主講／郭鴻儀
記錄／吳宛霖
編按：本文是2021/2/18棲地復育台語講座「社子島ê特色」講座摘要記錄，講者郭鴻儀是蠻野心足生態協會ê專職律師。台灣蠻野心足生態協會舉辦ê「蠻野講堂」tuì 2019年3月份起kap李江却台語文教基金會合辦規劃有關生態環境議題ê台語講座，歡迎逐家tī逐個月第三禮拜四暗時7點到9點，同齊來「呷米共食廚房」（台北市中正區衡陽路9號3樓）擴展家己ê台語棲地（tshe-tē）！詳細資料ē-tàng看「台灣蠻野心足生態協會」FB專頁。
自從「柯P」提出開發社仔島（Siā-á-tó） tsiânn做台北市長選舉ê政見了後，社仔島就khah tsia̍p變做媒體關心ê對象，相關ê報導kap新聞自án-ne濟--來。M̄-koh，你若是有心想beh認bat真正ê社仔島，建議你代先去揣一張台北地圖來看，就ē-tàng了解——規个社仔島ê運命其實是hām水sio牽連，自古早到tann iáu是pué bē開、剝bē離。
社仔島狹狹ê地形bē輸是一隻鴨bî仔頭thîng-thîng，喙ǹg北ná beh衝破關渡門（Kan-tāu-mn̂g）飛向大海，淡水河kap基隆河流過伊ê喙pue、頭、頷頸。Tsit隻鴨ài耍水、ài食水，hōo社仔島一直是台北市ê淹水區——人市區iáu未淹，伊淹頭一个；人市區水退，suah退來伊tsia繼續siûnn-leh-leh；人市區leh發展，伊leh做菜園種菜飼逐家；人都市直直計畫，伊suah hông禁建m̄敢ke話；人講beh kā伊開發色情kiáu間，suah lóng無來問在地……。M̄-koh，tu風tsìnn水hām天地拚生活幾若代ê社仔人，在來就是堅強忍氣面對環境ê挑戰。今仔日ê講座，由郭鴻儀律師tshuā lán來了解社仔島ê濕地、生態、認bat社仔島ê塗味、人情kap文化。
社仔島本底是淡水河、基隆河ê水路，tī tsia kap流、mā tī tsia積táu沙塗，久年後變做大phiàn ê沙洲。豐富ê水源hām溪河帶--來ê鹽份kap有機質，hōo駁岸外大phiàn ê沙埔tsiânn做鹹koh滋養ê濕地：島頭濕地、社仔島濕地、社六濕地。人leh講「六月棉被揀人kah」，lán tsia-ê濕地就是án-ne，因為塗肉tài鹽，m̄是凊彩啥mih植物to ē-tàng來tsia生活，kan-ta水筆仔、菅芒tsit款ē堪得食重鹹--ê，tsiah有才調tī tsia生湠koh互相拚地盤。
Tsia ê沙埔、紅樹林、菅芒，tsiânn做濟濟毛蟹、花thiâu、水鳥kap真濟罕有iah是kiōng-beh絕種ê動物閃bih、歇睏、食si̍t ê樂園。另外，1970年有關單位kā社仔島尾 限定做農業用地hām綠地，禁止開發建設；tann，iáu一半khah ke ê土地是leh種作ê田園。Tsit个「台北上煞尾ê庄跤所在」，ná一塊大海綿吸收雨水來補添地下水，hōo水窟、圳溝thang淹田淹地，hōo草木、鳥仔、蛤仔、蟲thuā tī tsia生湠，tsiânn做一个豐富ê農業生態系統。
Mā是為著tse禁建50年，現代都會ê跤步hông擋tī社仔島外面。Tsia，無看著便利商店，無看著賣厝公司，無看著hia-ê lòng-lòng叫sì-kè走tsông無時停ê汽車，mā無看著hia-ê面色沉重，跤步tsiok緊、無時閒ê現代人。Tī社仔島，看--著--ê是以早ê庄頭文化，看--著--ê是傳統ê kám仔店，店口大人食茶配話，囡仔tī埕--裡放伴am-ko̍k雞，老人幼囝有人tàu看顧。另外宮廟、菜園邊ê寮仔、溪沙埔ê船屋（tsûn-ok），也是好厝邊做伙開講、食飯ê所在；菜蔬是各人家己栽，魚蟹是按水--裡來。
庄仔頭內ê傳統信仰大概有土地公、陰廟、宮廟三款。溪洲底五个庄頭 ，一个庄頭一sian土地公。元宵進前，五角頭開始踮戲台口輪流一日一棚歌仔戲。元宵暝，陣頭、庄內少年家tsiâu出動，五庄行透透「挵土地公」，beh用火炮kā iáu leh歇過年ê土地公挵精神，請伊守護溪岸bē流失，保庇地方bē淹水。Iáu有社仔íng過tiānn-tiānn ē去khioh著按水頭流--過-來ê水流屍，hông收埋起廟了後，流傳tsiok濟傳說，tsiânn做在地ê信仰。台灣leh痟『大家樂』ê年代，tsia-ê廟mā是鬧熱滾滾。另外其他ê宮廟有原本在地--ê，也有中、南部ê移民新起--ê，hōo社仔島ê信仰文化koh-khah豐富多元。
現此時ê社仔島內為著開發案來分做兩派，有人希望緊kā舊àu ê低厝仔改起做新式ê電梯大樓，有人希望開發ài繼續維持庄頭文化、信仰生活，mā ài顧著在地ê弱勢者。兩派堅持、地方分裂；社仔島ê未來，猶原tī bông霧中揣無路。
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
