阿姊玖芎：學語言ê原因是有感情--無
我家己原底是排斥學台語，我一直leh想學台語ê好處是啥，學英語ē-sái看濟濟ê資料kap讀足足ê冊，學台語kám有任何ê好處？除了感情ê功能以外，就無--ah，我kan-ta聽著台語歌ê時，ē感覺特別感心niā-niā。
五年前我去Turkey（編按：土耳其）讀大學了後，小弟開始全講台語，我iáu是小可講台語、tiānn-tiānn華語應--伊，hit時伊無對我有tsiok濟台語ê影響。我直直想講台語無重要，以後有閒tsiah學就好。2020年，大學四年準備期末考ê時，tsiok思念台灣，就算我考煞，厝內mā無錢hōo我tńg--去。Tī-leh讀上討厭ê古典文學ê時，我決心開始學羅馬字。若beh讀有Osman時期ê古典文學，一定ài學阿拉伯文kap波斯文（Osman文混合土耳其文、阿拉伯文kap波斯文），m̄-koh我對tsit兩種語言全無興趣，親像鴨仔聽雷。Tsia一世人lóng bē用著古語，心情tsìn煩。貧惰讀冊看Plurk放空，看著有人分享半點鐘就thang學ē-hiáu羅馬字ê教學。
我雄雄看破，學語言ê原因m̄是kám有路用，重點是有感情--無？
Turkey ê人tiānn-tiānn用土耳其語kā我欺負，看我是外國人就bē爽，hōo我講土耳其語ê時感覺tsiok tu̍h-lān。M̄管我按怎hē性命學（正經是hē性命學，來土耳其第一年就有IS（編按：伊斯蘭國）恐怖攻擊，我永遠是臭賤ê外國人，永遠無可能是Turkey ê家己人。
仝學期我有上Turkey國民文學ê課，為啥mi̍h Turkey ē-tàng tī Osman帝國，uì濟濟人種花lok-lok ê認同行向Turkey認同，成功tsiânn做共和國？In推廣ài講土耳其語，mài koh寫摻阿拉伯文kap波斯文ê外國語，he是kan-na貴族leh寫ê書面語，應該ài寫逐家日常leh講ê土耳其語，ài講土耳其語tsiah是Turkey人。
Koh-khah悲哀--ê是，我ē-hiáu講Turkey人in ê母語，m̄-koh我無熟sāi家己ê母語。我是受中華民國教育影響，bē-hiáu講家己母語、bē-hiáu寫家己母語，母語喙舌hōo國民黨割走ê台灣人。台灣人bē-tàng kā家己ê本土語言講hōo好勢，通世界kan-na殖民地有tsit款現象。Tse就是台灣人hōo人蹧躂ê憑據。
我講台語，我是台灣人。我ǹg望台灣人koh ē-tàng kā hōo人割走ê本土語言喙舌接--tńg-來。M̄-thang bē記得家己ê本，若án-ne，gún就啥mih人lóng m̄是--ah。
小弟Chùn Siâng：Uì知影台灣人hōo人蹧躂開始
第一，是uì知影台灣人hōo人蹧躂開始；第二，是反課綱ê有志，tī通訊軟體內底寫白話字，我看無，tsiah hōo我知影原來台語ē-tàng寫。當時我就知影《台文通訊BONG報》--ah，我看無，m̄-koh我ē kā《台文通訊BONG報》提去學校囥--leh，ǹg望有人看有提來讀。了後beh tsiūnn大學ê hit-tsūn，有參加台灣家庭ê分享會，分享beh按怎用台語tshuā囡仔，我tsiah知影hit-tsūn 9--月台北有beh開台文讀寫班，hit班號做「基進會輾轉讀寫班」，上課ê所在是tī善導寺捷運站附近ê台灣獨立建國聯盟，我kā阿母講我想beh上課，阿母就kā我tàu納三千箍。
一禮拜一節，逐禮拜二七點半上到九點半，所以hit-tsūn就是逐禮拜lóng ài tī輔仁大學坐車坐到善導寺，是講hit-tsūn mā tiānn-tiānn坐到台北市區聽講座、參加活動。就是uì hit-tsūn開始，買mi̍h件ê時ē講台語，m̄-koh hit時iáu無勇氣tī學校講全台語，是沓沓仔轉做全台語--ê——beh學做台灣人（m̄是「ㄊㄞˊ ㄨㄢ ㄖㄣˊ」），suah tio̍h-ài án-ne。
為啥mi̍h ài講台語？就是beh做台灣人tsiah講台語。Tsit-má母語無法度tī厝內學，ài去學校hōo人教；中國語tsiah是厝內thang學--ê，學校免教。
我看若是無意識著beh做台灣人，是無法度行kah gún tsit-má án-ne。無，是beh按怎反抗tsit个中國語霸權ê社會、走揣台灣國民（Nation）ê有志？
我有teh想「台灣人」ê概念是按怎出--來--ê，我明明就是受中華民國教育，國校仔先生真自然leh講中國黃帝5,000年典故啥貨--ê，為啥mi̍h我上尾ē選台灣，tse mā是kap家庭有關係。細漢ê時hōo阿公阿媽tshuā，in有leh講台語，有kā我保護，橫直ài認同一个mi̍h件，就親像bàng-gà《魔法少女まどか☆マギカ》內底，焰（ほむら）真自然受著圓（まどか）ê照顧，焰mā想beh保護圓tńg--去，就算伊ài tī一kái koh一kái殘酷ê事實中走揣hit个唯一ê出路。既然我囡仔時有受著台灣ê保護，大漢mā想beh kā台灣保護，tse就是為啥mi̍h台灣認同ē戰贏中國ê原因。
Tse hōo我想著我高中ê朋友，in老爸台灣人、老母韓國人，in老爸ē『家暴』。我bat想講伊kám ē感覺台灣人無好、對台語有反感，就是講伊無受著台灣ê保護，雖bóng後--來伊是講「無--lah！」，m̄-koh就伊tsit-má ê環境、生活來看，台語就是學bē起--來。我mā是有拄著中國家庭ê人，二九暝ē食水餃--ê hit種，伊若有心，我mā是ē用lán有法度溝通ê方式去講話。
論真，我tī學校kap外口講台語，十个人有九个人聽有，賰ê hit个人是伊beh kā你揣麻煩，無代表伊聽無。我是無相信真正有人聽無，橫直聽無就講英語--ah。你有leh講就ē有改變，人若有反應，我ē特別強調ài ē-hiáu寫台文，hōo in看《台文通訊BONG報》，m̄是kan-na去走社運、參加活動tsiah tī hia講台灣ài獨立建國，做台灣人是生活中就thang實踐——講台語、看台文，tse是上基本mā是上要緊ê代誌。
#海外台文專欄，本文使用教育部推薦漢字kap臺灣閩南語羅馬字拼音方案。
台文通訊BONG報315期，2020年6月出刊。
--------------------------------------------
歡迎捐款贊助 李江却台語文教基金會 （捐款thang抵稅，匯款了後請通知02-23112199）
線上捐款(定期定額) https://ppt.cc/fF5bhx
線上捐款(單筆) https://ppt.cc/fcycox
郵政劃撥：19021486
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
