作者：郭文玄
皮包仔提銃出--來hit時tsūn，伊
目屎忍--leh，恬恬kā阿兄攬--leh，講
“I love you.”
面對 beh用性命對抗
高高在上hōo人層層保護ê特務頭
銃交hōo阿兄 是kā阿兄ê生死
交hōo台灣未卜ê歷史
恬靜、話少、心幼
像島上ê母性
純真、hònn學、熱性
像海洋ê自由
異國北美北大西洋西岸交銃ê決心
Hōo伊 漂浪到倚北極極地ê北歐
伊 m̄是頭一个
蔣渭水見證結婚 頭一代女性醫師ê蔡阿信
見證殖民政權轉換ê不義 飄浪到太平洋東岸ê北美
台共ê謝雪紅 見證海峽兩爿中國封建文化生湠--出-來反文明ê政權
蔡瑞月 見證舞蹈藝術飄浪tī南半球新獨立國家ê自由kap尊嚴
也m̄是上尾个
綠島ê風湧 見證白色ê海島 進步女性ê文明思想
雪地ê極冷 見證愈冷ê島嶼頂kuân漂浪他鄉 像渡鳥
飛去bih寒 tī天涯海角tshiânn囝顧翁m̄知名姓女性ê堅心
島嶼ê進步青年 m̄是關tī改造頭殼
ê烏牢 就是列入去烏名單關tī海外
其實 威權ê烏手 kā家己關tī監獄島
伊 是想beh革命--ê
想beh革獨裁政權ê命 想beh革監獄島ê命運
伊甘願提--出-去ê hit枝銃 hit枝銃ê銃聲 hōo家己
行入家破阿兄逃亡 tī大西洋岸兩岸救援ê苦難
逐个人lóng有夢 lóng leh做suí夢 哪有人
ē想做惡夢 kā家己網tī惡夢內底
伊 想講惡夢醒--來 島上ê烏雲ē khah散
天 ē khah清
伊ê頭殼是清醒--ê
伊kā家己ê苦kap m̄甘 pha碇tī海島ê深海
伊ê思想行tī頭前 伊影著
海島航向ê光
溫純ê住民 感覺島上海風微微 總有人智覺
海島白色ê風颱眼 比寒天ê東北季風khah強khah冷
親像身體檢查 知影島嶼tio̍h病 揣藥方ê憂心者
Hōo人當做煩惱過頭 當做背骨 beh sak倒hōo威權體制塑形--出-來
Hit个m̄ bat摸著土地m̄ bat聽著鳥語m̄ bat鼻著花芳 虛擬ê母國
到tann 民主海水ê滾蛟龍
絞過獨裁者手尾ê枯枝ta葉
受難者遺族轉型正義ê平反意志
Iáu tī lán日常ê大街小巷運動
伊ê苦難
見證異國他鄉台灣鄉親ê同胞情
見證海洋無分種族ê世界公民權
伊ê無私 無阻擋in翁婿kap阿兄
伊ê人道主義 協助世界女性hām in翁婿kap阿兄
伊是台灣ê黃晴美
也是世界ê Cecilia——『賽西利亞』
伊 kap漂浪他鄉ê女性
做伙行過男性ê戰爭 更加孤身行過
男性一世人m̄ bat行--過--ê 女性性命獨有ê戰爭
女性ê石磨仔心 hōo地球ē-tàng自轉
女性ê韌性 hōo地球ē-tàng公轉
（註：Cecilia是黃晴美ê英文名。Tsit首詩記念晴美姊，也向漂浪他鄉ê台灣女性行禮。）
