享受炒露螺肉
/ 張寶明
Íng-tang-tsūn就記tī頭殼--ê永遠lóng ē記--得，年久月深koh不時ē浮出來liū。
拜五下晡問五年仔ê學生囡仔啥mi̍h是「露螺」，suah無人知，我驚一tiô！只好隨查「牛姑」放圖hōo in看，一下看--著，tsia-ê食飯khann中ng--ê隨齊聲huah：「Őo……」，我是氣kah tio̍h內傷。
「大粒--ê是非洲種ê露螺，細粒扁扁--ê ná大頭拇tsíng甲大--ê一sì-kè lóng有，細粒--ê koh有幾若種--neh！」我koh繼續講：「佗一種有人leh食？」Tsit聲有人回--ah：「非洲種--ê。」我tuè leh問：「有人食--過--無？Tī海產擔有tè食。」竟然無人食--過。時代改變，食si̍t mā tuè leh改變，免tio̍h驚、免要意。Kah in ê對話就到tsia，點--著就好。
喙講免掛意，心肝頭suah貼tiâu-tiâu。隔工歇睏透早去菜市仔買菜，踮賣sa̍h丁香仔kah小管仔ê擔仔看著一kám仔露螺肉，hit-tang-tsūn hit个食炒露螺肉ê影像kah滋味，隨tī頭殼--裡跳--出-來，kám是因為昨hng去hōo學生囡仔gi̍k--著ê因端，tsiah ē出現「大腹肚效應」？菜市仔tsiah ē一sì-kè lóng看著賣露螺肉--ê。
「頭家娘秤一斤。」
「頭--ê，你目睭利。阮tse宜蘭來--ê，上清氣。」
「有影tsiah thang講！」
「食著無滿意，來退錢。頭--ê，一斤二仔五。上幼ê九層塔送--你。」
「Ē-sái kah一kue̍h薑--無？」
「Hōo你一大kue̍h，thiap十箍好--無？」
「Nóo-phu-lá-bū-lùn！好！頭家娘來，十箍hōo--你。」
紅直tsuā花草ê塑膠袋仔kuānn--tńg-來，kā露螺肉倒落去洗菜盆仔，大細粒無平大，管待--伊。四湯匙仔鹽khat--落-去，用手tsíng頭仔kā jio̍k-jio̍k--leh。兩遍水tn̄g hōo清氣。揀大粒--ê kā切做爿。Kā切幼ê薑、蒜頭、蔥仔kah hiam椒仔囥砧頂。臨時去想著若lām玉蔥切絲落去炒，應該有別種ê口味kah口感，「熱炒店」kám m̄是逐項菜uân-á ē炒玉蔥？
炒露螺肉ài大火熱鼎tsiah ē脆，若無，食著爛爛是bē孝孤--得--ê。隨就熱鼎斟麻油hōo熱，薑piak hōo beh-ta-beh-ta，蒜頭khiàn hōo出味，露螺肉囥落去炒，豆油tshìng--落-去，lām鹹tsiánn，sám胡椒，炒出芳味、ta水ta水，摻九層塔、hiam椒仔kah蔥仔珠puān hōo tsiâu，就thang好起鼎享受--looh！
用阮兜上大塊ê phiat仔té kah beh尖--起-來，看著phiat仔tshìng--出-來ê白煙，koh鼻著芳味，喙瀾是吞bē離。規phiat hē tī灶頭，無khà洗鼎、攑箸，隨liam一塊that入喙。鹹甜鹹甜tī我ê舌頂面湠--開，tsô料ê芳khuì對鼻仔鑽--入-去，hōo大腦下命令，ài喙瀾tsuh出來lām，喙齒哺lueh到tè，有汁koh脆kha̍unnh-kha̍unnh ê口感是一等一--ê。M̄信，無，你炒一盤仔來食看--leh。
Lín決定ē臆我ē去kuānn一罐仔麥仔酒來配，tio̍h--無？失禮真歹勢，我tsit斗beh來一斗kah人全然無仝ê做法，我tī冰箱khe̍h一罐意大利紅酒——tī Costco買ê一罐超CP值299箍ê紅酒。強烈本土印象ê炒露螺肉配外國紅酒，tsiah-nī台客su-tài-luh ê怪奇作風，定著是無beh hōo刻板觀念束縛ê人tsiah做ē出--來--ê。
配--起-來口味按怎？你kám tio̍h問？Tsit肢--ê--lah！我真有自信，就án-ne kā tām-sám--落-去，沓沓仔哺、慢慢仔tam，聊聊仔享受，tse就是我享受人生ê手路。
Iân-nā si̍p、iân-nā哺，iân-nā沉入回憶ê世界，像炒露螺肉tsit-lō mih仔上有路用。慢活koh再慢活，回憶koh再回憶。高中hit陣褪褲lān做伙大漢ê朋友，拍籃球煞騎跤踏車來戲園門口，食阿婆ê炒露螺肉kah臭豆腐、配冬瓜茶ê影像tī心--裡leh走；tī高雄上班hit兩年十個月匪類生活做陣ê酒伴，未tsîng下班就tī麥仔酒屋起酒痟，酒配定著有炒露螺肉tsit出--ê。
Tsit款記持tsiah-nī仔深刻、tsiah-nī仔清楚，莫怪tī我洗跤洗手離開業務ê江湖hiah-nī久--ah，身心經歷--ê猶原剝卸bē離。Tsit久kan-na一个人用tsit-lō mih仔來回想hit久hit个滋味，應該是上kài讚ê方式。
