作者：陳春美
各位評判老師、各位同學，逐家好！我今仔日beh演講ê題目是，上珍貴ê禮物。
今年ê歇熱，阿媽ê火khau，拄好輪到阮兜，一下入門就講beh送阮一份上珍貴ê禮物。我是歡喜kah phu̍t-phu̍t跳，阿姊mā金金siòng，阮苦bē-tàng阿媽緊kā禮物提--出-來。M̄-koh望--啊望、等--啊等，kan-na聽阿媽講去讀老人大學ê代誌，a̍h無看著禮物ê影跡。
伊講老師教in ài tàu放送，用行動做環保救地球，講lán tsit粒地球tio̍h重傷--ah！Ài逐家鬥陣來kā治療。阿姊滾sńg笑講：「有影--無！阿媽！你烏矸仔té豆油——無tè看--őo！Tang時仔學ē-hiáu做醫生kā地球看病。」阿媽講：「你mài激thian-thian--lah！細空若m̄補，大空就叫苦。」阿姊lóng bē-hiáu看人ê目色，koh激khòo-khòo講：「Ai-iō！阿媽你siunn厚操煩--ah--lah！」阿媽suah ná幌頭ná講：「惜lio̍h地球是tsiânn要緊ê khang-khuè，人我逐工lóng mā去社區做環保。」
阿母徛tī邊--a，一直kā阿姊使目尾，暗示伊恬恬khah無báng。我緊kā阿媽sai-nai講：「阿媽！你哪ē tsiah-nī gâu、tsiah有智慧？厝--裡你上大，你講按怎做，阮就按怎做！」
阿媽歡喜kah，kā我攬leh講：「上代先，就是改變lín愛享受ê習慣，親像暗時仔beh睏，lín姊妹仔就去kah lín阿爸阿母睏仝間，減吹一台冷氣。」阿媽iáu未講煞，阿姊就「hânn」一聲大大聲，阿媽koh緊講：「啊若愛吹冷氣，姊妹仔sio招去圖書館，一兼二顧摸蜊仔兼洗褲；厝內ê窗仔門ài開--開hōo空氣對流；mā ài suà手禁電火；插頭若無leh用ê時tio̍h-ài pué掉；煮食ê時，mi̍h件有熟，火就禁掉，蓋khàm--leh用hip--ê。若ē-tàng用電鍋一擺煮三、四項菜koh-khah好，ē-tàng行路就mài坐車，路途若khah遠就盡量坐公車，mài駛自用--ê。Koh有--lah！上好是用電子siàu單，減少紙ê使用，mā ē-tàng保護lán ê山林。」
人講活到老學到老，無疑悟阿媽去讀老人大學了後，對節能減碳tsiah有概念。落尾我去參加阿爸in工會ê演講比賽，kā阿媽講ê話用tī演講稿內底，提著第一名，m̄-nā有獎狀koh有獎金。老師講想bē到我tsiah四年仔niâ，就hiah了解用行動愛地球ê撇步，我kā老師講tse是阿媽送hōo--阮ê禮物--lah！我就講到tsia，感謝逐家！Lóo-la̍t！
