作者：黃偉嘉
新北市三重埔，有一个頂港kài有名聲ê地號名「豆干厝」，tsit个名是按怎來--ê neh？有人解sueh是íng過tī忠孝橋跤有幾若間豆腐工廠，也有人講是hia ê矮厝仔形ná像豆乾，tsiah án-ne生。
Beh確定一个地號名ê來源，上好ê辦法就是tuì舊冊、舊地圖內底揣以前ê人是按怎寫。若是看1904年日本人畫ê地圖《臺灣堡圖》，ē-tàng看著當初tī tsit tah標--ê是「同安厝」。「同安厝」、「豆干厝」，kám有關係？
同安原底是中國泉州府所管ê一个縣，讀做Tâng-uann。金門島khah早也是hōo同安縣leh管，當地就有一句話，號做『無金不成同』。Tuì án-ne看，「同安厝」意思當然就是tuì同安來ê移民所起ê厝。但是時間一久，無定「同安」漸漸仔走音--去，就變做「豆乾（tāu-kuann）」。其實「同安」ê走音，tī其他縣市也看ē著：比如講台南佳里ê「東官寮（Tang-kuann-liâu）」，屏東萬丹也有一个「廣安（Kóng-kuann）」，lóng是tuì「同安」來--ê。你kám知影iáu有佗位有--leh？
（作者是「地圖與多媒體研究室」研究員）
編按：漢羅用字有調整，原文是全漢。全漢版ē囥tī雜誌網站，hōo讀者做參考、對照。
專欄簡介：有人講「台語無字」。事實上台語一直lóng有字，自以早就用漢字來寫lán ê地號名。但是因為借字、借音、走音、腔口差、連音等等各種ê變化，一寡地號名suah hām漢字鬥bē起--來。若到一个生份ê所在，tiānn-tiānn是一開喙讀地號名，就hông隨知影是外地人。台大地理系「地圖與多媒體研究室」一直以來，投入地圖製作、地理教育、地名研究。Tuì 2019年開始，執行教育部「以本土語言標注臺灣地名計畫」，成果已經用tī改善台鐵、捷運ê放送。Tuì tsit月日開始，「地圖與多媒體研究室」逐個月ē tuì台語ê角度，tī雜誌介紹一个地號名，後擺若是坐車、駛車經過，拄好tn̄g--著，一定ē koh-khah疼惜lán tsit塊土地ê大細項代誌！
以本土語言標注臺灣地名計畫 https://reurl.cc/XjozaR
---------------------
全漢版
新北市三重埔，有一个頂港蓋有名聲的地號名「豆干厝」，這个名是按怎來的呢？有人解說是往過佇忠孝橋跤有幾偌間豆腐工廠，也有人講是遐的矮厝仔形若像豆干，才按呢生。
欲確定一个地號名的來源，上好的辦法就是對舊冊、舊地圖內底揣以前的人是按怎寫。若是看1904年日本人畫的地圖《臺灣堡圖》，會當看著當初佇這搭標的是「同安厝」。「同安厝」、「豆干厝」，敢有關係？
同安原底是中國泉州府所管的一个縣，讀做Tâng-uann。金門島較早也是予同安縣咧管，當地就有一句話，號做『無金不成同』。對按呢看，「同安厝」意思當然就是對同安來的移民所起的厝。但是時間一久，無定「同安」漸漸仔走音去，就變做「豆乾（tāu-kuann）」。其實「同安」的走音，佇其他縣市也看會著：比如講臺南佳里的「東官寮（Tang-kuann-liâu）」，屏東萬丹也有一个「廣安（Kóng-kuann）」，攏是對「同安」來的。你敢知影猶有佗位有咧？
---------------------
