作者：張日東
有一擺朋友用khe-tsí-pang ê紙牌仔表演一个真趣味ê魔術，拄開始我sa無tsáng頭，感覺tsiok好玄，m̄知伊是按怎變--ê，哪ē tsiah厲害！頭起先伊先kā十張紙牌仔囥tī桌頂，排一列khàm--著。Tsit-tsūn伊對觀眾講：「Lín ē-tàng kā牌仔tuì lín ê倒手爿徙去正手爿，一擺beh徙幾張lóng據在--lín，徙好了後，仝款照一列排好勢。」講煞，伊就越頭se̍h去後壁，看bē著觀眾到底徙幾張牌仔，等觀眾徙好了後，伊tsiah se̍h--tńg-來，tī十張牌仔內底，掀一張起來hōo逐家看，牌仔ê點數，竟然就是tú-tsiah觀眾徙ê張數，譬論講掀--開ê牌仔是三點，án-ne觀眾就是徙三張。有人m̄信siànn，要求koh徙幾擺仔，結果逐擺mā是講kah tio̍h-tio̍h-tio̍h，真正siànn kah ē食糕仔。
人講「江湖一點訣，講破值無三个錢」。我tsit个朋友人kài好，tsiânn a-sá-lih，直接就教--我，伊開破講：「先kā十張牌仔照一到十點數ê順序，tuì正手爿起，kā排一列，khàm--著。頭擺觀眾kā牌仔徙好了後，掀倒手爿第一張來看，看點數是偌濟，就是觀眾徙tín動ê張數。好酒沉甕底，精彩ê齣頭tī後壁，mê角就是後táu beh掀佗一張，tio̍h-ài kā前táu ê點數kap倒手爿算--來第幾張ê位數kā加--起-來，看是偌濟，就是lán beh掀ê hit張。譬論講，頭擺觀眾徙三張，lán tuì倒手爿第一張kā掀--起-來，三加一就是四，án-ne第二táu tio̍h-ài去掀倒手爿算--來第四張，tsit張ê點數就是第二táu徙tín動ê張數。」
我照朋友教--我ê方法去試看māi，逐táu to準準準。Tsit个心適ê魔術，上厲害ê所在是m̄管後一táu觀眾徙幾張，lán tī頂一táu就thang推算--著--ah，有享受著hit種未卜先知ê快樂。啊若beh講著tsit个把戲ê原理，我看，tio̍h留hōo讀者沓沓仔去研究，增加一寡生活ê趣味。
逐家來phò-tāu專欄，本文使用教育部推薦漢字kap臺灣閩南語羅馬字拼音方案。
台文通訊BONG報301期，2019年4月出刊。
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
