編按：原文tī 2014年3--月，雜誌第240期，第24-25頁刊出；本文使用教育部推薦漢字kap傳統白話字。
最近chit兩年，連sòa出版兩本台語文學史相關ê冊，一本是方耀乾ê《台語文學史暨書目彙編》，另外一本是林央敏ê《台語小說史暨作品總評》，顯示母語復振運動kap母語文學已經發展到一个坎站，台文界ê人認為有必要ài kā行--過ê跤跡做一个整理kap檢討，順sòa為chia-ê事實做一種歷史詮釋。
《舌尖與筆尖》chit本冊kap進前chit兩本冊無仝。伊是受台灣文學館ê邀請，參與「台灣文學史長編」ê計畫所寫--ê。當初館方是照in前期作業所擬定ê主題——「母語文學」來kap我簽約、委託我寫。照企劃書ê構想，kā台灣文學史內底所包含ê主題，一本冊寫一个主題，chit本冊tòe in擬定ê筋脈，主要是beh寫1980年代中期ê台灣文學因為社會力tháu放，出現ê多元化現象，其中「母語文學」ê發展事實，m̄是beh單獨寫母語文學史，更加m̄是beh寫「台語文學（運動）史」。所致，一直約束家己做到『略古詳今』、「照顧著所有母語ê事實」、「以文學事實為主，以運動史實為輔」等幾項原則。
Taⁿ chit-má冊出--來--ah，m̄敢講寫了偌好拄偌好，不而過，ē-tàng講符合契約ê要求，對「母語文學」chit个議題ê敘述，基本上算完整，上重要--ê是，頭一遍kā「母語文學」納入去「台灣文學史」，kap主流文學界ê認知有對話、互相補充ê功用。
Éng過，kan-taⁿ「母語」、「台語」ê定義kap範圍tio̍h講規晡講lóng bē清，母語文學ê發展過程ē-sái講就是一連串論戰、爭議ê過程，ùi母語ê書寫方案吵到母語文學ê必要性，台文界m̄-nā ài kap華文界吵，mā ài kap仝台文界--ê吵。Chit回，我趁回顧歷史ê機會，kā伊勉強整理出一个筋脈。我ê基本論述有下面幾點線索：
- 所有ê文學創作lóng是ùi母語出發--ê，頭先是口傳文學，等候母語發展出書寫系統以後，chiah開始發展書面語文學。
- 台灣各母語早前lóng是以漢字書寫為主，「言文無一致」，kap中國文學傳統仝款，雖然各族『語異聲』，但是秦始皇以後，一律『書同文』。從來無「母語」或者是「母語文學」ê議題。
- 「母語文學」是被殖民統治--過，母語hō͘人消滅了後，chiah ē出現ê議題。Chit本冊用「母語覺醒kap復振」做界線，kā台灣ê母語文學發展分做「覺醒前」kap「覺醒後」，啊chit本冊ê重點明顯是囥tī「覺醒後」。
- Sòa--落，chiah-koh以母語書寫方案、主張ê差異，分做「漢字派」、「羅馬字派」kap「獨立派」去包含母語文復振運動中ê台文創作者kap社群。Chit款分法是方便法，當然mā無可能完全科學、sù-sī。
少年時代讀著英國歷史家卡爾（E.H. Carr）ê一句名言，講：「歷史是歷史家kap伊處理ê過去事實之間，不斷互動ê過程；mā是現在kap過去之間無終止ê對話」。Kā chit段話提來描述我寫chit本書ê經驗，ē-sái講十分ê符合。因為，chit本冊所寫ê事實kap我家己ê母語運動經歷重疊性真koân，因此，beh維持學術上ê中立、客觀，本身就是一種挑戰。
Teh寫chit本冊ê過程中，我對「母語文學」chit个概念以及伊tī台灣文學史ê位置，有真深刻ê思考，仝時mā得著真大ê成長。Taⁿ已經盡我ê力來完成、出版，算是個人對「母語文學」chit个議題所做ê心得報告，當然iáu有真大改進ê空間。總--是，希望thang做lán台文界反省ê材料，iah對台文界以外ê人，有清楚說明ê路用，知影「母語文學」tī「台灣文學史」ê位置。而且，mā期待鼓勵koh-khah濟人來投入母語文學創作，以及日後有khah好、khah詳細ê「母語文學史」iah「台語文學（運動）史」出現。
（作者是台羅會榮譽理事長；著作《舌尖與筆尖——台灣母語文學的發展》，2013年10--月由國立台灣文學館出版。）
【徵稿啟事】Uì tsit-tsūn開始，guán誠懇徵求「台文通訊30週年」稿件，歡迎逐家來鬥鬧熱，詳細請看第4頁ê徵稿啟事kap第32頁ê投稿資訊。
#台文通訊30週年經典回顧 專欄。
台文通訊BONG報316期，2020年7月出刊。
歡迎捐款贊助 #李江却台語文教基金會 （捐款thang抵稅，匯款了後請通知02-23112199）
線上捐款(定期定額) https://ppt.cc/fF5bhx
線上捐款(單筆) https://ppt.cc/fcycox
有固定的長期捐款， 讓更多的台語文相關計畫可以穩定的推行，感謝逐家。
郵政劃撥：19021486
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
