1963年，台中一中有五位畢業生去讀政治大學：財政系ê陳政龍、法律系ê譚雲清、邊政系ê唐雄松、政治系ê林韋朋，以及國貿系ê我。Hit當時因為真chē僑生蹛宿舍，致使戶籍tī彰化以北ê台灣學生分配bē著宿舍，gún五位只好tī校外附近稅厝蹛。
Gún分路chhōe厝，結果chhōe著一間tī新興路kap新光路交接ê角間ê三樓，是lòng-khòng間，無眠床，tio̍h睏柴枋地板，一個月ê厝稅算--起-來一个人台幣50箍；gún ê家境m̄是真富裕，所以就決定kā伊稅--落-來。
頭一暗，gún食飽了後就坐tī地板，圍lúi開講話仙。韋朋ê老母有準備新港飴（塗豆糖）hō͘伊帶來kap大家分享，大家lóng講有夠好食，hō͘韋朋感覺真歡喜。政龍講伊ê故鄉竹山真偏僻，ǹg望有一工ē-tàng出頭天；雲清講伊蹛潭子，老爸做警察，爸母ǹg望伊後--來ē-tàng做法官；雄松講伊蹛彰化街仔，老爸做生理真趁錢，伊ē-tàng考tiâu國立大學，雖然是上冷門ê系，in mā真滿意；韋朋講伊蹛新港，老爸做警察，伊本來想beh考軍校thang效忠國家，m̄-koh，in爸母講beh kap伊斷絕關係，後--來勉強接受伊去讀政治系；我蹛tī台灣ê內地——南投縣國姓鄉ê庄跤，老爸是一个作穡人。
Gún五人做伙蹛無偌久了後，就lóng變做「仙」。政龍ài倒leh讀冊，tiāⁿ-tiāⁿ讀kah睏--去，gún叫伊「睏仙」；雲清逐項to beh諍kah贏，gún叫伊「諍仙」；雄松m̄ bat洗衫褲，講放假ê時chiah beh帶tńg去洗，gún叫伊「lah-sap仙」；韋朋有憂鬱症ê款，tiāⁿ-tiāⁿ憂疑不決，講好beh做伙出門，行到樓梯頭chiah講伊beh換另外一領衫，gún叫伊「sô仙」；查某囡仔真愛kap我做伙講話，所以in叫我「拐仙」。
韋朋kap我是仝年仝月仝日生，tiāⁿ-tiāⁿ愛招我做伙出門。伊漢草lò koh身體勇壯，逐禮拜tio̍h一工去運動埕練三鐵（鐵餅、標槍、鉛球），我就tòe伊去，替伊khioh tàn--出-去ê三鐵，án-ne，我mā是有teh運動。伊tī校運得著三鐵冠軍，koh拍破記錄，就án-ne出名--起-來；我kap伊做伙tī路--裡teh行，查某囡仔lóng ē越頭掠gún注目。
總--是，韋朋自細漢就受著「忠黨愛國」ê洗腦，因為伊bē-tàng讀軍校，kan-taⁿ ē-tàng來讀政治系，致使伊逐工lóng真鬱卒，憂鬱症soah愈來愈嚴重。伊非常崇拜中華民國ê軍人，像講湯恩伯上將ê墓是tī學校邊ê山坪，伊就逐工lóng去kā伊掃墓。有一工，伊招我做伙去，我發見墓ê四箍圍lóng是衛生紙，原來逐暗lóng有人chhōa愛人仔去hia舞男女關係，kā拭in ê siâu ê衛生紙tàn kah滿sì-kè。
有一工，雄松kā gún講in班--裡有一位是少將ê查某囝，韋朋聽--著，隨講伊beh tńg去讀邊政系，以後ē-tàng去蒙古做「省主席」。聽韋朋講，in爸母反對，致使加添伊ê鬱卒；伊ê憂鬱症已經真嚴重--ah。
1965年3月初5暗時，韋朋鐵馬牽--leh，tī稅厝ê樓跤teh等--我。伊講tú-chiah收音機有放送講「陳誠過身」，lán就緊來去木柵電信局發弔文。我隨坐起lih伊鐵馬ê後座，伊車踏真緊，有時kiōng-beh hián倒。發電報ê時伊無用本名，是用伊ê號——林逸文（kā孫逸仙kap孫文khioh做伙）；我無啥mih號，就用本名。3月初8 hit工ê中央日報，頭版新聞豋出『海內外弔電已收百外件……政大學生林逸文、林俊育……』。
二年期末考hit工早起，大家做伙beh出門，韋朋tuì樓梯頭hoah一聲「我beh跳樓」，就chông起lih樓頂，kā窗仔拍開，跳落去拄起到一樓ê平台。Gún聽著「pőng」一聲，koh有káⁿ-ná地動ê感覺，緊走出去看，看著伊人好好，tuì平台行--落-來，m̄-koh，跤有小可跛--一-下跛--一-下。期末考煞了後，韋朋kā我講，伊行入去教室，無法度考試就行--出-來，伊beh申請休學。
隔tńg年開學ê時，韋朋由爸母陪伴來辦休學。In老父kā我講，看伊hiah大phiāng（伊koân in老爸量約一粒頭），若無，就想beh kā伊pa--落-去，實在真無奈ê款。In老母kā我講，in不時to teh煩惱--伊；有一工暗時半暝來電報，in緊張kah掠準有啥mih大代誌，結果電報拍開一看，內底kan-taⁿ寫「緊寄兩盒新港飴」。原來hit擺gún講塗豆糖真好食，伊就隨發電報tńg去討，所以過無幾工，gún就koh有好食ê塗豆糖。
韋朋休學tńg--去了後，gún收著伊ê明信片，內底án-ne寫：『弟若不幸，汝等一定要齊力建立世界最偉大的中華民國！……』
我想lán台灣kap韋朋仝款命運ê「忠黨愛國」ê受難者一定bē少，願lán台灣受外來政權thún踏ê命運緊來結束！
#台灣人寫真 專欄，本文使用教育部推薦漢字kap臺灣閩南語羅馬字拼音方案。
台文通訊BONG報305期，2019年8月出刊。
歡迎捐款贊助 #李江却台語文教基金會 （捐款thang抵稅，匯款了後請通知02-23112199）
線上捐款(定期定額) https://ppt.cc/fF5bhx
線上捐款(單筆) https://ppt.cc/fcycox
郵政劃撥：19021486
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
