主講／邱毓斌
記錄／李家銓
台語sa攏有 - YouTube 頻道
講者邱毓斌是高雄人，tī 1986年ê時tsūn來到台北，讀中興大學法商學院（tsit-má ê台北大學），hit冬民主進步黨宣佈成立，in校舍拄好就tī台北市民生東路，民進黨黨部邊--a。1987年解嚴進前，大學校園內底uân-á是受著政府全面ê控制。邱毓斌回憶講，tsiūnn大學進前kan-na知影學校內底有教官teh kā人管，入來大學tsiah知影，有規套ê國家機器teh控制學生ê事事項項——像講學生beh編校刊、寫傳單、pun hōo人看，lóng ài經過訓導處ê審查，tī tsit个中間，有人teh監視，he號做調查員、協作員，ài不管時寫記錄。Tsit幾冬來因為轉型正義，有真濟白色恐怖時期ê文件公開，tse bē輸Pandora （『潘朵拉』）ê盒仔，恐驚見ē發見講tsia-ê監視ê人，大面是身軀邊tsiok倚、真信任ê人，有影是hit个時代不得已ê悲劇。
M̄-koh，學校外口政治kap社會ê狀況已經有真大ê無仝，真濟像伊án-ne解嚴前後uì下港起來台北讀大學ê hit沿少年人，接觸--著--ê是tng-leh改變ê社會：街頭運動愈來愈興、政府對人民ê管制mā愈來愈līng，已經算是尾溜。人所講ê「野百合世代」，就是teh講in tsit沿。邱毓斌就是tī hit款氣氛內底開始伊ê大學生活。Hit-tsūn ê消息iáu無kài流通，kan-na ē-tàng透過一寡刊物來吸收新智識，像講《南方》、《人間》雜誌，報導國內外社會ê變動。熟sāi社會ê同時，mā開始熟sāi家己。高雄是工業城，邱毓斌suah是來到台北，看著拄成立ê「台灣勞工法律支援會」tsiah開始關心勞工ê處境；看著teh講台灣史ê冊，tsiah開始想講是按怎lán學校以早無教。
邱毓斌讀大學ê hit幾冬，舞社會運動來爭取權利tsit項代誌，漸漸仔ē排壇--得，m̄免koh bih tī地下。本來四散ê有志mā組織--起-來，tsiânn做各地ê學生社團，uì社團開始，分工合作、有行動力ê社會運動就án-ne起鼓；學校m̄ bat教ê反抗意識、本土意識，lóng是以社團做媒介來推廣kap學習--ê。社團ē骨力招新生、辦讀冊會，讀政治kap社會現實ê批判、台灣史、社會主義等等，koh辦影展、冊展、演唱會kap演講會；各校ē互相交流，kā去地方調查ê經驗編做刊物，愈來愈濟人有意識來參與，就ē-tàng tsiūnn街頭--ah。
社團內底mā m̄-nā學生，koh有像楊碧川án-ne ê人kā逐家tshuā讀冊會。楊碧川tī綠島hông關ê時，是監獄內底上少年ê政治犯，所以其他政治犯sia̋n-pái lóng tsiok疼--伊，ē-hiáu啥mi̍h lóng kā教。出獄了後，楊碧川就感覺講hia-ê老師傳hōo--伊ê智識，伊有義務傳hōo koh-khah濟台灣少年人聽，uì台灣頭到台灣尾，lóng有伊ê影跡。
Beh tsiânn做社會運動者m̄是kan-na靠理想hiah-nī仔簡單，URM（長老教會城鄉宣教委員會）有辦社會運動訓練營，kā參與各種社會運動者ê人會齊做一陣，教in相關ê智識kap技術、beh按怎kā人說服、按怎保持身心健康等等。學生參加了，就家己辦營隊，訓練學弟、學妹來tsiânn做一个專業ê社會運動者；其中，語言mā是真重要ê元素，hit-tsūn beh kap地方ê序大人溝通，主要是用台語，m̄-tsiah koh有訓練用台語來解sueh議題，講khah嚴肅ê代誌。
邱毓斌替lán kā hit幾冬學生運動ê成果做整理。代先，是校園解嚴kap本土化，學生kā老師拍分數，hōo老師有方向ē-tàng改善in ê教學品質；koh來，是政治民主化，蔣經國過身了後，各校ê學生開國是座談會，評價蔣經國、討論體制beh按怎改革，ài kā國民黨ê黨國結構ián hōo倒。社會大眾經過種種社會運動ê洗禮，mā漸漸仔了解政治參與，邱毓斌舉後勁（Āu-ngē）人ê抗爭做例，因為有in四冬ê抗爭，tsit-má北高雄ê空氣品質tsiah thang改善。
上尾--à，邱毓斌以伊tī野百合學運ê故事做結論。伊hit-tsūn是糾察隊長，負責維持秩序（tia̍t-sū），hōo規个社會運動ē-tàng進行--落-去。真濟社會人士ē去到中正紀念堂ê抗議會場，捐款支持學生繼續拍拚。伊印象上深--ê就是有一工，一个外省老兵beh kā伊差不多儉beh一世人ê金phua̍h鍊、金手指tàn入去捐款箱仔，逐家看kah真感動。Tī學運當中，學運份子m̄是上重要--ê，是hia-ê一个一个m̄知名ê一般大眾ê支持，lán ê社會改革tsiah有法度成功。
