編按：原文tī 1992年1--月，《台文通訊》第7期，第2-3頁刊出；漢羅用字有koh調整--過，羅馬字部份保留原本使用ê傳統白話字。
人類為著生存ê必要，對身邊ê人kap環境，需要去研究分析；為著滿足好奇心以及擴大生存ê空間，對lán所徛起ê地球kap宇宙，需要去探測了解。Tī生活過程中，也有可能常常想著到底人是按啥mih所在來？Beh往佗位去？人生到底有啥mih意義？……等等種種ê問題。Chit種了解、研究、探測、思考ê結果產生智識。獻身去做chit種了解、研究、探測、思考ê人，就hō͘人稱做智識份子。
智識ê追求當然ē-tàng kā伊單純化，kan-taⁿ來滿足個人ê好奇心kap榮譽感。但是一般講--起-來，追求智識應該有koh-khah koân一層ê目的，真濟智識份子將chit个目的設定tī增加人類ê幸福，che就是智識份子ê社會責任。舉一个例來講，一个研究核能ê專家，就必須反對核能hō͘人利用，做危害人類ê用途。伊若是無án-ne做，就是無盡著應負ê社會責任，無值得社會來尊重。
而且，智識份子因為研究人文kap自然，必須有懷疑、批判ê精神。Chit種精神必然ē對現存ê社會制度kap組織產生衝擊，也帶來社會ê改革kap進步，所以扮演先知ê角色，批判社會ê弊端也是智識份子ê一種社會責任。
因為智識份子有檢驗批判現狀、增加人類幸福ê社會責任，智識份子對掌握控制既得利益ê統治者來講，自然變成一種威脅。所以世界上所有ê外來政權iah是專制ê統治者，lóng用盡威脅利誘ê手段，想beh控制智識份子iah是消滅in ê使命感。就台灣來講，數百年來，一部份ê智識份子hō͘統治者掠去關，掠去刣；一部份hō͘統治者收買--去，做統治者ê官僚；一部份受威脅，m̄敢表現智識份子ê骨氣，m̄敢盡in應盡ê社會責任。致使今仔日台灣ê社會非常欠缺有良心、有骨氣、敢擔當社會責任ê智識份子。
因為欠缺智識份子來檢驗批判現狀、維護人民ê幸福，台灣社會向真kap善進化ê可能性就大大減少--ah。尤其是chit 40幾年來，台灣社會受一个用白賊來欺騙，用軍警特務來壓制ê專制政權控制tiâu--leh，致到台灣內部人心敗壞、倫理喪失，大部份ê人kan-taⁿ想beh追求物質ê享受。對外來講，台灣也變成一个無國際地位ê政治實體，隨時受著中國併吞ê威脅。Tī chit種情形下，台灣人若想beh繼續生存，並且hō͘囝孫ē-tàng發展繁榮，需要澈底ê覺醒。
Tī人民覺醒ê過程中，智識份子ê覺醒是相當重要ê一環。也只有智識份子ê普遍覺醒，chiah有可能喚醒全民ê覺醒。可惜百幾冬來受盡壓制迫害，hō͘大部份ê台灣智識份子，習慣tī現狀中求生存，m̄敢擔起in應當擔ê社會責任。已經覺醒為台灣前途犧牲拍拚ê智識份子，因為人數iáu少，bē-tàng發揮大ê力量。所以智識份子「家己覺醒並且喚起全民」ê工作，只有寄望tī有理想、受專制壓迫iáu未深、iáu未習慣做奴才ê智識青年身--上。
台灣人民長期受壓制，普遍欠缺改變現狀ê意志力kap行動力。Chit種因為受長期壓制所產生ê奴隸性格，只有tī chit代青年ê身--上chiah無hiah-nī仔明顯。今仔日，若beh hō͘台灣做澈底ê改變，除了全民覺醒以外，也需要對現存體制做實際有力ê抗爭行動。Chit種行動也真自然需要比較khah無奴隸性格ê青年來做前鋒。歷史上證明，青年常常是社會進步主要ê動力。經驗也kā lán講，只有青年chiah有魄力kap行動力來拍破舊制度、創造新社會。所以lán有理由相信，台灣社會ê除舊佈新，將tī chit代青年ê手頭來開始，也beh tī chit代青年ê身--上來完成。
台灣ê政治、經濟、社會、文化lóng行到必須做澈底改變ê關口。Beh做改變就必須全民覺醒並且有確實有力ê行動。Tī覺醒kap行動ê過程中，因為時代空間ê無仝款、客觀條件ê惡劣（ok-loa̍t），hō͘ chit代台灣ê智識青年必須比頂一代負起koh-khah大ê責任。In除了一般智識份子應負ê檢驗批判現狀，增加人民幸福ê社會責任以外，必須「自覺覺人」，koh做實際行動ê先鋒。Chit份沉重ê責任teh考驗chit代ê台灣智識青年。In必須有夠額ê勇氣、智慧kap能力，chiah ē-tàng承擔chit份責任。
因為chit份責任是chiah-nī大，無人ē-tàng要求iah是勉強智識青年來承擔。只是有志承擔chit份責任ê智識青年必須了解，kan-taⁿ靠熱情kap勇氣，bē-tàng負擔起chit个責任，必須ài不時鍛鍊家己ê心身，增進家己ê智識，培養家己ê智慧kap能力。只有chit種敬虔ê態度kap做法，koh加上上天ê福佑，chiah有可能為台灣開創一个邁向（māi-hiòng）真善境界ê新局面。
註：本文是本會整理林義雄先生tī UCLA同學會用台語演講ê台文稿，文責由本會負責。
【徵稿啟事】Uì tsit-tsūn開始，guán誠懇徵求「台文通訊30週年」稿件，歡迎逐家來鬥鬧熱，詳細請看第4頁ê徵稿啟事kap第32頁ê投稿資訊。
#台文通訊30週年經典回顧 專欄。
台文通訊BONG報316期，2020年7月出刊。
歡迎捐款贊助 #李江却台語文教基金會 （捐款thang抵稅，匯款了後請通知02-23112199）
線上捐款(定期定額) https://ppt.cc/fF5bhx
線上捐款(單筆) https://ppt.cc/fcycox
有固定的長期捐款， 讓更多的台語文相關計畫可以穩定的推行，感謝逐家。
郵政劃撥：19021486
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
