作者：羅九安
Tiānn-tiānn聽人講：人食老m̄-nā體力輸少年人，頭殼mā tiānn-tiānn ē番顛失智。M̄-koh，雖bóng整體體能流失是身體老化ê正常現象，lán頭殼ê功能kám定著ē變khah bái--leh？頭殼ê認知功能包含記憶力、注意力、語言、抽象思考kah判斷等等。失智症就是腦部功能退化造成種種無仝認知功能流失ê症頭。伊有可能是自然ê退化，mā有可能是因為tio̍h著「神經退化性病症」（neurodegenerative disease），親像Parkinson’s（『帕金森氏症』）iah是Alzheimer’s（『阿茲海默症』）造成。
運動避免頭殼老化
Tsiânn濟科學研究早就顯示：長期保持運動ê習慣，是避免食老失智ê好藥方。比論講2018年4--月，瑞典一个研究團隊發表in觀察1,462位中年婦jîn人健康狀況超過40冬ê論文報告，in發見心肺功能勇健ê人，tio̍h著失智症ê年歲平均比別人慢9.5歲，暗示tsia̍p運動ē-sái減輕甚至避免食老失智ê風險。M̄-koh，tsit个團隊並無解sueh是按怎運動ē-tàng維持頭殼ê認知功能koh壓制伊老化。
Án-ne，運動到底是透過啥mih機制來影響腦部健康--ê--leh？針對tsit个問題，日本北海道大學ê教授Hiroshi Maejima tī伊實驗室觀察niáu鼠仔運動對in腦部功能ê影響。伊發見逐工運動ê niáu鼠仔有khah好ê認知功能，若進一步來探討伊背後ê分子機制，Maejima指出：有sù常leh運動ê niáu鼠，in腦部掌管學習kah記憶形成ê hippocampus（『海馬迴』）有khah kuân ê「BDNF」ê表現。BDNF（Brain-Derived Neurotrophic Factor）是對維持神經細胞健康tsiok要緊ê一款卵白質，伊ē得促進「神經突觸」（synapse）形成koh有支持新ê神經細胞生長kah分化。Synapse是神經kah神經之間互相連接交換資訊ê場所，synapse ê數量kah品質決定神經網路ê運作效率。因為hippocampus--裡神經網路運作ê好bái決定lán學習新事物kah形成新記憶ê效率，所擺lán若beh有好ê學習kah記憶力，定著ài倚靠腦中有夠額ê BDNF來hōo hippocampus形成勇健ê神經synapse甚至新ê神經細胞。
科學已經證明提升BDNF ê濃度ē-sái加強niáu鼠仔kah人ê認知功能，tī臨床mā發見失智症患者tiānn-tiānn有腦中BDNF分泌不足ê現象，所擺醫學界普遍認為提升腦中BDNF ê量是改善失智症ê好法度。Beh按怎透過「運動療法」來hōo病人家己腦中BDNF ê量tshìng-kuân算是一種tsiânn值得發展ê新興醫療，tse m̄-nā是對失智症ê病人有利，濟濟hōo科學家傷腦筋ê神經退化症——親像Parkinson’s kah Alzheimer’s mā有tsiânn大ê機會ē-tàng得著改善。
運動可能是Alzheimer’s患者ê救星
Alzheimer’s disease（AD）是全球上普遍ê神經退化症，伊也是上主要ê失智症病因。目前全世界已經有3,000外萬个患者，甚至到2050年iáu ē增加到一億。雖bóng有tsiah-nī仔濟人受Alzheimer’s苦毒，醫學界到tann iáu是揣無有效率ê法度來治療Alzheimer’s。濟濟大藥廠親像Pfizer、Johnson & Johnson、Novartis等等，投入大量資金想beh研究出對抗Alzheimer’s ê新藥，m̄-koh lóng失敗，上大ê因端就是Alzheimer’s致病ê機制siunn過複雜，koh牽涉著濟濟無仝ê基因，hōo科學界kah製藥界無法度針對某一个症頭來設計藥物。
不而過，好消息是有不止仔濟ê流行病學（epidemiology）文獻顯示：保持sù常運動ê習慣有機會ē-sái hōo lán減輕失智ê風險，tio̍h Alzheimer’s ê患者mā有機會ē-tàng恢復失--去ê一寡認知功能。M̄-koh問題是tsia-ê流行病學ê研究結果kan-na是講運動可能有預防失智ê好處，伊並無提供清楚ê分子機制thang來hōo醫生設計出治療iah是避免失智ê法度，或者是幫贊藥廠開發新藥，而且運動療法tī無仝病人身軀頂ê臨床試驗結論mā無一致。若真正想beh發展出對患者有利益ê新療法，lán的確tio̍h-ài先對運動kah健康人iah是tio̍h Alzheimer’s ê病人腦部健康ê關係做一个khah完整ê認bat。
Alzheimer’s ê病情發展通常是uì影響hippocampus ê功能開始，所擺病人上頭先ē感覺著家己沓沓仔leh失去學習新智識kah形成新記憶ê能力，學習kah記憶tsit兩項能力反應hippocampus功能ê好bái，也是評估Alzheimer’s病情發展ê一大指標。美國Harvard大學ê教授Rudolph Tanzi利用Alzheimer’s ê niáu鼠仔模型來探討運動是按怎預防認知功能衰退ê機制，tī 2018年9--月發表tī《科學》期刊ê論文中，伊發見運動m̄-nā ē-sái促進hippocampus ê神經增生koh ē-tàng促進BDNF ê分泌，增加ê BDNF ē幫贊受Alzheimer’s蹧躂kah無適合hōo神經細胞做徛家ê腦部環境恢復元氣，hōo新生ê神經細胞ē-sái生存。M̄-koh若是kan-na透過人工ê法度hōo神經再生，並無法度改善病情，就ná親像kā一个紅嬰仔tàn tī戰區，伊liam-mi就ē死--去，無才調kā lán tàu-sann-kāng。但是若是同時落藥仔hōo BDNF ê分泌tshìng-kuân，創造適合神經生長發展ê環境，就算tī無leh運動ê niáu鼠仔身軀頂，mā看ē出Alzheimer’s症狀減輕ê效果，kah有leh骨力運動ê niáu鼠仔仝款。
Alzheimer’s ê新療法
Tanzi ê研究結果hōo科學家感覺tsiânn樂暢，mā興tshih-tshih想beh kā in ê發見發展做治療甚至是預防Alzheimer’s ê藥方，若準ē-tàng透過刺激神經再生kah增加BDNF分泌來得著kah運動仝款ê效果，科學界kah製藥界就ē-sái開發出有路用ê新藥來治療Alzheimer’s。而且濟濟患者年歲lóng bē少，beh要求in骨力運動就kánn-ná阿婆--ā生囝仝款。未來若ē-tàng hōo in透過食藥仔來控制病情惡化，m̄-nā對患者本身來講是一大福音，對規个國家來講mā ē-tàng大大減輕公共醫療支出。
（作者是億康生物科技研發經理，本文uì Blog「讀台語，學科學 Tha̍k Tâi-gí, o̍h kho-ha̍k」轉載，漢羅用字有調整，原文網址：https://reurl.cc/qV5d1g）
