢肺炎ê人mā ài注疫苗？疫苗ê路用是leh幫贊免疫系統tī iáu未拄著病毒進前，ē-tàng先培養抵抗伊ê免疫力，包括中和抗體kap T細胞。M̄-koh你若是bat tio̍h過病，照理講，你應該就ē有免疫力，kám tio̍h koh需要注疫苗？而且以早ê認定是，自然感染所得--著ê免疫力，通常ē比注預防射所得--著--ê khah有力mā擋khah久。M̄-koh美國CDC mā是呼籲，就算是tio̍h過武漢肺炎ê人mā tio̍h趕緊來注，khah m̄驚koh hōo病uè--著。
注疫苗所得--著ê抗體對變種病毒khah有效
武漢肺炎ê病毒屬RNA病毒，本身就gâu突變，koh加上伊湠到全世界，致使伊到tann已經生出幾若款ê突變株。衛生專家就煩惱病毒若直直突變--落-去，恐驚ē致到疫苗失去保護力。一个美國Washington大學ê團隊，kā注過兩筒Moderna（『莫德納』）疫苗ê人kap tio̍h病復原ê患者血清--裡ê抗體做比phīng，看佗一款抗體對無仝ê突變株khah有保護力。In ê結果顯示，注Moderna疫苗得--著ê中和抗體，對壓制無仝變種病毒khah有路用。
斟酌kā伊分析以後，in發見注疫苗所產生ê抗體，主要是leh認病毒外殼一種叫做RBD ê抗原。因為病毒利用RBD kap細胞表面ê ACE2受體結合來感染細胞。RBD若hōo抗體包tiâu--leh，病毒就無才調koh感染細胞，也就是講，抗體kā病毒中和。注Moderna疫苗，ē刺激免疫系統生出濟濟無仝款ê中和抗體，來掠RBD抗原頂面無仝款ê結構，也就是所謂ê抗原決定位。所擺，就算其中一个抗體因為sio對應ê抗原決定位突變失去中和力，mā ē-sái倚靠別个抗體來中和病毒。
Hām伊sio比，uè著病以後自然產生ê抗體有khah濟款，ē認病毒無仝部位ê抗原，bē kan-na集中tī RBD。不而過，雖bóng整體來看抗體有khah濟種，m̄-koh伊針對RBD ê中和抗體種類比注疫苗--ê khah少，所以若拄著有變異ê抗原決定位ê變種病毒ê時tsūn，就khah無別款抗體thang tàu跤手，kā病毒中和ê能力就khah輸注疫苗--ê。
Hōo bat tio̍h過病ê人補注疫苗
既然注疫苗所得--著ê抗體kánn-ná比自然產生--ê khah有力，lán是m̄是tio̍h-ài呼籲bat tio̍h過病ê人mā來注？兩个英美ê研究團隊分別tī《科學》期刊發表in針對tsit个議題ê論文。In發見若hōo tio̍h過病復原ê人，koh補注一筒輝瑞／BNT或者是Moderna ê RNA疫苗，in血清--裡ê中和抗體量ē tshìng-kuân 1,000倍。而且koh是tuì kan-na對原底ê武漢株有效，進步到ē-tàng對付包括英國株、南非株等等無仝類ê變種病毒！保護力贏過注兩筒疫苗、m̄-koh m̄ bat tio̍h過病ê人。M̄-koh若是hōo in ke注第二筒，抗體ê效價並bē比kan-na注一筒khah好。
Tsit个現象hōo科學家感覺真趣味，因為tsit款雄雄tshìng-kuân ê抗體反應是免疫系統tī第二擺拄著仝款病毒ê時tsūn，tsiânn典型ê反應，通常由記憶B細胞kap T細胞聯合發動。M̄-koh hit幾个tio̍h病ê人m̄ bat uè著變異株，輝瑞／BNT kap Moderna ê疫苗mā是照武漢株落去設計--ê，照講in ê免疫系統無接觸過變種病毒，為怎樣suah ē hōo in生出ē-tàng中和變種病毒ê抗體kap相關ê T細胞--leh？
現此時得--著ê研究資料顯示，hōo初代ê武漢株感染以後，免疫系統ē生出兩類無仝ê記憶B細胞。一類ē分泌一模一樣ê抗體，專門對抗仝hit隻病毒。另外hit類ê B細胞就m̄是kan-na一種，伊是由濟濟種B細胞株組成，ē-sái分泌無仝款ê抗體。Tsit大類ê B細胞所做--出-來ê抗體，對頭先hit隻病毒凡勢無大路用，m̄-koh伊thang確保lán未來假使拄著變種病毒，免疫系統mā有才調對付，算是一種超前部署ê策略。
記憶B細胞leh發展ê過程--裡，的確ài有T細胞ê參與，T細胞ê種類若愈豐富，培養--出-來ê B細胞就ē愈多元。大多數ê新冠病毒疫苗，in使用ê抗原kan-na是病毒外殼hit个親像尖刺ê spike卵白質；所以注--落-去誘發ê抗體kap T細胞kan-na ē對付spike，特別是伊頂面ē kap細胞ê受體結合ê RBD。Lán若hōo病毒uè--著，病毒內底lóng總25个無仝款ê抗原，lóng有機會hōo免疫系統接觸--著，hōo lán生出khah豐富ê記憶B細胞hām T細胞。若hōo tio̍h過病ê人補注疫苗，in體內百百款ê記憶B細胞kap T細胞一下受抗原刺激以後，就隨分泌大量無仝ê抗體，thang中和tài無仝突變ê病毒。
以上ê研究結果說明，補注一筒疫苗對bat tio̍h過武漢肺炎ê人有大利益，m̄-nā加強對原底hit隻病毒ê抵抗力，mā連帶增加對變種病毒ê保護力。不而過，是按怎注第二筒了suah無出現免疫力加強ê效果？Kám講若bat tio̍h過病，疫苗就無需要注到兩筒？注AZ ê腺病毒疫苗iah是高端ê次卵白質疫苗kám ē有類似ê效果？Tsit幾个問題ê答案，lán目前iáu無kài清楚，的確ài有khah齊全ê資料tsiah thang解sueh。
（本文uì Blog「讀台語，學科學 Tha̍k Tâi-gí, o̍h kho-ha̍k」轉載，有得著作者同意，漢羅用字有調整，原文網址是：https://reurl.cc/W3e51D）
讀台語，學科學
Tha̍k Tâi-gí, o̍h kho-ha̍k
#醫學台文 專欄，本文使用教育部推薦漢字kap臺灣閩南語羅馬字拼音方案
#台文通訊BONG報 330期，2021年9月出刊。
--------------------------------------------
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
訂閱：
文章 (Atom)