拜五下晡問五年仔ê學生囡仔啥mi̍h是「露螺」，suah無人知，我驚一tiô！只好隨查「牛姑」放圖hōo in看，一下看--著，tsia-ê食飯khann中ng--ê隨齊聲huah：「Őo……」，我是氣kah tio̍h內傷。
「大粒--ê是非洲種ê露螺，細粒扁扁--ê ná大頭拇tsíng甲大--ê一sì-kè lóng有，細粒--ê koh有幾若種--neh！」我koh繼續講：「佗一種有人leh食？」Tsit聲有人回--ah：「非洲種--ê。」我tuè leh問：「有人食--過--無？Tī海產擔有tè食。」竟然無人食--過。時代改變，食si̍t mā tuè leh改變，免tio̍h驚、免要意。Kah in ê對話就到tsia，點--著就好。
喙講免掛意，心肝頭suah貼tiâu-tiâu。隔工歇睏透早去菜市仔買菜，踮賣sa̍h丁香仔kah小管仔ê擔仔看著一kám仔露螺肉，hit-tang-tsūn hit个食炒露螺肉ê影像kah滋味，隨tī頭殼--裡跳--出-來，kám是因為昨hng去hōo學生囡仔gi̍k--著ê因端，tsiah ē出現「大腹肚效應」？菜市仔tsiah ē一sì-kè lóng看著賣露螺肉--ê。
「頭家娘秤一斤。」
「頭--ê，你目睭利。阮tse宜蘭來--ê，上清氣。」
「有影tsiah thang講！」
「食著無滿意，來退錢。頭--ê，一斤二仔五。上幼ê九層塔送--你。」
「Ē-sái kah一kue̍h薑--無？」
「Hōo你一大kue̍h，thiap十箍好--無？」
「Nóo-phu-lá-bū-lùn！好！頭家娘來，十箍hōo--你。」
紅直tsuā花草ê塑膠袋仔kuānn--tńg-來，kā露螺肉倒落去洗菜盆仔，大細粒無平大，管待--伊。四湯匙仔鹽khat--落-去，用手tsíng頭仔kā jio̍k-jio̍k--leh。兩遍水tn̄g hōo清氣。揀大粒--ê kā切做爿。Kā切幼ê薑、蒜頭、蔥仔kah hiam椒仔囥砧頂。臨時去想著若lām玉蔥切絲落去炒，應該有別種ê口味kah口感，「熱炒店」kám m̄是逐項菜uân-á ē炒玉蔥？
炒露螺肉ài大火熱鼎tsiah ē脆，若無，食著爛爛是bē孝孤--得--ê。隨就熱鼎斟麻油hōo熱，薑piak hōo beh-ta-beh-ta，蒜頭khiàn hōo出味，露螺肉囥落去炒，豆油tshìng--落-去，lām鹹tsiánn，sám胡椒，炒出芳味、ta水ta水，摻九層塔、hiam椒仔kah蔥仔珠puān hōo tsiâu，就thang好起鼎享受--looh！
用阮兜上大塊ê phiat仔té kah beh尖--起-來，看著phiat仔tshìng--出-來ê白煙，koh鼻著芳味，喙瀾是吞bē離。規phiat hē tī灶頭，無khà洗鼎、攑箸，隨liam一塊that入喙。鹹甜鹹甜tī我ê舌頂面湠--開，tsô料ê芳khuì對鼻仔鑽--入-去，hōo大腦下命令，ài喙瀾tsuh出來lām，喙齒哺lueh到tè，有汁koh脆kha̍unnh-kha̍unnh ê口感是一等一--ê。M̄信，無，你炒一盤仔來食看--leh。
Lín決定ē臆我ē去kuānn一罐仔麥仔酒來配，tio̍h--無？失禮真歹勢，我tsit斗beh來一斗kah人全然無仝ê做法，我tī冰箱khe̍h一罐意大利紅酒——tī Costco買ê一罐超CP值299箍ê紅酒。強烈本土印象ê炒露螺肉配外國紅酒，tsiah-nī台客su-tài-luh ê怪奇作風，定著是無beh hōo刻板觀念束縛ê人tsiah做ē出--來--ê。
配--起-來口味按怎？你kám tio̍h問？Tsit肢--ê--lah！我真有自信，就án-ne kā tām-sám--落-去，沓沓仔哺、慢慢仔tam，聊聊仔享受，tse就是我享受人生ê手路。
Iân-nā si̍p、iân-nā哺，iân-nā沉入回憶ê世界，像炒露螺肉tsit-lō mih仔上有路用。慢活koh再慢活，回憶koh再回憶。高中hit陣褪褲lān做伙大漢ê朋友，拍籃球煞騎跤踏車來戲園門口，食阿婆ê炒露螺肉kah臭豆腐、配冬瓜茶ê影像tī心--裡leh走；tī高雄上班hit兩年十個月匪類生活做陣ê酒伴，未tsîng下班就tī麥仔酒屋起酒痟，酒配定著有炒露螺肉tsit出--ê。
Tsit款記持tsiah-nī仔深刻、tsiah-nī仔清楚，莫怪tī我洗跤洗手離開業務ê江湖hiah-nī久--ah，身心經歷--ê猶原剝卸bē離。Tsit久kan-na一个人用tsit-lō mih仔來回想hit久hit个滋味，應該是上kài讚ê方式。
