若講著「廣播」，你頭殼內有啥mih畫面？Koh若是講著「農村廣播」--leh？台頂ê大米問坐tī台跤ê聽眾。真濟人攑手回答講對廣播ê印象就是「老人」kap「賣藥仔」。雖bóng án-ne ê電台tiānn-tiānn hōo人感覺是leh「推銷產品」，少年人mā無啥愛hōo序大人聽，m̄-koh電台對農民、序大人來講是朋友，電台主持人分享生活上ê代誌，koh ē-tàng接call in陪開講、唱歌，he是偌好ê陪伴！
作穡人tī田裡無閒ê時，ē-tàng聽廣播知影農業消息，khang-khuè時間一目nih就過--ah；序大人踮厝內歇睏ê時，ē-tàng聽故事、聽歌，聽人káng bē無聊。聲音傳送到每一台la-jí-ooh，共同ê話題hōo廣播電台tsiânn做一个生活圈。聲音是方便koh直接ê媒介，若是ē-tàng透過聲音改變現此時ê電台狀況，hōo農村廣播行出無仝ê路，凡勢ē-tàng改變逐家對農村ê印象。所以tsit個月台語sa攏有邀請tng-leh用聲音做「農村運動」ê大米——林瓊美來kap lán分享。
大米iáu未做農村廣播進前，伊bat tī台北擔任配音員、做電台節目ê企劃，做久了後開始思考「聲音」kám有無仝ê呈現方式？Koh ē-tàng做啥mih有意義ê代誌？Suà--落-來伊辭頭路、搬到宜蘭，開始過細漢leh過ê農村生活，熟sāi tsiok濟少年農民朋友，大米m̄-nā將過去ê記持揣倒tńg--來，mā決定重新用聲音kā農村ê代誌傳播--出-去。
第一項代誌就是「故事車環島」，大米tshuā媽媽到台灣各地採訪農民，koh kā採訪ê內容分享tī面冊頂kuân，受著tsiok大ê歡迎。Tsit tsuā旅行hōo大米母仔囝lóng改變--ah，尤其是大米ê媽媽，伊開始相信友善、有機農業是tsiânn實--ê，mā沓沓仔了解大米ê khang-khuè。
台灣se̍h一liàn了後，大米tńg來宜蘭訪問在地農民，鉸做影片分享hōo YouTube頂kuân ê觀眾，後來蘭陽電台邀請伊來做節目，hōo規个宜蘭lóng聽ē著大米ê聲音，就是《我愛深溝》kap《米米之音》兩个節目。大米tī節目內底訪問真濟農民朋友，過去農村tsiânn做一个「hông làu勾--去」ê所在，致使序大人無愛hōo囡仔作穡，感覺做農無出脫。大米希望透過廣播傳播聲音ê功能，消除逐家對農村ê偏見。親像有一擺，大米tī節目講起一位「小玲」ê故事，小玲想beh tńg來農村做農民，suah hōo序大人阻止，希望伊去都市揣koh-khah好ê頭路，甚至sio罵、拍歹感情。大米講出tsit个故事，koh請聽眾call in入來講家己ê想法，有真濟序大人支持小玲ê決定，mā希望小玲厝內ê人ài kā支持。Tsit个結果hōo大米tsiok感動，因為透過廣播，無仝所在ê序大人ē-tàng互相討論，tse tsiah是屬於農村ê聲音。
Tsit-má大米tī國立教育廣播電台主持《青農市集on air》，少年人用koh-khah多元ê方式種作，農村tng-leh行向新ê方向，大米beh將全台灣ê青年農民lóng紹介hōo聽眾熟sāi，hōo農村ê聲音充滿自信、充滿活力來放送--出-去。
Tī tsit場農村ê聲音運動內底，大米家己mā感受tsiânn深，尤其ē koh-khah注重生活，親像食si̍t iah是其他ê生活細節。翻頭再了解農村生活、hōo農村發聲，mā ē kā家己揣倒tńg--來。因為聲音是上直接、方便ê媒介，大米ē繼續講hōo lán聽，廣播mā ē用無仝ê方式繼續陪伴--lán。
（本文是2019年12月初4 ê講座摘要記錄，主講者林瓊美（大米）是農村廣播「米米之音」創辦人、教育電台《青農市集On Air》製作主持人）
#台語sa攏有講座專欄，本文使用教育部推薦漢字kap臺灣閩南語羅馬字拼音方案。
台文通訊BONG報310期，2020年1月出刊。
--------------------------------------------
歡迎捐款贊助 李江却台語文教基金會 （捐款thang抵稅，匯款了後請通知02-23112199）
線上捐款(定期定額) https://ppt.cc/fF5bhx
線上捐款(單筆) https://ppt.cc/fcycox
郵政劃撥：19021486
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。 戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
