主講／蘇建和
記錄／陳亮穎
台語sa攏有 - YouTube 頻道
2022年12--月ê台語sa攏有講座邀請「蘇建和案」1 ê當事人蘇建和先生，來kā逐家分享避免冤案、平反冤罪，iáu-koh有「反酷刑」ê概念。想起規个案件大概ê過程，蘇建和表示伊自1992年2--月，kap其他當事人劉秉郎、莊林勳bat hōo法官判死刑，官司拍到2003年ê時有再審，一直到2012年tsiah真正hông判無罪。
頭先蘇建和tshuā逐家探討啥mi̍h是「酷刑」。酷刑tsit个詞tī台語口語內底，一般是leh形容人無人情義理koh橫霸，iah若蘇建和提起ê酷刑，一方面是íng過嫌疑犯去hōo警察單位刑所遭遇ê肉體傷害，koh有精神受著損害；雖然tsit-má khah罕得有嫌疑犯hōo警察刑，m̄-koh警界kap司法單位ê權威kap做法，猶原ē hōo嫌疑犯iah是被告心內感覺痛苦、驚惶，tsia-ê現象lóng包含tī「酷刑」ê意涵在內。
蘇建和ē記得1991年8月15，hit工伊tī序大經營ê自助餐店tàu-sann-kāng包便當，包百幾粒了後按算beh送。Tsit个時tsūn m̄知按怎有四个警察，駛一台白色轎車，到in兜門跤口，kā伊sak入去車內，載去汐止分局。到位了後，伊就開始hōo警察刑，ài伊承認有參與刣死吳銘漢翁仔某ê案件；蘇建和hōo人拍kah烏青激血、規身軀傷痕，tī規个過程中，伊huah tsiok濟kái、強調家己無刣人。
離開警察局hōo人送去看守所ê人，一般lóng ài褪光光，hōo看守所人員檢查伊有傷--無，所以伊規身軀全傷tsit層代誌有留落記錄；蘇建和mā揣有人來做證講伊bat hông刑。M̄-koh等到伊有機會kā監察院陳情ê時，法官、檢察官suah m̄願調查伊bat hông刑ê代誌；尾--à蘇建和kap相關團體beh告汐止分局警察kā刑，法官tī不起訴書內底ê理由suah寫講：雖然伊hông刑致使tio̍h傷是事實，m̄-koh根據「無罪推定原則」，無法度證明是佗一个警察kā拍，就án-ne，無警察因為kā人刑hông判有罪。
但是正正因為警察有kā人刑，tsiah ē造成hông掠ê人姑不終ài承認犯罪，hōo法官當做有罪ê憑據。而且當初時蘇建和等三个人案件ê起訴書內底，kan-na寫講in有口供承認犯罪，無附其他ê證據。有關tsit層案件其實有收集著證據，包含三塊半个tsíng頭仔痕、12枝頭毛、一款圓點形ê鞋仔印，m̄-koh法官beh kā人判死刑進前，m̄-nā無參考tsia-ê證據kám有kap當事人有牽連，mā無用證據證明當事人kám有牽涉著命案。
一直到再審ê時，hit-tsūn ê法官tsiah重koh調查現場採集--著ê tsíng頭仔痕kám有符合當事人--ê。鑑定了後，發現現場kan-na一款鞋仔印；若有tsiok濟人仝時間犯案，照理講現場應該m̄-nā一款鞋仔印tsiah tio̍h——tse顯示tsia-ê hông起訴ê當事人，有可能是冤枉--ê。
蘇建和落尾有機會受著司法救濟，是因為hit-tsūn ê檢察總長看著tsit个案件，giâu疑哪ē一堆證據to無查就kā人判死刑，tsua̋nn提出24个疑點；koh加上漸漸仔有媒體報導，一寡人權組織mā開始關心tsit層代誌，所以蘇建和等等tsia-ê當事人tsiah有機會平反冤案。
想起無--去ê歲月，蘇建和表示，入監獄進前，伊只是一个19歲ê少年人，tsiah濟年受冤枉坐監、一擺koh一擺上訴再審陳情了後，tsiah有機會來tsia kā逐家分享避免冤案、保障人權ê重要性。Tsit-má伊已經51歲--ah，雖然人已經出來hiah濟冬，m̄-koh若拄著khah寒ê天氣，身體iáu是ē無爽快；因為當初伊hōo警察刑ê時，已經tio̍h內傷suah無法度隨治療，khah早看守所內底無醫生，有辛苦病疼mā無tè thang醫，無像tsit-má看守所內底有醫療人力kap資源。
蘇建和講，世間一寡先進ê國家，有關「反酷刑」ê人權保障，早前就已經法制化。像聯合國tsit款國際組織，tī 1984年就決議通過《禁止酷刑公約》，tī 1987年正式生效；2002年聯合國koh決議通過《禁止酷刑公約任擇議定書》tsit項補充條約，2006年生效，而且根據tsit項法律，設立「防範酷刑小組委員會」。長久以來，台灣無tuè著國際ê跤步，2013年台灣當權政府邀請國際人權專家來台灣進行兩公約（編按：《公民與政治權利國際公約》kap《經濟社會文化權利國際公約》）頭擺審查會議ê時，國際專家bat建議台灣政府kā《禁止酷刑公約》合法化，一直到2018年4--月，行政院內政部總算提出伊ê施行法草案，等待立法院完成立法。
蘇建和認為，雖然有犯罪ê人ài罰無m̄-tio̍h，m̄-koh mā ài避免產生冤案，若無犯罪suah hông冤枉ê人ài有thang平反。Iah若警察單位，ài tsiânn做真正leh保護人民、維持治安ê角色，m̄-thang像過去án-ne，kā人刑、製造冤案。Koh來，辦案鑑定bē-sái像khah早參證據to無參考，kan-na看嫌疑犯ê形體ná歹人，就kā人判刑、判有罪。
自伊ê案件hông平反了後，蘇建和智覺著「人權」tsiok重要，就去「台灣人權促進會」做志工；伊koh去讀冊補充學問，tsit-má tī東吳大學人權所讀碩士。Tsit kái參逐家講著「反酷刑」tsit个主題，ǹg望愈來愈濟人ē-tàng關心阻止冤案產生、按怎平反冤案ê議題，mā ē-tàng關心當事人、家屬tī社會ê處境。
1.1991年3月24，tī hit時ê台北縣汐止鎮（tann新北市汐止區），發生吳銘漢kap葉盈蘭翁仔某hōo人刣--死ê命案。仝年8--月，警方tuì現場留--落-來ê薪水袋仔採集bak血ê tsíng頭仔痕，鎖定tng-leh做兵ê王文孝做嫌疑犯。Tshím開始王文孝承認kan-na伊一个做，m̄-koh汐止分局ê警察看被害者hông刣79刀，giâu疑tsit層案件有共犯，經過偵訊了後，王文孝表示iáu-koh有別人參與犯案，警方就án-ne無證無據、sì-kè烏白掠--人。蘇建和是tsit个過程中hông掠--去ê其中一个，後--來tsit層命案mā hông叫做「蘇建和案」。
