作者：鍾育紋
起頭，是uì某mí LINE群組ê一條訊息來--ê，內容是leh招台語舞台劇演員，身為看著「台語」兩字目睭就ē金--起-來ê意愛者，三兩下手就kā表單添好勢。其實ài自我反省--ê是，hit-tsūn iáu sa無kài有是leh kā人允啥mih頭路，想講kan-na有tī台仔跤做過戲箱，人講看戲看kah扛戲籠，若準有機會去經驗一下仔一日演員啥mi̍h--ê，應當mā是一層趣味代--lah！
頭洗--落-去tsiah知，任務m̄是阮tsit款坐台仔跤ê人所想像--ê，人he賣票ê演出是無仝坎ê大工事！阮koh m̄是職業ê演員，普通時lóng有家己ê穡頭ài無閒，所以肯khai時間kā liâu--落-去就是頭一个考驗，4--月到6--月劇場拄起鼓ê時，量約仔有十个歇睏日下晝，劇團安排逐家做伙體驗ná童軍hit一樣ê活動來熟sāi劇團伴、探究表演、上台語課、進一步認bat《暗店街》tsit本冊kah美麗島hit段歷史，總算是ná sńg ná學ná倚近任務。「第四人稱表演域」原底是一陣師大話劇社ê有志，tī離開校園了後koh延續少年時ê夢想，好膽來招阮tsit陣對表演、劇團khang-khuè iah是對台語有興趣ê生跤siàu來完成tsit个特別ê挑戰，tsit-má kā想--起-來iáu ē giâu疑in ê膽kám ē siunn大粒--去--ah？
7月初提著初版ê劇本，阮m̄是kā台詞背--起-來、kā跤路創hōo熟niâ，角色搬hōo好kan-na是任務ê一部份，iáu tio̍h負責ta̍p-ta̍p滴滴ê大細項khang-khuè，可比講跳舞、唱歌、做背景人物、搬徙道具等，阮有一位劇團伴講伊頂下場總共ài換八改衫--neh，kan-na tse就hōo伊規齣戲無閒kah。過程當中阮ê編劇兼導演——謝孟璁老師直直提醒講「全無小角色，kan-na小演員」，角色無分大細，lóng有伊的精神tī--leh，阮tio̍h-ài去親近--伊、理解--伊，甚至kā角色ê背景lóng透畫--出-來，角色tsiah搬ē tsiūnn-kioh。啊若台語khah bē-hiáu ê劇團伴，就ài koh斟酌台語ê發音，好得阮m̄-nā有陳豐惠老師、吳玉祥老師來kā阮指導，A、B組演員內底mā有bē少台語教師，lóng ē tàu聽、tàu掠欠點，ē-sái講是逐家心sio倚、手sio牽，互相幫贊鬥陣進步！
〈暗島〉tsit齣戲有兩條主要ê故事線，一條是uì法國經典文學《暗店街》來發想--ê——吳明失去記持40冬，tī 2024年ê一个機緣下勇敢踏--出-去，beh走揣家己拍m̄見--ê是啥mi̍h；另外一條線是1979年ê「美麗島事件」，tsit層影響著台灣民主進展ê大事件是又koh按怎hām少年吳明有牽連--leh？故事內底牽涉著人權、自由、同婚、認同、親情等多元ê議題，戲齣--裡koh安插真濟象徵ê意象，初初一下看可能iáu sa無藏tī內底ê意涵，連阮tsia-ê演員對劇情ê理解mā ná親像是uì罩bông行ǹg天清，逐家對編劇ê巧妙安排是tsiâu佩服kah，啊，thang tsiânn做劇團ê一份子實在tsiânn榮幸--lah！
M̄-koh koh-khah按怎我mā kan-na是劇團菜鳥仔niâ，雖然感謝家己ê gōng膽hōo我hānn出sù-sī箍仔，tī正式排戲ê初期，我發現不安、懷疑、家己hām家己sio-ke̍h ê感受是有khah明顯，tī tsia-ê情緒漸退了後，沓沓仔去學按怎tī排練ê變動當中揣著平穩，到kah排練thōng落尾ê hit個月有一寡無仝ê感受勻聊仔浮--起-來，he是榮幸、是感動，mā是歡喜家己透過tsit齣戲hām lán tsit塊土地進一步koh連結--起-來。
今年是第四人稱表演域ê 20週年，tsit齣〈暗島〉是uì 40幾年前ê「美麗島事件」出發--ê，歡迎逐家sio招行入劇場來支持，換角度認bat lán tsit phiàn土地ê過往到現此時，lán來去登島，陪伴伊koh一擺行過bat khàm tī烏暗中，到現時總算天光ê hit tsuā路。
