Nî-hòe Jîn-seng
作者：陳雷
（本文是漢羅合用kap全羅馬字一段一段對照）
我講，年歲愈濟，人生ê滋味愈厚、愈甘，kám m̄是？最近kap阮牽--ê慶祝牽手50年，kám m̄是比20週年khah甘、khah甜，koh-khah有感受？當然人生有甘也有苦，親像失去親人ê苦。卻是年冬累積，苦--ê漸漸淡薄--去，賰甘味ê記持。有時，淡薄仔苦ē hō͘甜味koh-khah甜。我想，lán人本能ê生理（physiological）kap心理構造就是án-ne，追求歡喜快樂，phiah免苦thàng傷害。Che對lán人ê生存有利。
Góa kóng, nî-hòe jú chē, jîn-seng ê chu-bī jú kāu, jú kam, kám m̄ sī? Chòe-kīn kap goán khan--ê khèng-chiok khan-chhiú 50 nî, kám m̄ sī pí 20 chiu-nî khah kam, khah tiⁿ, koh-khah ū kám-siū? Tong-jiân jîn-seng ū kam iā ū khó͘, chhin-chhiūⁿ sit-khì chhin-lâng ê khó͘. Khiok-sī nî-tang lúi-chek, khó͘--ê chiām-chiām tām-po̍h--khì, chhun kam-bī ê kì-tî. Ū-sî, tām-po̍h-á khó͘ ē hō͘ tiⁿ-bī koh-khah tiⁿ. Góa siūⁿ, lán lâng pún-lêng ê seng-lí (physiological) kap sim-lí kò͘-chō tō sī án-ne, tui-kiû hoaⁿ-hí khoài-lo̍k, phiah-bián khó͘-thàng siong-hāi. Che tùi lán lâng ê seng-chûn iú-lī.
人講，年歲愈大，時間過了愈緊。確實有影。為啥mi̍h ē án-ne，我無答案。是m̄是年歲大--來，短期ê記憶漸漸退化。頂禮拜、頂個月發生ê代誌ē記--得--ê愈少，所以頭殼內感覺時間khah短，過了khah緊。
Lâng kóng, nî-hòe jú tōa, sî-kan kòe-liáu jú kín. Khak-si̍t ū-iáⁿ. Ūi-siáⁿ-mi̍h ē án-ne, góa bô tap-àn. Sī m̄ sī nî-hòe tōa--lâi, té-kî ê kì-ek chiām-chiām thè-hòa. Téng lé-pài, téng kò goe̍h hoat-seng ê tāi-chì ē kì--tit--ê jú chió, só͘-í thâu-khak lāi kám-kak sî-kan khah té, kòe-liáu khah kín.
Lán人老--來，自然身體各種功能漸漸老倒勼。皮膚jiâu--去、骨頭phàⁿ--去、khi̋n-ní-khuh pó͘--去、記持bái--去、行路慢--去……。不過，chia-ê變化lóng有伸勼ê韌性。比如老人行路慢--去，伊若逐日認真練行，就ē愈行愈緊；伊若規日坐椅，愈無行就愈bē行。Lán人所有生理ê功能lóng有chit款ê韌性，愈用就強、愈無用就弱，記持、腦力、體力、心理……種種方面。好比是你ē-tàng ke或者減生理ê年歲。我今年80歲，六冬前心臟病治療好了，繼續逐日走運動。兩冬前寒--人有一擺室外零下27 度，我走50分鐘。Che是自然賜lán身體ê韌性。
Lán lâng lāu--lâi, chū-jiân sin-thé kok-chióng kong-lêng chiām-chiām lāu-tò-kiu. Phôe-hu jiâu--khì, kut-thâu phàⁿ--khì, khi̋n-ní-khuh pó͘--khì, kì-tî bái--khì, kiâⁿ-lō͘ bān--khì.... Put-kò, chia-ê piàn-hòa lóng ū chhun-kiu ê jūn-sèng. Pí-jû lāu-lâng kiâⁿ-lō͘ bān--khì, i nā ta̍k-ji̍t jīn-chin liān kiâⁿ, tō ē jú kiâⁿ jú kín; i nā kui ji̍t chē í, jú bô kiâⁿ tō jú bē kiâⁿ. Lán lâng só͘-ū seng-lí ê kong-lêng lóng ū chit khoán ê jūn-sèng, jú iōng tō kiông, jú bô iōng tō jio̍k, kì-tî, náu-le̍k, thé-le̍k, sim-lí... chióng-chióng hong-bīn. Hó-pí sī lí ē-tàng ke he̍k-chiá kiám seng-lí ê nî-hòe. Góa kin-nî 80 hòe, 6 tang chêng sim-chōng-pēⁿ tī-liâu hó liáu, kè-sio̍k ta̍k-ji̍t cháu ūn-tōng. 2 tang chêng kôaⁿ--lâng ū 1 pái sek-gōa lêng-hā 27 tō͘, góa cháu 50 hun-cheng. Che sī chū-jiân sù lán sin-thé ê jūn-sèng.
少年朋友iáu m̄免考慮chia-ê問題。不過，我真有信心kā lín先講，確實lín老--來iáu ē-tàng有活力ê身體、甘味ê人生，m̄-kú che需要地球ê大環境安定，無，真緊變真bái--去。
Siàu-liân pêng-iú iáu m̄ bián khó-lū chia-ê būn-tê. Put-kò, góa chin ū sìn-sim kā lín seng kóng, khak-si̍t lín lāu--lâi ē-tàng ū oa̍h-le̍k ê sin-thé, kam-bī ê jîn-seng, m̄-kú che su-iàu tē-kiû ê tōa khoân-kéng an-tēng, bô, chin kín piàn chin bái--khì.
