主講／顧恒湛
記錄／吳宛霖
本文是2024/11/13「台語sa攏有」講座ê摘要記錄，顧恒湛是中研院台史所助研究員。
今仔日邀請研究台灣歷史ê中研院台史所助研究員顧恒湛，伊用無仝ê角度來分享霧社事件周邊ê故事。
背景
Sediq（『賽德克』）分做三个語群：Tgdaya（『德固達雅』）、Toda（『都達』）、Truku（『德路固』），有參與霧社事件（1930/10/27）起事--ê是Tgdaya六部落，無參與起事--ê是Toda、Truku kah部份Tgdaya部落，tī事件中hōo日本警察動員組織襲擊隊，號名「味方（助日）蕃」。Toda總頭目Teymu Walis等tī土布亞灣溪拄著抗日族人ê埋伏陣亡，引發Toda族人不滿。1931年，Toda族人tī日本警察使弄之下，造成Toda族人襲擊「保護蕃收容所」ê悲劇（二次霧社事件），也hōo Toda族人揹「味方蕃」ê形象。
2020年Toda部落起一間傳統厝，tsiânn做部落ê文化傳承象徵。Teymu Walis等18人ê紀念碑tshāi tī傳統厝前，是部落族人家己ê歷史記持，tsit个動作，一方面是部落歷史主權ê重新宣告，另外一方面mā顯示，uì日本時代到戰後，國家對原住民族政治kah歷史ê pìnn弄，殖民ê遺緒一直tī人民ê生活中留--落-來，紀念碑ê歷史流轉mā提供有關殖民kah後殖民歷史研究ê入口。
慰靈碑徛碑中止
1931年8--月，台中州知事太田想beh tī霧社事件一週年ê時完成紀念碑，《臺灣日日新報》出現反對意見，以北埔事件紀念碑做例，ē hōo當地民眾想起過去ê傷心事，損害官民ê感情。前能高郡守秋永長吉表示，紀念碑規畫ê地點，是kah「反抗蕃」有親tsiânn關係ê巴蘭社暝日leh行ê所在，徛碑ê代誌ài慎重。10--月《臺灣日日新報》報導，霧社徛碑計畫因為種種ê理由決定中止。台中州當局認為，治安控制kah秩序恢復，比tī一週年徛碑對殉職殉難者ê慰靈koh-khah重要。
霧社事件「總決算」
1932年8--月，日本進行所謂霧社事件「總決算」，將原本屬tī Tgdaya抗日六部落ê領地，分割hōo「味方蕃」等社。戰後處理「最終方案」ē-sái講展現日本警察tī霧社地區ê治安配置kah規畫：一方面犒賞「味方蕃」ê協助，一方面kā深山部落「可視化」（看ē著），mā清除霧社周邊潛在ê對敵勢力。
善行獎章效果明顯
Walis Buni是Tgdaya群ê總頭目kah「掖種祭司」主祭者，事件發生地點tī霧社公學校，是巴蘭社ê範圍，日本人sì-kè竄逃ê時，Walis Buni bat派人救助、保護部份ê日本人，hōo日本人號做「仁俠」。事件中kah日本人協調，保全族人生存ê性命根，mā受族人敬重。Tī霧社事件一年後，1931年12--月台灣總督府發佈新〈理蕃政策大綱〉，以「教化蕃人」做理蕃上kuân指導原則，隔tńg年頒佈「理蕃善行章」、「頭目章」等授與ê章程，tse ē-sái講是霧社事件了後對理蕃管理來講上重要ê方法，而且效果mā上明顯。
霧社事件抗日紀念碑
戰後中華民國政府接收台灣，國族論述有完全無仝ê轉變，「叛逆」kah「義行」雙方顛倒píng。霧社抗暴事件hōo納入反抗「日寇」侵略ê「國民革命」論述當中。餘生紀念碑是戰後上早設立kah霧社事件相關ê紀念碑，踮tī清流部落（就是日本時代ê川中島社），定位「霧社起義」，有替餘生者平反ê意思。
