Lán來講看māi - 三種台語拼音書寫系統

 

《三種台語拼音書寫系統

—臺羅、白話字、方音符號kah國際音標ê對照》

/Ia̍p Khái-sîng


    







前言
白話字（Pe̍h-ōe-jī，POJ），mā稱做「教會羅馬字」（簡稱「教羅」）1，是一種tī 19世紀，基督教ê傳教士用羅馬字所設計來拼寫福建話（閩南語）2 ê文字，tī泉州、漳州、廈門、台灣、東南亞等所在，lóng有發展白話字ê歷史。Tī台灣，二戰進前就已經用白話字出版tsiânn濟ê報紙kah書冊，比論講1885年創刊ê《台灣府城教會報》（TÂI-OÂN-HÚ-SIÂᴺ KÀU-HŌE-PÒ）、1916年出版ê《新約》（SIN IOK，巴克禮譯本）等等，lóng是用白話字寫--ê。

M̄-koh，tī二戰期間，因為日本帝國ê台灣總督府加強對「國語（日本話）運動」ê推行，台灣話受著官方ê壓迫，白話字mā tè leh hōo政府打壓。戰爭結束了後，中國ê國民政府來到台灣，mā leh推行「國語（華語）運動」，若無講中華民國國語，甚至ē hōo政府罰錢、掛狗牌仔，白話字也sâng款hōo政府禁止，連用白話字出版ê《聖經》to hōo警察取締。因為hit幾十年來，兩个政府ê言語政策所造成ê傷害，所有ê台灣本土言語lóng有tsiânn嚴重ê文化危機。

現此時大部份ê台灣人lóng pat注音符號，tse是國民政府ê「國語政策」採用注音符號來做拼音教學所致。注音符號本底就是uì漢字簡省--來--ê，ē-tàng適應漢字ê書寫方式kah習慣，所以親像吳守禮教授kah楊青矗先生，in lóng使用kah注音符號khah成ê「臺灣方音符號系統」3來為台語注音（m̄-koh無完全按照教育部制定ê標準）4。

雖然方音符號mā有經過教育部來公佈，總--是tsit套系統khîng實無講kài普遍。後--來，教育部用白話字kah「台灣語言音標方案」（Taiwan Language Phonetic Alphabet，TLPA）5做基礎，制定一種ē-tàng用來拼音ê文字系統——「臺灣台語羅馬字拼音方案」6
（簡稱「臺羅」），並且出版《臺灣台語羅馬字拼音方案使用手冊》（以下簡稱《臺羅手冊》），宣佈台語教材ê拼音系統應該ài使用臺羅來拼寫。

頂面所講ê「白話字」、「方音符號」、「臺羅」，in參國際音標（IPA）7ê對應關係，後面ē用表來對照，並且說明。

1 編註：有ê白話字使用者無認同tsit个稱呼。
2 編註：有關語言名稱，「閩南語」是學術上針對泉州、漳州、廈門、台灣、東南亞在地講--ê、一定程度互通ê語言ê統稱，m̄-koh各地對家己語言ê自稱無啥仝款，東南亞主要使用「福建話」，台灣有「台灣話」、「台語」等稱呼。目前台灣除了《十二年國教課程綱要》使用「閩南語」，官方書面原則上使用「臺灣台語」。
3 教育部tī 1998年1月12公佈。
4 編註：吳守禮教授著作ê《國臺對照活用辭典》（2000年出版）kah楊青矗先生著作ê《台華雙語辭典》（1992年出版），lóng使用方音符號系統來標音，m̄-koh kah教育部公佈ê版本無tsiâu仝款。
5 台灣語文學會tī 1991年期間針對台灣語言所制定ê音標系統，一般簡稱TLPA（讀做Thoo-lú-pah）。
6 教育部tī 2006年10月14公佈，hit時叫做「臺灣閩南語羅馬字拼音方案」；2024年8月26，教育部宣佈修正做「臺灣台語羅馬字拼音方案」。
7 編註：國際語音學學會設計ê一套標音系統，用來標記人類語言ê發音，ē-tàng精確記錄世界上任何一種語言ê任何一个聲音。本文無詳細介紹國際音標，主要是做臺羅、白話字、方音符號之間ê對應。

