作者：吳雪如
細漢時蹛tī南部，若有人嫁娶就有辦桌thang食。辦桌tī hit个時tsūn，是庄跤人罕得tī外口食飯ê機會；對lán囡仔人來講，koh-khah是一層樂暢ê代誌。
見若食辦桌，lóng是阿爸tshuā我去，因為厝--裡開藥房，阿母ài顧店。拄坐--落-來niâ，就有辦桌ê阿sáng來問講：「囡仔人beh食米篩目--無？」庄跤ê辦桌，tiānn-tiānn中晝beh倚1點tsiah ē開桌，主人家驚囡仔人khah bē擋iau，lóng ē先煮一鍋米篩目hōo囡仔食。阿sáng liam-mi khat一碗米篩目phâng--過-來，逐个囡仔人lóng sio-siāng，米篩目緊sut-sut--leh，sio招去空地仔tshit-thô--ah！
阮sńg beh一睏仔，開桌了後就隨hōo大人叫tńg來食飯。通常辦桌ê第一項菜是冷盤，一个tsiok大ê盤仔，內底分做四、五个細塊盤仔，有鮑魚lâm白醋、五味九孔、蒲燒鰻、烏魚子、tsìnn春餅。第二項菜就是我上愛ê魚翅羹，內底有白菜、筍絲、魚翅、扁魚、肉羹、木耳、香菇，牽羹牽kah khó-khó-khó；湯內底摻糖kap醋，甜甜koh酸bui仔酸bui，是我記憶中細漢食辦桌上期待ê一項菜。
Suà--落-來像紅蟳米糕，阮囡仔人lóng té一碗米糕，用湯匙仔khat leh食，紅蟳是大人tsiah ē ngeh來沓沓仔tshńg。講著五柳居，就是魚一尾大大尾，落去tsìnn，頭頂lâm甜甜koh酸酸ê紅燒醬，hiù寡芫萎tsiūnn桌，看--起-來kài好食款。Koh有鰇魚螺肉蒜，阮做囡仔kái少食tsit味，hōo我上好玄--ê是，tsit項菜tsiūnn桌了後，辦桌ê阿sáng lóng ē開一罐螺仔肉罐頭倒--入-去，食辦桌開罐頭，tsit味一定是特別ê好滋味，tsiah ē án-ne食！Iáu有食桌一定有ê腿庫筍絲，豬ê後跤腿大大粒，先tsìnn koh滷，規塊肉軟sìm-sìm koh khiū-teh-teh，愛食肉ê人上愛tsit味。
講著辦桌ê湯，阮囡仔人上愛ê就是丸仔湯，阿爸lóng ē kā四、五粒丸仔，tshiám做一tshiám，hōo我提leh食。逐桌ê囡仔人lóng提一tshiám丸仔，話仙bóng開講，心適koh tsiânn有趣味。若講著另外一lō湯，我就無意無意--ah！規隻雞落去tīm，雖bóng雞肉tīm kah軟siô-siô，對囡仔人來講，hit-lō菜就是無味無素、無鹹無siam，無ha̍h我ê味--lah！
辦桌食到tsia beh煞鼓，koh來就是收煞ê水果kap點心--ah！我上愛食tsìnn圓仔，圓仔tsìnn了後食--起-來khiū-teh-teh，外口kō塗豆hu kap糖粉，tī庄跤罕得有四秀仔thang食，規个人暢kah。有ê辦桌khah phong-phài，koh有『小美冰淇淋』、養樂多，食到tsia我ê腹肚漲kah hiah-nī大khian。阿爸ē kap煮食ê阿sáng討一个袋仔，kā我愛食ê養樂多、冰淇淋té tńg去厝，我kuānn tī手--裡，有食koh有掠，規个人有夠滿足--ê--lah！
Lán庄跤人ê熱情m̄-nā án-ne niâ，辦桌ê主人家，koh ē kā中晝賰ê菜尾，煮煮做一鍋，pun hōo厝邊頭尾。阮阿母ē kā菜尾，摻寡飯落去焢做飯湯，暗頓就免koh tshuân--ah。
來北部徛起20幾冬--ah，罕得koh食著細漢時ê辦桌，趁機會kā辦桌ê情景寫--落-來，發現記憶中辦桌ê菜，一項一項tī我ê頭殼內，記kah tsiah-nī仔清楚。我想，tse是我對細漢時生活ê相思；mā是我對故鄉深深ê思念。透過tsit篇文章，kā現此時ê我、kap細漢時ê我koh kap做伙，hōo我ê人生koh-khah圓滿。
