作者：巫素宜
有一幅世界名畫叫做〈拾穗〉，內面ê圖主要是leh講作穡人收割了後，hōo khah散食ê人去khioh ka-la̍uh ê麥穗tńg--去，thang好食--一-頓-仔。其實，tī lán台灣自khah早到tsit-má，mā有tsit款ê人情味。
Ē記得細漢ê時，田--裡若是有作穡人挖番薯挖煞，lóng ē hōo人去khioh ka-la̍uh--去--ê iah是khah細粒ê番薯，tse是阮細漢上歡喜ê代誌，因為有「khioh--著」ê感覺，mā有hit種「痟貪」ê樂暢。除了番薯koh有啥mi̍h ē hōo人去khioh--leh？
Tsit-má tsiok貴ê白花仔菜，以早是俗kah koh ē曝做乾ê菜，siunn濟銷bē去ê時tsūn，就ē曝做菜乾，tsit味是阮到tsit-má iáu ē siàu念ê滋味。阿母lóng是用sa̍h精牲ê肉湯來煮花仔菜乾湯，iah是用三層肉炒花仔菜乾，現此時回想--起-來，喙瀾iáu ē吞bē離。
細漢ê時，我是無愛韭菜ê味，mā m̄知韭菜、韭菜花是無仝mi̍h件。有ê作穡人種韭菜，kan-na beh收韭菜niā-niā，因為韭菜花beh at tsiok厚工，ài一枝一枝at，工錢tsiânn貴，無親像韭菜規欉用割--ê khah簡單。有tang時仔是因為韭菜iáu未大欉，韭菜花suah先puh--出-來--ah，作穡人無想beh了工錢tshiànn--人，就ē hōo人去at韭菜花，án-ne ē-tàng省工錢，koh ē-tàng hōo鄉親有趁--著ê感覺，真正是一兼二顧，摸lâ仔兼洗褲。
庄跤上有人情味ê所在就是逐家lóng ē食好tàu sio報，佗位有thang khioh免錢ê mi̍h件tsit種好空--ê，厝邊頭尾lóng ē sì-kè去放送，sio招做伙去，阮阿母lóng ē tuè人去khioh。一下出去就是規晡久，我以早m̄知原來at韭菜花tsiah-nī厚工，是看著阿母at規晡久，tsiah提一捆仔囝tńg--來，想講阿母kám是lóng去hia kah人leh開講niā-niā。
後--來，厝邊兜拄好有一坵田種韭菜花，我看著人tī田--裡leh at韭菜花，tsiah知影原來阿母hit捆韭菜花，是伊ànn規工，hānn過一līng一līng ê田岸，用手一枝一枝at，at kah tsíng頭仔lóng ē疼ê韭菜花，是ài用偌濟汗tsiah有法度tsiânn做一捆，就算講隔tńg工tsia痠hia疼，伊看著逐家食kah歡喜，mā是甘願。
Tann hōo我上siàu念--ê，顛倒是韭菜花ê滋味，自細漢無愛ê味，到便若有韭菜花ê時，我lóng ē問阿母：「Kám有thang khioh韭菜花？」
無疑悟suah愛著tsit味--ah！阿母lóng ē想辦法去khioh--一-捆-仔hōo--我。M̄-koh我無法度一睏頭煮了，我就想講有韭菜水餃，án-ne是按怎bē-tàng包韭菜花水餃--leh？
啊！哪ē tsiah-nī好食，逐家食著lóng呵咾kah ē觸舌，講比韭菜--ê koh-khah好食，真正佩服我家己，哪ē tsiah厲害，想出tsit種包韭菜花ê水餃，m̄-nā好食koh隨銷了了--ah！
Tsit-má，我想beh食韭菜花ê水餃，tio̍h家己去買韭菜花來包--ah，阮阿母已經去做仙--ah，我無法度koh ná查某囝賊--leh，kā阿母sai-nai--一-下，伊就緊去tshuân。
外口買ê韭菜花kah阿母一枝一枝at ê韭菜花，食--起-來ê滋味是無仝--ê，阿母ê韭菜花，ke一種愛kah疼thàng ê滋味，哺tī喙--裡，甜tī心內，是甘甜美麗ê記持，koh有台灣人khioh-si̍p ê精神。
