主講／莊佳穎
記錄／張翠硯
「轉型正義kap不當黨產」台語講座是由不當黨產處理委員會主辦、李江却台語文教基金會承辦ê系列講座。
本文是2023/9/2講座ê摘要記錄，莊佳穎是台師大台文系教授。
唱家己ê歌
——我ê認同hām語言tńg大人之路
話頭
Tsit擺講座ê講者莊佳穎教授自細漢是音樂班ê學生，生活真單純美好；khah大漢了後，因為想beh熟sāi無仝款ê人，所以選擇讀社會系。Suà--來伊做過記者、參與過社會運動，tsit-má是大學老師，mā是一對雙生仔囝ê阿母。
Uì各方面來思考「語言有個性、有階級」
針對語言使用，莊佳穎分享一寡伊ê觀察。伊先舉一个tsiok日常ê例，便利商店ê店員若看著白人顧客，ē主動kap in講英語，iáu-m̄-koh，類似ê情形若替換做東南亞ê人，lán可能ē感覺顧客華語程度無夠好，hōo雙方互相khah oh理解、溝通。Tī tsiok濟戲齣內底，lán ē看著主角「蹛tī南部ê爸母」講台語，hōo tsit个語言kap地區、家鄉、溫暖連做伙；koh有另外一種設定是，故事內底khah輕鬆、笑詼 ê角色，就講『台灣國語』。
莊佳穎講，lán平常時tsiok tsia̍p聽著『讓世界看見台灣』iah是『台灣之光』，但是別个國家bē有tsit款口號。Tse lóng代表lán tsiânn煩惱別人無看見台灣，tsit款tio̍h急ê心情，kap lán國家發展ê歷史經歷縛做伙。近年通過ê「雙語國家」政策，除了英語，其實法條內底無寫明另外一个語言是啥，m̄-koh大部份ê人就自動認定是華語——tsit寡lán真自然認定ê刻版設定，kám一定是tio̍h--ê？
我ê台語復興之路
莊佳穎自有身開始kap腹肚內ê囡仔講台語，uì上簡單ê生活字詞學起，kap囡仔做伙看台語ê劇團演出。Tī用母語tshiânn養囡仔ê過程中，伊發現，真濟參與台語活動ê家庭，ài uì tsiânn遠ê所在來，ài付出tsiânn濟khuì力kap時間成本，tsiah ē-tàng達成用母語生活ê目標。普遍來講，目前ê台灣社會，重視母語ê家庭是相對khah有經濟資本kap文化資本ê家庭。In ē-tàng hōo囡仔逐種語言lóng顧--著，包含母語。
除了日常kap囡仔講台語、做伙看演出以外，莊佳穎mā為著囡仔出版台語ê公民意識系列繪本。《唱家己的歌》講--ê是「國語政策」、《揣自由的台灣烏熊》講--ê是台灣民主自由ê歷程、《石虎的厝》講--ê是土地正義。莊佳穎認為，囡仔kap母語、公民意識ê距離，決定in認bat世界ê角度kap深度。
Bat一个語言，tsiah ē-tàng認bat一个文化，文化是建立認同上重要ê基礎。若是單純靠翻譯來理解一个語言，真濟細節lóng有可能走精--去。語言無啥可能ē-tàng 100%對應翻譯，逐種語言lóng有伊特有ê語詞。
結尾
莊佳穎認為，lán ài愛家己kap別人ê無仝，tsiah ē-tàng理解世界上濟濟ê精差，tse是公民意識ê核心；生活上ê轉型正義，是用家己認同ê價值觀，發揮家己ê影響力，kā你感覺重要ê議題tshui-sak--出-去。
#轉型正義kap不當黨產 專欄，本文使用教育部推薦漢字kap台羅。
#台文通訊BONG報 357期，2023年12月出刊。
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。