  • 表內ê臺羅kah白話字lóng是細本字，大本字ê寫法無另外列--出-來。例字kah例詞lóng是漢字kah臺羅雙文對照，有一寡例有方音差，所以表內ê例無法度代表所有ê腔口。
  • 聲母「m」、「n」、「ng」lóng是鼻音，有in ê音節規个lóng ē kânn鼻音，m̄-koh臺羅無tī韻母標示「nn」，白話字mā免另外標示「ⁿ」，方音符號也m̄使用鼻音化ê韻母符號。
  • 論真，[ʨ]、[ʨʰ]、[ɕ]、[ʥ] in lóng是[ʦ]、[ʦʰ]、[s]、[ʣ] kah [i]（或是[ĩ]）結合ê時ê顎化音，所以方音符號「ㄐ」、「ㄑ」、「ㄒ」、「ㆢ」ê後面，一定是接「丨」（或是「ㆳ」）。
  • 泉腔普遍無「j」聲母，無保留--ê通常是kah「l」合流--ah。 


  • [i] 對應ê方音符號，就原則來講，橫寫ê時寫做「丨」，直寫ê時寫做「ㄧ」。
  • 《臺羅手冊》將 [ɔ] 對照注音符號「ㄛ」，m̄-koh根據《臺羅手冊》ê說明，he不過是為著『方便揣摩學習』niā-niā，而且he所對照--ê是注音符號，m̄是方音符號。根據教育部所公佈ê方音符號系統，[ɔ] 對應ê方音符號是「ㆦ」。
  • 臺羅ê「oo」是正式版，傳統版參白話字sâng款lóng寫做「o͘」。
  • 根據《臺羅手冊》ê說明，臺羅ê元音「o」ê實際發音有 [o]、[ɤ]、[ə] 等等ê方言變體。就教育部《臺灣台語常用詞辭典》kah《臺羅手冊》，元音「o」ê主音讀是 [ə]，tse tī台灣南部（比論講高雄腔、台南腔）是tsiânn普遍。因為自底就是uì [o]央化產生--ê，自然也就有其他無sâng款ê變體（比論講 [ɤ]）。除了央化以外，有ê腔口是「o」kah「oo」合流，當然mā有猶原kā「o」讀做 [o]--ê。雖然講各種變體lóng是仝音位，m̄-koh為著區別無sâng ê音值，leh標示方音差ê時，[ə]（[ɤ]）ê臺羅ē-tàng寫做「or」。
  • [ua]、[ue] ê臺羅寫做「ua」、「ue」，m̄-koh白話字寫做「oa」、「oe」。

  • 頂表是鼻音化ê韻母，有in ê音節規个lóng ē kânn鼻音。
  • 臺羅正式版ê「nn」是接tī上尾ê元音ê後面（傳統版參白話字sâng款lóng寫做「ⁿ」），方音符號mā是kan-na上尾--ê tsiah使用鼻音化ê寫法。
  • [ĩ]對應ê方音符號，就原則來講，橫寫ê時寫做「ㆳ」，直寫ê時寫做「ㆪ」。
  • 「ㆫ」ê頭前一定是接「丨」，「iunn」韻tī台南腔ē讀做「ionn」。
  • 泉腔普通無鼻化元音[ẽ]（[ɛ̃]），無「me」、「ne」、「nge」……。


  • 頂表ê韻lóng有kânn鼻音。
  • 「m」、「n」、「ng」，in對應ê方音符號，聲母ê寫法kah韻母ê寫法無sâng。
  • [iᵊŋ] ê臺羅寫做「ing」，m̄-koh白話字寫做「eng」。
  • [ɛŋ] ê臺羅寫做「eng」（「ing」韻tī永靖腔ē讀做「eng」）。

  • 「ian」讀做 [ian]，m̄-koh大部份腔口ê實際音讀是 [en]（或是[iɛn]）。
  • 泉腔普通無「om」韻。

  • 頂表是入聲韻尾，用tsit四種來收尾ê韻就是入聲。
  • 「op」讀做 [ɔp]（泉腔普通無tsit个韻），「ok」讀做[ɔk]。
  • 「iat」讀做 [iat]，m̄-koh大部份ê腔口ê實際音讀是 [et]（或是[iɛt]）。
  • [iᵊk] ê臺羅寫做「ik」，m̄-koh白話字寫做「ek」。
  • [ɛk] ê臺羅寫做「ek」（「ik」韻tī永靖腔ē讀做「ek」）。
  • [ʔ] 韻尾--ê一定是白話音。

