拚出台灣語言文化ê新時代
——祝賀李江却台語文教基金會創會30冬
/ 向陽
國立台北教育大學台文所名譽教授
李江却台語文教基金會自1996年創會，到tann已經beh 30冬，tī tsiah-nī仔久長ê歲月當中，基金會做bē少代誌，就ná像創會宗旨所講--ê仝款，向「恢復台灣各族群語言ê性命；提倡發展台灣各族群母語文學kah文化」ê目標，做出tsiânn大ê貢獻，受lán台灣社會ê注目kah敬重。
Tī基金會所做ê濟濟事工內底，做上久mā有上大影響--ê，應該是《台文通訊BONG報》ê出刊。《台文通訊BONG報》ê前身是《台文通訊》kah《台文BONG報》，合刊了後ê《台文通訊BONG報》，將兩本雜誌ê歷史kah深度表現kah tsiânn澈底。自原初ê發行人兼總編輯鄭良光，到現此時ê總編輯陳豐惠，tsit本雜誌已經tsiânn做海內外台語文學運動重要ê刊物，m̄-nā提供台語文學作家創作ê舞台，mā累積tsiânn濟台語ê語料。
除了《台文通訊BONG報》以外，李江却台語文教基金會tsit 30冬來，iáu有舉辦「阿却賞」，鼓勵台語文學kah繪本創作，提拔新一代ê作家，用母語來創造新時代ê台灣圖像，出版ê冊lóng tsiânn受歡迎，特別是台語繪本， koh透過故事劇場tī全國各地搬演，影響tsiânn深mā tsiânn強。
Tī社會教育ê層面，李江却台語文教基金會tiānn-tiānn舉辦各種講座，親像「世界母語日」活動、「基北北桃台語家庭意識培力講座」、「台語sa攏有講座」、「轉型正義kap不當黨產台語講座」等等，促進社會各行業用台語來討論公共事務；tī台語傳播ê層面，製作民視台灣學堂「講台語當著時」kah「台語講世事」節目將近200集，協助公視台語台新聞kah部份節目，提供大量文本參與台語語料庫計畫，協助提升各種影戲台語品質等等，lóng是ē-tàng引tshuā台語kah時代、社會對話ê重要實踐。
Tī國家語言政策ê層面，李江却台語文教基金會ê拍拚mā tsiânn認真。近10冬來，基金會kah其他有志單位共同催生《國家語言發展法》、公視台語台；kā監察院陳情，糾正違法ê「獨尊華語政策」；遊說中央政府kah地方政府成立台語專責單位等等，理念清楚，事工明確，結果mā tsiânn正面。
越頭看，30年一目nih仔就過，m̄-koh李江却台語文教基金會ê貢獻，lán逐家lóng看ē著。30冬來，李江却台語文教基金會用tsiânn有限ê資源，做上kài有力ê規畫kah上kài實際ê行動，為lán台灣語文生湠出一幅美麗ê圖像：釘根tī台灣土地ê樹頭，開出黃gìm-gìm ê花蕊kah果子。Ǹg望koh來30冬，李江却台語文教基金會繼續引tshuā台灣社會，講台灣ê話、寫台灣ê文、畫台灣ê圖、唱台灣ê歌、做台灣ê戲，拚出台灣語言文化ê新時代。
Tī基金會所做ê濟濟事工內底，做上久mā有上大影響--ê，應該是《台文通訊BONG報》ê出刊。《台文通訊BONG報》ê前身是《台文通訊》kah《台文BONG報》，合刊了後ê《台文通訊BONG報》，將兩本雜誌ê歷史kah深度表現kah tsiânn澈底。自原初ê發行人兼總編輯鄭良光，到現此時ê總編輯陳豐惠，tsit本雜誌已經tsiânn做海內外台語文學運動重要ê刊物，m̄-nā提供台語文學作家創作ê舞台，mā累積tsiânn濟台語ê語料。
除了《台文通訊BONG報》以外，李江却台語文教基金會tsit 30冬來，iáu有舉辦「阿却賞」，鼓勵台語文學kah繪本創作，提拔新一代ê作家，用母語來創造新時代ê台灣圖像，出版ê冊lóng tsiânn受歡迎，特別是台語繪本， koh透過故事劇場tī全國各地搬演，影響tsiânn深mā tsiânn強。
Tī社會教育ê層面，李江却台語文教基金會tiānn-tiānn舉辦各種講座，親像「世界母語日」活動、「基北北桃台語家庭意識培力講座」、「台語sa攏有講座」、「轉型正義kap不當黨產台語講座」等等，促進社會各行業用台語來討論公共事務；tī台語傳播ê層面，製作民視台灣學堂「講台語當著時」kah「台語講世事」節目將近200集，協助公視台語台新聞kah部份節目，提供大量文本參與台語語料庫計畫，協助提升各種影戲台語品質等等，lóng是ē-tàng引tshuā台語kah時代、社會對話ê重要實踐。
Tī國家語言政策ê層面，李江却台語文教基金會ê拍拚mā tsiânn認真。近10冬來，基金會kah其他有志單位共同催生《國家語言發展法》、公視台語台；kā監察院陳情，糾正違法ê「獨尊華語政策」；遊說中央政府kah地方政府成立台語專責單位等等，理念清楚，事工明確，結果mā tsiânn正面。
越頭看，30年一目nih仔就過，m̄-koh李江却台語文教基金會ê貢獻，lán逐家lóng看ē著。30冬來，李江却台語文教基金會用tsiânn有限ê資源，做上kài有力ê規畫kah上kài實際ê行動，為lán台灣語文生湠出一幅美麗ê圖像：釘根tī台灣土地ê樹頭，開出黃gìm-gìm ê花蕊kah果子。Ǹg望koh來30冬，李江却台語文教基金會繼續引tshuā台灣社會，講台灣ê話、寫台灣ê文、畫台灣ê圖、唱台灣ê歌、做台灣ê戲，拚出台灣語言文化ê新時代。