冷戰kah抗日紀念碑
1949年底國民黨政權kā中央政府遷來台灣，tsiânn做反共復國ê基地；1950年6--月韓戰爆發，台灣hōo納入美國冷戰防線。1950年代初期，動員民間做防空準備是台灣備戰ê一部份。1952年9--月，霧社民眾tī日本時代「郵便局」頭前ê菜園挖防空壕ê時，發見幾若具屍骨，手骨有纏鐵線，伊bat做過警手，判斷是霧社事件反抗族人ê殉難遺骨，隨向警方報案。高永清1951年是民選第一任仁愛鄉長，伊隨徛碑記念。1953年7月15「霧社起義山胞殉難紀念碑」正式落成，落成典禮hit工完全照國民政府記念烈士ê漢人儀式進行，ē-sái講正式kā霧社事件收編，tsiânn做中華民族抗日史觀中「山胞論述」ê一部份。
二二八事件kah霧社
霧社tī抗日紀念碑設立進前，有幾若擺kah當局眼中ê「匪徒」bak--著。1947年二二八事件ê時，二七部隊轉進埔里地區，謝雪紅等人為著擴大二七部隊ê武裝實力，bat tsiūnn山去霧社揣「高山族」kā in支持。仁愛鄉長高聰義（Bunun〈『布農』〉族）以霧社事件ê教訓拒絕謝雪紅ê請求。二二八了後，高聰義kah下山一（林光明）bat受情治人員騷擾，證實有情治人員tī霧社進行調查。
崩--去ê慰靈碑
1953年7--月「霧社起義山胞殉難紀念碑」tī霧社落成，tsiânn做抗日ê民族氣節象徵。1953年，替抗日殉難族人徛碑記念ê呼聲滿sì-kè，有關單位bat建議kā日本人留--落-來ê慰靈碑拆除、改徛新碑，省政府民政廳長楊肇嘉決定另外設園區來徛新ê抗日紀念碑。Uì hit時留--落-來ê舊相片來看，iáu是有人kā日本人所刻ê文字抹掉，總--是無kā毀掉，只是漸漸hōo人放bē記--得。1972年9--月，日本首相田中角榮訪問北京，推動承認中華人民共和國。中華民國kah日本斷交。無偌久，霧社ê日人慰靈碑hōo人sak倒。下山一kah後生、查某囝半暝sak車去khioh碎片kah殘骸，現此時囥tī下山墓園內底。
蔣經國kah 50週年記念
1980年10月27，霧社事件50週年祭典tī霧社抗日殉難山胞紀念碑前盛大舉辦，總統蔣經國、行政院長孫運璿lóng有來到現場，由省政府主席林洋港主祭，南投縣長劉裕猷陪祭。Tse mā是中華民國總統頭一擺參加霧社事件ê週年祭典。1978年拄著kah美國斷交，1979年發生美麗島事件，外交kah內政lóng受考驗，有一種以國家元首身份突顯民族氣節kah國族情操ê意思。
結論
霧社事件除了造成悽慘ê大屠殺悲劇，mā因為弱小民族踮tī殖民結構中ê選擇困境，產生族群內部ê矛盾、紛爭，tsit種殖民惡果甚至流向後一代。過去若牽涉著霧社事件，m̄管是佗一爿，lóng是無法度講出喙ê創傷。Tuè台灣政治、社會ê改革kah開放，族人自我說明kah重khioh記持主權ê空間總算漸漸拍開。霧社事件相關紀念碑ê設立kah流轉過程，ē-sái看著國家pìnn弄記持政治背後ê治理性，mā ē-tàng觀察部落族人按怎轉化tsit種記持ê場所，展現結構中ê能動性。按怎清理殖民kah後殖民帶--來ê複雜摻交kat ê歷史纏線，確實是一个艱難ê命題，m̄是義kah不義tsit款簡單ê二分法ē-tàng解答--ê，而且若是用我族中心ê道德立場去看歷史ê難題，恐驚產生koh-khah濟ê紛爭，mā有可能限制多元記持ê可能性。
台語sa攏有
線頂看影片
