台灣ê驕傲

吳令宜

各位評判老師,各位同學,逐家好,我是編號第O號,今仔日我beh演講ê題目是「台灣ê驕傲」、「台灣ê驕傲」。

成做一个台灣人,徛tī tsit塊tsiah-nī suí ê土地頂kuân,生活tī資源tsiah-nī豐富ê所在,立足tī享受民主風氣tsiah-nī開放ê國家,值得咱驕傲ê代誌,實在是有夠濟--ê。


Tsit-má,我beh來講咱台灣值得驕傲ê頭一層代誌,就是台灣ê農業。蘭花是台灣農業重要ê經濟作物,tsit幾年來,台灣以專業ê經驗培育新ê品種,tuì 2007年規冬ê生產價值二十億,到2011年ê七十億,增加ê產業價值是非常驚--人-ê,而且英國女王mā bat親身呵咾咱台灣ê蘭花tsiok suí,所以若想著台灣ê蘭花開tī全世界各地,hō͘ in ê生活環境變kah suí-suí-suí,咱就感覺tsiok驕傲。

Koh來beh講--ê是漁業,台灣ê kuè魚(『石斑』)tī 2009年,產量雖然是世界排名第二,iáu-m̄-koh產業價值suah是世界第一,ē-sái看出台灣kuè魚養殖ê品質,深深受著國外市場ê肯定,而且mā徛上國際重要ê地位。另外,iáu-koh有鰻、bái-bái魚-『小丑魚』等等,mā lóng是tī國際地位真出名、對世界有貢獻、mā真受著歡迎ê魚類。

值得咱提出來講ê台灣驕傲,iáu有,對世界真有貢獻或者是真出名ê人物,比論1986年得著『諾貝爾』化學獎,而且mā得著美國國家科學獎ê李遠哲,koh有tī運動項目表現了tsiok好ê山球(『高爾夫』)女將曾雅妮,iáu有tī美國拍野球ê王建民等等,in值得咱驕傲--ê,m̄-nā因為in是台灣人,koh-khah是因為in以成做台灣人為光榮ê tsit份認同台灣ê堅心,使人感動。

Suà--落-來,上重要--ê,而且一定ài提出來講ê台灣驕傲,是民主ê展現。

台灣人當今ē-tàng享受民主自由,過程雖然坎坎坷坷,mā有一寡民主ê先鋒,因為堅心beh tshuā台灣行向民主、自由ê舞台,犧牲in ê青春kap自由或者是in ê家庭,m̄-koh,過程並無流血革命,顛倒是以平和無流血ê方式來達到目的,tsit種民主ê過程,咱ài珍惜,是hō͘世界iáu bē-tàng享受民主ê共產國家學習ê模範對象,koh-khah是咱台灣ê驕傲。

徛tī tsit塊tsiah-nī suí ê土地頂kuân,生活tī資源tsiah-nī豐富ê所在,立足tī享受民主風氣tsiah-nī開放ê國家,我beh大聲tī tsia講:Tse是咱台灣ê驕傲啦!

今仔日我ê演講就講到tsia,感謝逐家。