  • 頂表ê白話字是杜嘉德方案8，其他ê白話字若無另外說明就是打馬字方案⁸。
  • [ɨ]（[ɯ]）kah [ə]（[ɤ]）是老泉腔ê韻母，有ê泉腔（比論講泉山腔）koh有 [əe] 韻（臺羅寫做「ere」），其中，[ə] kah [əe] tsit兩个韻--ê，一定是白話音。雖講「o」mā有 [ə] ê變體，m̄-koh he kah泉腔ê「er」無仝音位，來源也無sâng。
  • [ɛ] 是漳州話ê韻母，台語無tsit个韻母（無存在e、ee對立ê腔）。
8 傳教士為著傳揚基督教，tio̍h-ài言語ē通、翻譯《聖經》，雖然福建話ē-tàng用漢字來記錄，m̄-koh漢字歹學，koh oh記音。拼音文字ē用得解決傳教士拄--著ê濟濟問題，就án-ni發明白話字。M̄-koh，逐个傳教士各人有各人ê寫法，所以白話字其實有tsiok濟種方案，無一个統一ê正字法。Tī台灣khah普遍--ê是打馬字方案，但是打馬字無法度拼寫台語所有ê腔口。杜嘉德ê《廈英大辭典》雖然有設計泉州話ê [ə]、[ɨ] kah漳州話ê [ɛ] ê羅馬字，m̄-koh無設計第6調kah第9調ê調號。潮州白話字有第6調ê調號，總--是潮州話參台灣話ê差別不止仔濟，兩種言語kiōng-beh buē通。若言語學家張裕宏教授--ê，ē-tàng kā伊看做是擴充版ê打馬字方案。

  • 調值是使用五度標記法來標註--ê，每一个腔口lóng有in家己ê特色，tsia--ê不過是將相對普遍ê腔口ê情形，lio̍h仔記錄--落-來niā-niā。Tse kan-na ē-tàng做參考，無法度代表所有ê腔口。
  • 第1調kah第4調lóng無調號，有入聲韻尾「p」、「t」、「k」、「h」--ê是第4調，若無，就是第1調。方音符號ê第8調，調號是標tī入聲韻尾「ㆴ」、「ㆵ」、「ㆻ」、「ㆷ」ê頂頭。
  • 「h」收尾ê入聲，變調了後多數ê腔口ē失去喉塞（有ê甚至連第8調本調to無喉塞），m̄-koh有ê腔口iá是ē維持 [ʔ] 韻尾（比論講老泉腔）。
  • 台語有一寡泉腔（比論講泉中腔）iá有第6調，在台灣主要tī鹿港kah台西有分佈。若其他ê腔口，原底第6調--ê lóng變做第7調--looh。白話字ê第6調調號是潮州白話字8 ê寫法，方音符號無制定伊ê調號。老泉中腔其他ê調類ê本調kah變調ê調值，參頂表記--ê，大部份並無sâng款。

  • 第9調是高升調，伊m̄是傳統調類ê聲調，tī一寡外來詞、合音kah三連音ê頭一个音節ē出現，有ê腔口ê第9調kah in第5調ê本調是sâng調值--ê。白話字第9調ê調號是張裕宏方案8，方音符號無制定第9調ê調號。
  • 臺羅ê調號ài標tī「a」、「e」、「i」、「o」、「u」tsit五種字母ê頂頭，逐个音節上濟標一个。若是tī仝一个音節內底，tsit五種m̄-nā出現一个，án-ni就標tī「a」ê頂頭，無，就標tī「e」、「o」ê頂頭（若「oo」、「ee」就標tī頭一个字母「o」、「e」ê頂頭），若其他ê情形就標tī上尾hit个「e」、「i」、「u」ê頂頭。調號若標tī「i」ê頂頭，án-ni原本「i」頂頭ê hit點就thang省略。若是拄著tsit五種字母lóng無出現--ê，就kā調號標tī「ng」ê「n」ê頂頭，若連「ng」to無，就標tī「m」ê頂頭。
  • 輕聲m̄是一種聲調，伊是聲調弱化ê現象。輕聲ē-tàng分做兩種，一種是固定調輕聲，另外一種是隨前變調輕聲，也就是實際音讀ē受著前字聲調ê影響，所以輕聲ê調值tio̍h-ài看情形。
  • TLPA kā輕聲記做第0調，輕聲詞m̄標原聲調。輕聲符號m̄是調號，臺羅--ê kah白話字--ê是用詞（或是詞組）做單位來標記--ê，標tī語詞ê倒手爿（m̄-koh若準tī句頭就免標），ē保留原聲調ê調號。方音符號ê輕聲符號是標tī逐音節ê頭前，mā ē保留原聲調ê調號。
  • 臺羅ê輕聲符號leh標示進前，若原底ê位置應當有連字符，tio̍h用輕聲符號取代連字符；若làng一格而且m̄是句頭，直接標輕聲符號mài留空格。Kā詞組標輕聲符號ê時，詞組內面ê空格ài改用連字符接--起-來。


#台文通訊BONG報 378期，2025年9月出刊。

歡迎捐款贊助　#李江却台語文教基金會　

（捐款可抵稅，匯款後請通知02-23112199）



郵政劃撥：19021486
戶名：財團法人李江却台語文教基金會

電匯：123-20-050514-2
華南銀行士林分行活儲
戶名：財團法人李江却台語文教基金會


#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。






Labels: ,