《重逢大稻埕》/陳錦月
來台北，bih蹛厝內兩工無踏出大門，下早仔，囡仔講beh駛車載我去陽明山行行se̍h-se̍h--leh，沿路車輛真濟。去到位，停車場lóng客滿，後生放阮落車，駛去揣停車位，我kah兩个查某囝，ná行ná等in阿兄。就準講炎天赤日頭熱kah hông走無路，出來tsia運動ê人mā bē少。
囡仔知影我跤頭趺無好，揀一條有樹仔ńg ê小路，無疑悟行到半中站拄著kuân落崎，一坎一坎ê石gîm仔，兩爿無khînn無khi̍t，我一手khiú查某囝ê手股頭做枴仔huānn，行kah規身軀重汗。看著面頭前一个量約80 thóng歲鐵骨仔生ê阿伯，kōo一个人一步一步liú-lia̍h peh tsiūnn崎kah阮sio閃身 ，hōo我tsiok欣羨，伊有tsit-lō勇跤，百面m̄是三兩工訓練--出-來--ê。
來到二子坪步道，路m̄-nā平thánn，景色mā有夠suí，tsiok適合老大人kah囡仔一家伙仔來tsia行跤花。倚12點，阮來天母一間蚵仔麵線店食晝，就準講疫情iáu未完全消退，點菜mā koh ài排隊！內面用餐ê人客mā bē少，有人包--起-來紮走。阮母仔囝隨人點一碗蚵仔麵線kah四神湯，腹肚款飽，直接駛車往迪化街布市仔，揣阮beh愛ê布料。
到永樂市場peh樓梯起去二樓，看tsiok濟店面ê鐵門thuah--落-來，tsiah想著今仔日是禮拜日無營業。阮tī四箍圍仔se̍h一輾，想起íng過我tī tsia行踏幾若年，tsit-má suah感覺有一點仔生份，人行tī巷路，東西南北suah分bē啥清楚，一時揣無tú-tsiah tsiūnn樓梯ê所在，kám講是siunn久無來，iah是食老無頭神--ah！
Iáu ē記得20 thóng冬前，逐禮拜ê拜二下晡，我tio̍h uì新北市盤兩幫公車，來迪化街畫會kah劉秀美老師畫圖。教室原底tī永樂市場五樓，同學ê年歲，uì正十歲ê囡仔人到kah 80外歲ê老大人，其中有三份一是大稻埕在地人。有tang時仔上課煞，阮一phâng人ē suà攤去「賣麵炎仔」點心擔食烏白切，了後tsiah去甘谷街同學in兜看電影，iáu ē記得tī hia看過一齣電影，叫做《Carmen》（『卡門』）。
畫會後--來徙去西寧北路大稻埕偶戲館1林董--ê提供ê教室。同學內底有小游in爸仔囝黨，kah施媽媽母仔囝黨，lóng蹛tsia附近。小游80幾歲ê老爸，阮lóng稱呼伊「少年游--ê」。施媽媽hām少年游--ê真好客，三不五時ē邀請阮tsit陣同學下課了去in兜。去到位，游媽媽款一桌phong-phài ê料理，有台北圓環上kài有名ê芋仔蝦捲，有芋仔椰子奶西米露suà喙尾；施媽媽in兜ê白tsām雞kah施爸爸親手做ê菜頭long仔，lóng是in ê手路菜。
想--啊想，拄想kah神--去，後生ná pué手機仔行倚來講：「阿母，我tshuā lín去食tsia上kài有名ê『幸福甜品』茶米露。」大漢查某囝隨應講：「我知--lah，芋仔西米露內底ê芋仔khiū koh好食，阮學校老師bat團購叫外送。」
離開永樂市場車駛出迪化街正uat，沿路來到西寧北路大稻埕偶戲館，我講：「20外冬前，tsia親像阿母ê灶跤。」阮kā車停路邊，uì邊--a tsit條巷仔行--入-去，遠遠就看著『幸福甜品』ê招牌，我徛店頭前，蹛亭仔跤sīm一tak久仔，tng我ê跤踏tsiūnn店面gîm-tsînn，hiàng時ê記憶就一幕一幕浮tī目睭前。
店內tng-leh無閒招呼人客ê小游，一下攑頭看著掛喙am ê我，聽著聲就隨叫出我ê名。阮坐--落-來，ná食ná hām小游開講十thóng分鐘，koh注文三杯芋仔西米露、兩杯茶米露、十粒半熟卵，hōo小游ke送兩粒半熟卵。Tsit擺後生查某囝鬥陣tshuā我重逢大稻埕，hōo我有滿滿ê幸福。
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會 電匯：123-20-050514-2華南銀行士林分行活儲戶名：財團法人李江却台語文教基金會
#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。
#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。
