文化是民族ê根，語言是文化ê載體。若是語言失--去，文化隨就ē tuè-leh冰消瓦解；文化若是冰消瓦解，民族自然就無法度繼續存在。所以，雖然經過濟濟ê打壓kap無公平ê對待，iáu是一直有濟濟熱情勇敢ê台灣人為著台語文貢獻家己ê氣力kap才情。M̄-koh，個人ê力量有限，所以台語人tī台灣歷史ê無仝時期，有組織各種ê台語社團，ǹg望聚集逐家ê力量為台語盡一份力。
李江却基金會就是解嚴以後上重要ê「台語」基金會：伊自1997年正式創會到tsit-má，已經經過十五个寒熱。Tī tsit十五年內底，基金會持續發行《台文BONG報》kap《台文通訊》tsit兩份tī台語文學ê歷史頂kuân上長歲壽ê刊物，逐年koh舉辦母語詩人大會－－詩行、阿却賞台語論文kap創作獎，鼓勵濟濟台語後輩，發覺出bē少ê台語新秀。Tī其他ê台語文活動內底，mā不時ē-tàng發現基金會ê參與。Ē-tàng講tī解嚴後ê台語運動內底，李江却基金會扮演相當重要kap積極ê角色。
Tī李江却基金會十五週年生日，mā是台文通訊創刊二十週年ê今仔日，本人代表台灣羅馬字協會全體會員，向基金會獻上guán上真心ê祝福。Mā ǹg望基金會ē-tàng繼續堅持，逐家做伙聯合台語文ê眾有志，做伙koh再為台灣語文開創另外一段光明ê未來。
（作者是台灣羅馬字協會理事長；原文刊tī周年特刊）
