作者：易俊宏Ia̍h Tsùn-Hông
台灣是一个島嶼。時常聽人teh講，台灣kan-ta有「海產文化」、無「海洋文化」，因為逐家慣勢「先顧腹肚，tsiah顧佛祖」...。Án-ne講mā無m̄-tio̍h，但是tsit个專欄就是beh kā逐家介紹khah濟ê生態智識，像講三--月介紹ê「媽祖魚」，就是ǹg望tuì動物出發，有機會了解khah深ê在地文化。Tsit個月beh介紹ê「白gōng仔」，雖然是一種蟳仔類，但是伊m̄是海產，因為伊m̄是生活tī-teh海洋內底、是徛家tī-teh tsiánn水所在，親像溪湖hit種環境。Lán講tsit種蟳仔是『陸蟹』。
台灣ê『陸蟹』，主要有兩種無仝ê生活方式。一種是beh生湠ê時tsūn，ài tńg去海洋內底生卵，但是平常lóng tī-teh tsiánn水所在生活；另外一種是規世人lóng ē-tàng tī-teh溪湖環境生活，完全m̄免去kha̍p著海水。Tsit個月beh講ê「白gōng仔」是屬於第二種，但是khah濟ê種類，是第一種，親像『仿相手蟹』、『凶狠圓軸蟹』、『奧氏後相手蟹』...等等。無論是佗一種，『陸蟹』lóng是暗時tsiah ē出來活動，mā bē-tàng離水源siunn遠，特別是幼囝，身軀細、khah oh保留水份。若有落雨，日時mā是有機會看著in。想beh看『陸蟹』，墾丁國家公園是有上濟種類--ê，近來墾丁mā是tsiok濟人愛去旅遊tshit-thô ê所在，tse mā hōo『陸蟹』ê歇睏所在帶來tsiânn大ê衝擊。
先講上大ê衝擊影響，就是『陸蟹』媽媽beh去海洋內底生卵ê時tsūn，tī-teh路頂就發生車厄，一隻蟳母kap規千粒蟳仔卵就無--去--ah。Tse是lán頂個月專欄有講--著ê「路殺」。Tī-teh墾丁國家公園內底ê「金蕉灣」，是全世界有上濟種類ê『陸蟹』，經過tsia ê省道26線，就是發生路殺上厲害ê所在。特別是旅遊大月ê時tsūn，若搪著『陸蟹』beh去海底湠卵ê時tsūn，tse死傷看tī lán志工眼內，實在是tsiânn m̄甘：蟳母teh kah扁扁，kap規千粒卵做伙曝kah ta-ta tī-teh路頂kuân。所以國家公園管理處ē去揣志工，來保護『陸蟹』媽媽過車路。
通常『陸蟹』tńg去海洋湠卵ê時tsūn，是初一十五ê大流時tsūn。透年lóng有無仝種類ê『陸蟹』ē需要去落海放卵，但是特別是tī-teh熱天tsit个旅遊大月ê時tsūn，志工就ē動員來去墾丁出任務。Tse時間ēkap八--月中秋節pōng做伙，所以lán志工朋友lóng ē講笑詼，講beh保護『陸蟹』媽媽，suah無法度陪家己厝內ê媽媽--ah。
「白gōng仔」雖然無落海放卵ê需求，但是因為生活所在受人為開發，族群數量mā變kah tsiânn少--ah。伊ē叫tsit个名，是因為伊身軀ê色彩，主要是淺色--ê，有一寡khah青，有一寡khah黃，有一寡是有淡薄ê鳥鼠仔色，加上in生活ê所在，所以in華語ê名號做『黃灰澤蟹』。白gōng仔是台灣tsiah有ê特殊『陸蟹』品種，目前tī-teh高雄、屏東、台東有記錄niâ，特別是tī-teh墾丁ê社頂公園內底，有khah濟數量；因為個性khah溫馴，所以就有「白gōng仔」án-ne ê稱呼。白gōng仔ê卵無濟，mā khah大，蟳仔囝是直接tī-the蟳母身軀頂孵--出-來，雖然m̄免落海，但是mā需要清氣ê溪水。若是tī-teh溪水附近，有塗空，就有可能是in ê厝。
後擺逐家若有機會去墾丁tshit-thô，經過金蕉灣、砂島附近，就ē看著路邊有牌仔，寫『注意陸蟹、減速慢行』，逐家就請駛khah慢--leh。Huān-sè有機會ē tn̄g著交通管制，逐家就請有耐心等--一-下，因為tse生態資源若敗害--去，就tsiânn歹回復，『陸蟹』若絕種，就永遠無法度看--著--ah！
後擺逐家若有機會去墾丁tshit-thô，經過金蕉灣、砂島附近，就ē看著路邊有牌仔，寫『注意陸蟹、減速慢行』，逐家就請駛khah慢--leh。Huān-sè有機會ē tn̄g著交通管制，逐家就請有耐心等--一-下，因為tse生態資源若敗害--去，就tsiânn歹回復，『陸蟹』若絕種，就永遠無法度看--著--ah！
（作者是台灣綠黨新竹市北區候選人）
