《Beh按怎泡一杯好lim ê茶（三）》/戴瑞民
頂一擺講到「茶米量、水溫、浸泡時間」tsit三个因素，是決定一杯茶好lim，iah是無好lim上基本ê原因，m̄-koh，有tiānn-tiānn泡茶ê人lóng知影，平平仝款ê條件，是按怎有人斟--出-來ê茶，逐家lóng呵咾好lim koh bē礙胃，有人斟--出-來--ê就是一杯眾人嫌ê茶--leh？
Lán學一項技術ê過程，除了正常學習ê課程以外，當然mā ài tiānn-tiānn練習，學茶mā仝款，古早人講一句話：「Tsia̍p泡，就好lim，tsia̍p lim就ē-hiáu講」。啥mih時tsūn tsiah有法度泡出一杯「芳氣十足koh有層次，茶湯軟水koh gâu回甘，喉韻飽tīnn koh久長」ê茶--leh？Tsia̍p泡、tsia̍p lim是一定ài做ê工夫，無tiānn-tiānn泡，工夫當然mā學bē起--來；m̄-koh kan-na因為愛lim茶，只是時常泡、sù常lim，mā無一定就ē-hiáu泡出一杯好lim ê茶--ōo。
是啥mih緣故--leh？假使講kan-na tsia̍p泡、tsia̍p lim，時間一下久，自然就ē-tàng kā好茶泡--出-來，若是án-ne，有lim茶ê人，是m̄是年紀愈大就愈gâu泡茶，kám是án-ne --leh？事實上，觀察lán身邊ê人，kánn-ná m̄是án-ne--őo！Tse親像細漢ê時tsūn，tuè爸母去廟--裡拜拜，lán kan-na ē-hiáu gōng-gōng「攑香tuè拜」，拜一世人mā m̄知teh拜啥。泡茶mā是仝款：「茶米lióng1--過，囥好了後，確定滾水ê溫度，燒水罐khe̍h--起-來，水kā倒--入-去，開始算時間，時間若到，tsiah kā茶湯倒--出-來，án-ne一杯茶就泡好--ah！」是--lah，tse是照課程ê標準動作：「一杯茶泡好」，m̄-koh，m̄是：「泡一杯好茶」。
Beh學泡茶外型ê動作tsiânn簡單，tī茶藝班認真泡一學期ê茶就ē-hiáu；m̄-koh每一个動作內底，koh有tsiok濟lán看bē著ê撇步，tsit點可能就ài tsiok認真lim三年六個月ê茶——小等--一-下，m̄-thang聽著三年六個月，就認為beh來畢業、出師--ah，到tsia只是學ē-hiáu kā茶泡hōo好lim niā-niā，若是你ê標準是到tsia為止就好，當然ē-sái算是出師--ah。
不而過，lán beh學ê茶kám kan-na án-ne niâ？Kā茶泡hōo好lim了後--leh？你kám有想--過，你bat用心泡過茶--無？Bat用心lim過茶--無？茶ê滋味是啥mi̍h？啥mi̍h又koh是茶--leh？後遍若有機會，lán繼續koh來開講，泡好茶有啥mih撇步。
（Suà--來無定期連載）
1 秤茶米重量ê意思。
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會 電匯：123-20-050514-2華南銀行士林分行活儲戶名：財團法人李江却台語文教基金會
#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。
#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。
