作者：陳霈璟
「一時失志m̄免怨嘆，一時落魄m̄免膽寒」——tse是阮自細漢到tann tiānn-tiānn聽--著ê歌詞，kā阮講人生ê智慧、面對代誌ê態度，「免怨嘆」tsit三字阮阿媽不管時tī阮考試不如意ê時，mā lóng ē án-ne hām阮講。
確實，阮mā有tsit款經驗hām體會，tī十外冬ê校園生活當中，老師mā lóng tī阮ê耳空邊leh講tsia-ê道理。一个人ê天份koh-khah按怎kuân，若無認真、正向ê態度，án-ne就算真正有成功ê機會，mā ē hām機會sio閃身。細漢ê時tsūn聽「兔仔hām龜走sio-jiok」ê故事，逐家lóng感覺兔仔ê速度hiah緊，定著ē提冠軍，suah想bē到伊半路歇睏ê時hōo龜jiok--過，「冠軍」ê名號去hōo對手提--去。Tsit个故事內底ê龜就是講「態度決定一个人ê kuân度」上好ê例，雖然龜生成走khah慢、速度無thang hām兔仔sio比phīng，m̄-koh伊骨力、m̄願放棄ê精神，hōo伊徛tī頒獎台，改變別人對伊外表ê成見。
啊若講阮家己--leh，高中hit-tsūn，我bat參加朗讀比賽，頭一擺參加ê時，我真有自信，感覺家己一定就是冠軍、免啥準備，結果表現無好，kan-na提著第三名。第二擺原底無想beh參加，m̄-koh老師一直kā我koo-tsiânn，hit擺我就kā當做是上尾一擺來挑戰家己，因為án-ne ke tsiok認真leh準備，得著第一名ê成績。比賽結束了後，老師kā阮講：「你有啥mih款ê態度，就有啥mih款ê人生。」tse kā阮提醒做任何代誌，上重要--ê是態度，若無khah認真--leh，別人一下看就ē感覺tsit个人tsiânn凊彩。做一个認真ê人，就算是代誌結果不如意，阮想，若有影án-ne lán 趁--著--ê mā ē是「人情義理」，lán去尊重別人，別人mā ē kā lán尊重。
Tsit站仔tann仔結束ê奧運mā kā lán講態度ê重要性，hōo我印象上深--ê是lán ê羽毛球選手——戴資穎。今年ê奧運是伊人生上尾擺做選手、全台灣ê人民lóng tsiok期待伊kā金牌提倒tńg- -來，m̄-koh伊tī頭前ê比賽就輸hōo泰國ê選手--ah！知影tsit个消息，有真濟人tī網路kā戴資穎加油，感謝伊ê付出，阮mā是其中一个起去kā加油--ê！進前bat是世界排名第一ê伊，猶原照起工逐工訓練，受傷mā leh練習，hōo人看著tsiok m̄甘！Koh-khah重要--ê是伊做人謙虛，bē因為伊ê成就就看別人無，我想伊mā是「態度決定kuân度」一个真好ê例。
「照起工」tsit句話mā出現tī葉啟田老師hit條〈愛拚才會贏〉，tsit个詞無hiah歹理解，mā無hiah困難，就是kā lán講面對人生逐項代誌，lán若逐項代誌lóng「照起工」，án-ne就是行向「贏」上好ê一步。一份簡單ê作業，若是願意hē心神去做，就有提100分ê可能，mā ē-tàng hōo老師對lán有koh-khah好ê印象，家己tī做作業ê過程mā ē-tàng學著koh-khah濟ê智識、道理，提升家己各方面ê能力。我mā希望家己m̄-nā ē-tàng知影「態度，決定一个人ê kuân度」tsit个道理，mā beh tī未來，做逐項代誌lóng kā家己講ài tsiânn做一个認真、頂真ê人。
