台文通訊BONG報: 《予你的歌》專輯創作分享

主講／阿　達

記錄／吳宛霖

本文是2023/11/8「台語sa攏有」講座ê摘要記錄，阿達是農村武裝青年樂團主唱兼團長。

台語sa攏有 - YouTube 頻道

今仔日現場鬧熱滾滾，農村武裝青年樂團主唱兼團長阿達紮伊ê新專輯kā逐家分享，其中《予你的歌》是tsit三年內寫ê第一條歌，有囡仔了後，發覺生活變化真大，沓沓仔ē思考老爸ê角色是啥mi̍h。過去，阿達ê老爸khah無啥teh講話，阿達hām老爸之間有距離，tiānn-tiānn ài臆老爸teh想啥；tsit-má換阿達做老爸--ah，伊無希望囡仔hām伊以前仝款想著老爸ē驚，希望至少想著老爸ē愛笑，若有啥mih話lóng ē-tàng對老爸講出喙，tse是阿達對囡仔ê期待，希望囡仔ē-tàng án-ne大漢。

阿達感覺囡仔透過老爸、老母來到tsis个世間，是自由ê性命，ē行出伊家己ê人生，革命m̄是kan-na tī街頭，生囝、教囡仔mā是一種革命，ài tuì教育開始做起。三年來雖然是教囡仔，m̄-koh阿達感覺伊顛倒是hōo囡仔教khah濟，譬如講，你若是拍囡仔，以後囡仔就ē拍--人，囡仔ē學大人，所以大人ài做hōo囡仔看。阿達厝--裡有一个冷靜區，kiōng-beh掠狂ê時，就去冷靜區冷靜，三年外來，阿達ê脾氣變kah tsiânn好。

阿達想beh揣台語囡仔伴，tī庄跤suah比tī都市koh-khah困難，阿達蹛彰化二林，尾--à tī台中tsiah揣著一个台語囡仔伴。阿達自細漢慣勢kap厝--裡ê人講台語，自太太有身，阿達真自然就對太太ê大腹肚講台語。阿達ê太太tī iáu無囡仔進前，伊無法度講一句完整ê台語，m̄-koh伊用三年外ê時間學習，tsit-má ē-tàng hām囡仔完全講台語--ah，tse是《阿母的話》tsit條歌ê創作來源。

公視台語台beh製作《無事坐巴士》tsit个節目進前，製作人邀請阿達做片頭ê歌。阿達ê老爸、老母tī彰化客運服務，伊自細漢就是坐公車、坐bá-suh大漢--ê，沿路lóng是種茶、種王梨。阿達kā細漢ê記持寫入去歌內，kā tsit首歌唱hōo老母聽ê時，老母聽kah流目屎，因為老爸無tī--leh--ah，阿達寫對老爸ê siàu念，其實是老母對阿達老爸ê siàu念。

阿達tī 2006年開始寫台語歌，細漢聽陳明章、朱約信、伍佰、蕭福德等老師ê歌大漢，學in ê歌來寫詞，發覺用台語表達kap華語是無仝--ê。阿達八冬前開始學月琴，koh去台南揣周定邦老師學唸歌、白話字，學白話字ê過程中開始意識--著，台語m̄是kan-na講話niâ，字bē-tàng烏白寫，迷眾lóng teh看，應該kā字寫hōo tio̍h，tsiah是正式ê語言。阿達in老母mā ē看公視台語台ê字幕，學按怎寫。

《漉糊仔田之歌》歌詞內底「鼻仔頭」是源泉ê舊地名，tsit條歌是為著彰化二水鄉源泉村「源泉社區」所寫--ê，寫出來beh hām阿公阿媽做伙唱。源泉社區有一个活動，五日節收成放水，tī水田khiú大索，tse原本是序大人細漢時tsūn無聊teh sńg ê活動，尾--à變成比賽，koh有獎金thang提，阿達就替tsit个活動寫主題曲。

《開花彼時》是阿達16年來頭一擺寫hōo家己ê歌，以前m̄ bat想beh有家庭，尾--à雄雄想通，感覺有法度面對有一个囡仔ê生活。有囡仔了後，對阿達改變真大，脾氣變好，人生變溫柔。《再會練習曲》是teh講：性命kap性命ê關係內底lóng teh練習講再會，伊uì kap囝ê關係開始想tsit種代誌——以早是Rocker ê角色，m̄驚「再會」，tsit-má ē驚，oo-tóo-bái ē愈騎愈慢，因為想beh看囡仔大漢。

農村武裝青年樂團，創立到tann第16年。少年時用音樂對抗社會ê不公不義，自阿達踏入家庭生活、做老爸了後，面對囡仔每一个時刻ê成長，lóng是性命ê課題。深深體會每一个人lóng是獨立ê性命，lóng有權利tsiânn做心所ǹg望ê家己，無暴力、無壓迫，活出自信kap尊嚴。