《外語人名按怎翻khah好勢？
Uì《人間失格》講起（三）》/吳孟儒
頭前兩篇1逐家若有斟酌看，心中可能已經有定見：「Yoshiko tsit个人名，當然tio̍h-ài翻做〇〇！」。免講，〇〇是啥mi̍h，逐家意見lóng無仝。奇怪，日語原文明明就固定hit幾字，是按怎翻做台語tse翻法suah各人koh-iūnn？Kám講翻做華、英、德、法tsit類優勢語言就無tsit-lō問題？
其實，優勢語言仝款ē拄著翻譯欠詞、呼音無tuì-tâng a̍h是意思走精ê翻譯問題。不而過，優勢語言ê翻譯活動m̄ bat停睏，已經大概有一个翻譯典範（translation paradigm）出--來，翻譯問題beh按怎處理tse手路大概固定，原則照搬就好，就算有欠詞mā真緊就補--起-來。2
台語過去幾若十冬受著政策打壓，mài講翻譯活動，連正常聽、講、讀、寫to有困難，自然就無空間去起造翻譯典範。Tsit-má逐家對台文翻譯全意見--了-了，其中一个原因就是現代台文翻譯tsiah拄起行，優勢語言ê翻譯已經ē-tàng沿路唱歌，lán本土語言ê翻譯iáu-koh leh揣路，不時tio̍h-ài liâu溪過嶺。佳哉，翻譯問題其實是所有語言共通ê現象，過去幾若十冬翻譯學ê研究lán ē-tàng提來參考，m̄免koh se̍h遠路。
翻譯研究有注意--著，就算是優勢語言，翻法mā ē tuè時代變化，tse叫做典範徙移（paradigm shift）。
譬如講人名英翻華。古早，ē kā Scarlett O'Hara tsit个人名翻做『郝思嘉』，Rhett Butler翻做『白瑞德』；若tsit-má，tse譯名可能ē變做『史嘉麗．歐哈拉』kah『瑞特．巴特勒』。Tse是因為íng過認為人名翻做華語就應該ài像華語名，ài有「華語khuì」。M̄-koh，tsit-má英語已經是全世界上優勢ê語言，華語箍仔mā感覺英語人名就是英語，m̄免koh改；不而過，華語箍仔慣勢用漢字，而且考慮講若用英語原名，華語人無一定ē-hiáu唸，就用華語字來鬥倚音，有「英語khuì」mā無要緊。Tse m̄是講佗一个khah好，是時代leh變，語言使用者（包括譯者、編輯、讀者）重視ê mi̍h件mā leh變。
韓語翻英語mā有類似ê現象。韓國政府補助文化創作，造成「韓流」，hōo韓國電視、電影、小說行銷全世界。Íng過韓翻英，歸化（domestication）手路khah濟，濟濟韓國文化詞ē刁工換做英語文化ê詞，甚至直接刣掉，tsit-má suah開始保留一寡文化詞。Tse m̄是tio̍h a̍h m̄-tio̍h，是取捨ê問題。尤其是韓語小說，過去khah重視讀者好讀、好理解，ē盡量mài hōo讀者發覺原文其實m̄是英語；tsit-má英語箍仔看韓國作品，顛倒希望有韓語味。甚至tsit幾冬英語字典收ê韓語詞mā愈來愈濟。3Lán台灣ê本土文學《單車失竊記》4英譯者Darryl Sterk mā有講--著，原文雖然是華文，m̄-koh內底有出現濟濟台語詞，伊ē盡量kā英語編輯說明，爭取保留原著台語ê羅馬拼音寫法。5
翻譯學tsit塊研究翻譯手路ê領域，就叫做翻譯策略（translation strategy）。仝一條翻譯問題，ē去討論著無仝翻譯手路，其實就是翻譯受著社會、文化、語言特性等等限制，原文kah譯文本來就無可能一模一樣。講到底，像英翻華án-ne優勢語言翻優勢語言，有幾若十年翻譯經驗ê老鳥手路mā無可能完全仝。無仝翻譯手路，反映譯者重視ê翻譯價值；譯者ê翻譯價值，實際上反應出社會對異語言文化交流ê態度。
話講倒tńg--來，外語人名按怎翻，無漢字是m̄是一定ài鬥漢字？若beh借羅馬字，是直接借，a̍h是轉譯做台語呼音？若轉譯，是盡量鬥出上接近原音ê呼音？A̍h是照íng過台語ê理路來調整？逐款方式lóng有伊ê理路。
若希望維持古早漢學傳統，a̍h是希望siânn著khah濟對台語有興趣ê華語使用者來讀，可能就ē選擇台文翻譯用全漢來書寫人名，呼音mā用台語漢字呼音。
若同意羅馬字mā是台文正式書寫，主張m̄免漢字本位，建議kah西洋羅馬字拼音語言tsih接，可能就kah意羅馬字直接借。
若羅馬字直接借，khah重視保留原音ê人，可能ē希望盡量用台羅重現外語發音；希望保留台語轉譯外譯人名ê人，可能ē去研究íng過台語外來語ê呼音變化，盡量去保留tsit个規律。
每一个翻譯手路，lóng是譯者拄著翻譯問題，發現直翻bē用--得，比較心目中想beh達成ê翻譯價值，tsiah來決定按怎翻。翻譯討論，除了確認原文本義，mā ài認知著翻譯有解sueh kah表達ê空間，tī tsit个空間內底，每一个譯者ē揀無仝路行，tse無一定是工夫kuân低有差，tiānn-tiānn是因為重視無仝價值（「台語緊湠--出-去khah要緊，無詞就直接kā華語借就好」、「台語無應該hōo華語牽leh liù-liù行，應該去揣在來ê字詞，用在來ê理路去創新，台語tsiah有法度koh活--tńg-來」）。
逐家感覺無漢字ê外語人名翻做台文，按怎翻khah好？你kah意án-ne翻，是因為你認為án-ne翻ē-tàng達成啥mi̍h效果？其他主張無仝翻法ê人，kám有影是台語無夠好a̍h是語言意識siunn淺，a̍h是in重視ê翻譯價值kah你想--ê無完全仝？
到底《人間失格》6 ê人名ē按怎處理--leh？等到時出版，逐家就ē知--looh！
1 本文第一篇刊tī雜誌第375期第35頁 （https://tsbp.tgb.org.tw/2015/07/khah-ui.html），第二篇刊tī雜誌第377期第30頁（https://tsbp.tgb.org.tw/2015/08/seh-seh-khahui.html）。
2 台語欠詞、借詞相關討論ē-tàng參考本專欄tsit兩篇文章：〈台語欠詞按怎補？ 〉（雜誌第371期第10頁，https://tsbp.tgb.org.tw/2015/03/blog-post_39.html）〈翻譯借詞真利便，m̄-koh啥mi̍h ē-tàng借、啥mi̍h bē-tàng？〉（雜誌第365期第27頁，https://tsbp.tgb.org.tw/2015/09/m-kohmih-e-tangmih-be-tang.html）
3 https://www.oed.com/discover/daebak-a-k-update
4 編註：作者吳明益，2015年出版ê華文小說，內文有部份是台文（用漢字，有ê詞標註台羅）。
5 https://www.youtube.com/watch? v= D Y Z p Y s m N KEg&t=3578s
6 編註：本文作者是《人間失格》台文版ê譯者，目前iáu未出版。
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會 電匯：123-20-050514-2華南銀行士林分行活儲戶名：財團法人李江却台語文教基金會
#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。
#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。
