王淑珍
有兩个乞食，逐工lóng同齊經過一个富戶人in兜。
富戶人兜ê主人家，逐工lóng ē tàn一寡仔銀角仔hō͘--in，比較khah高強大漢hit个乞食提著銀角仔lóng ē歡頭喜面，大聲對主人家唱講：「多謝頭家喔！你真正是仁心有慈悲，做好代。你一定ē長歲壽，食到老老老，身體健康、無病疼、無災厄！」
另外hit个生做瘦瘦、細漢細漢ê乞食，逐遍提著銀角仔，lóng頭lê-lê、細細聲仔講：「感謝佛祖恩典。」
Tsit个富戶人逐工lóng ē tàn銀角仔hō͘--in，逐工lóng聽著兩種無仝感謝ê聲音，一个大聲感謝--伊，另外一个細細聲仔感謝佛祖。
富戶人頭起先無感覺有啥mih無妥當，尾仔心內沓沓仔開始感覺有淡薄仔無爽快，hit種無爽快ê感覺一直累積、累積，累積到有一工，心肝內真懊惱： 「He就真奇怪囉！是我hō͘伊錢，伊lóng無感謝--我，suah去感謝佛祖，我看我tio̍h-ài hō͘伊一點仔教示，hō͘伊知影應該感謝ê人是我。」
富戶人心內án-ne拍算，就行去pháng店，請做pháng師傅kā伊烘兩條一模一樣、平大條ê俗pháng。富戶人將其中一條偷偷仔挖一空，tsiⁿ一寡值錢ê珠寶入--去，koh kā封hō͘好勢。Tsit兩條俗pháng外表看--起-來仝款仝款，無啥mih精差。Hit兩个乞食來ê時，富戶人kā hit條普通ê俗pháng分hō͘ hit个瘦瘦、細漢細漢、kan-ta ē-hiáu感謝佛祖ê乞食。Kā hit條tsiⁿ珠寶ê俗pháng，分hō͘ hit个高強大漢、逐工感謝伊ê乞食。
富戶人心內án-ne想：「Tsit遍我絕對beh你知影，感謝我kap感謝佛祖到底有啥mih差別！」
大漢乞食一提著hit條好料ê俗pháng，感覺有淡薄仔沉重，心內暗暗仔想講：「Tsit條俗pháng一定是麵粉無發，凡勢bē好食。」伊一向真愛佔人便宜，隨kā細漢乞食講：「我tsit條俗pháng kap你換，好--無？」
大漢乞食無講理由，細漢乞食也無問，伊ê想法真單純：「這無定著是佛祖ê安排！」就隨kap大漢乞食相交換。
第二工開始，hit个細漢乞食就m̄免koh出去kā人分--ah，伊心內非常感謝佛祖！
富戶人看著大漢乞食又koh來kā伊分，心內感覺真奇怪，就開喙kā問：「你hit條俗pháng kám lóng食完啦？」
大漢乞食應講：「食了--ah！」
「若án-ne，hin內面ê珠寶--leh？」富戶人繼續kā問。
「珠寶？」聽主人家án-ne kā問，乞食tsiah知影hit條俗pháng提著重重，是頭家好意，包值錢ê珠寶tī內底beh hō͘--伊。
Tsit聲反悔已經bē赴啦，大漢乞食ná頓心肝ná講：「我掠準hit條俗pháng是麵粉無發，bē好食，kap另外hit个相交換。」
富戶人tsit時tsiah覺悟，感謝佛祖kap感謝--伊到底有啥mih差別。
感謝--伊kan-ta是私心想貪，想beh分khah濟。
感謝佛祖是自在感恩、無貪念，自然有伊ê福報啦！
