《A-pah Lí Chhiú Kám Ē Thiàⁿ》/陳俐雯

Thiaⁿ-kóng múi 1 ê gín-á lóng ū un-loán ê ka-têng

Thiⁿ-kong-peh--à ē phài un-jiû ê a-bú, chû-ài ê a-pah

chhiâⁿ kò͘ i ê kiáⁿ

Nā khui-chhùi chhiùⁿ hit tè “Góa ê ka-têng chin khó-ài”

Bí-lē ê khēng tō ē àn sim-koaⁿ-íⁿ-á ti̍t-ti̍t phû--chhut-lâi

Thiaⁿ-kóng lâng ài chò m̄-tio̍h chiah ē hông chhú-hoa̍t

Sī-án-chóaⁿ a-bú bô chò m̄-tio̍h siáⁿ tāi

A-pah ê kûn-thâu put-sî chhiūⁿ chheⁿ-kông-hō͘

lo̍h tī a-bú ê sin-khu-téng

Kám sī a-pah ba̍k-chiu hoe-hoe kā a-bú tòng-chò soa-pau

Chiah ē to-kong-kiàm-iáⁿ àn tēng-khok-khok ê kûn-thâu siā--chhut

Góa ê a-pah ná ē hiah pháiⁿ

Sim-chêng bô-ta-lí-ôa

Thiaⁿ-kóng nā ū si̍t-kó͘ tō ē-sái chhōa a-bú poe lī khó͘-tòaⁿ jîn-seng

Thiaⁿ-kóng nā sī kûn-thâu-bú piàn tēng sè-kài tō ē bô-kâng

Thiaⁿ-kóng nā sī khah kín tōa-hàn ē-tàng kái-piàn it-chhè

Ji̍t-chí hán-tit ū kúi-sî-á an-lêng

Góa kan-na siūⁿ-beh chó͘-tòng ē hō͘ lâng lia̍h-kông ê kiaⁿ-hiâⁿ

A-pah

Kám ē-sái mài koh phah góa ê a-bú, lí ê bó͘

Kám ē-sái hêng góa 1 ê gín-á-lâng

kai ū ê pêng-chēng kap hēng-hok

#台文通訊BONG報 381期，2025年12月出刊。