作者：黃偉嘉
4月初3透早7點58分，花蓮外海發生規模7.2 ê大地動，到tann已經造成17人過往、也有千外人tio̍h傷。其中，tī太魯閣〔1〕國家公園內底，有一tsuā『砂卡礑步道』，算是救災上要緊ê所在。Lán tsit期就來討論，tse『砂卡礑』台語ài按怎讀khah好？
根據阮ê研究，用台語來讀原住民族ê地名，主要有兩種情況。頭一種，是因為漢人kah原住民族鬥陣生活幾若百冬，台語已經發展出家己慣勢ê講法，而且無一定參漢字鬥ē bā——譬如新北市ê「烏來」，讀做「U-lai」，若kā讀做「*Oo-lâi」（加星號代表是無正確ê音），就真正是烏白來--ah！
另外一種，是在地人kah原住民族蹛做伙ê時間無算久長，也m̄知in族語ê講法。若án-ne，通常ē看官府按怎kā in號名，就照講。『砂卡礑』tsit个部落，就是tsit款情形。
日本時代，官府是kā『砂卡礑』寫做「サカダン」，無漢字。Tsit庄tī海拔千二ê kuân山內底，附近並無漢人ê庄頭。一直到1946年ê《臺灣教會公報》686號，bat講著tsit庄，原文是án-ne：
...Tī 3 nî chêng 12 goe̍h bóe, tùi Tāi-ló͘-kok-kiap-kháu khì chha-put-to 5 tiám-cheng ê lō͘-chām, ū chi̍t só͘-chāi miâ Sa-kha-láng ū hoat-kiàn chi̍t ê jia̍t-sim chheng-liân lâng ê sin-si tī soaⁿ-téng...〔2〕
日本話ê「d-」，tshiâng-tsāi tī台語讀做「l-」，比如「おでん」（oden）就變做「oo-lián」。所以，「サカダン」ê台語，讀做「Sa-kha-láng」是合理--ê。
另外，kā日本話ê「d-」讀做「t-」，也是tsiânn普遍ê代誌。而且lán人講日本話ê時tsūn，慣勢kā中央音節ê調，讀做高平調，親像「さしみ」讀做「sa-sí-mih」仝款，hōo伊唸--起-來khah順--leh。所以，「サカダン」，也有人讀做「Sa-khá-táng」，尾--à tsiah演變做今仔日ê『砂卡礑』（礑，華語讀做ㄉㄤˋ）。
以本土語言標注臺灣地名計畫 https://reurl.cc/XjozaR
