真m̄值
/ A-hōng
親愛ê L，
聽lín姊--à講，lín老母8/28過身。阮知影你kap lín母--à chiok親， 你是厝--裡唯一ê後生，lín母--à真惜--你，m̄-koh lín老爸chiok嚴。聽著lín母--à過身，chiah想起你mā已經過身15冬--ah！
在世ê時，你是全心投入政治改革ê社運人士。解嚴了，Pandora（『潘朵拉』）ê盒仔拍--開，農運、工運、婦運、環保運動鬧熱phut-phut，自由ê社會滾絞起改革ê大時代。工人運動正是你投入奉獻上濟心力ê階層。Ē記得你講過你欣羨波蘭團結工聯ē-tàng chiâⁿ做執政黨，工會幹部是坐烏頭仔車teh出入。你總是ǹg望有一工，台灣人ē-tàng有以工人為主體ê各行各業ê工會，有正港ē-tàng為勞方出聲、爭取勞權ê工會。M̄-koh你chit个ǹg望，到taⁿ iáu無法度實現。
20年前命運安排，tī超級大財團ê股東大會，你kioh-siàu好，竟然敢kā台頂ê企業家，hoah一聲「經營之鬼」，hō͘大頭家真bē爽，然後警察直接kā你拖出去bok。
當然，經營之鬼無hiah簡單放你煞，in兜ê法務人員開始揣法條來追殺--你。事件了後，工會幹部對你突然發難，並無諒解。你只好離開工會箍仔，tńg去後山教冊。
M̄-koh，法院ê傳票iáu是一張一張寄去lín後山ê厝--裡。你完全無beh chhap-siâu外來政權開ê法院，koh-khah免講in beh安ê罪名，用你單純ê志氣做無聲ê對抗。
Tńg去後山ê你，日子並無khah平靜。看黨國殖民教育iáu是leh用大中國思想，教「國文」ê你，定著教kah人格分裂。另外tī後山，弱勢族群被壓迫ê命運，你tī教學現場，koh-khah是沉重ê現實。有一段時間，你無做代課老師，tī病院做看護士。正港實踐左派信念來過日子，去做上基層、上倚弱勢ê khang-khòe。
後--來你『屢傳不到』，中華民國ê賊頭，提拘票，飛去後山kā你khok手銬押來台北。你無反抗、無屈服。過去工會親密ê戰友、兄弟，知影你hō͘人押來台北，趕緊chông人chông錢揣律師kā你保--出-來。雖然你lóng笑笑、態度輕鬆，m̄-koh，孤人面對財團ê追殺、國家機器替財團出頭、孤身一人出庭，hit種壓力m̄是凊彩人承擔ē起。阮知當時ê官司對你後--來精神狀態ê影響，留落日後ê病因。一句「經營之鬼」，上尾是付出性命ê代價！
當年，kap你同齊tī街頭作戰ê有志，濟濟去做官，mā有tńg去主流社會食死頭路。行過為理想拍拚ê年代，2008年保守勢力koh奪權成功以後，敬佩你iáu是tī基層堅持理想，無妥協、無反背當時ê初衷。
親愛ê L，你離開chit 15冬。你無參與--著ê台灣社會，看--起-來káⁿ-ná有進步，實際上是「進一步退兩步」ê局面。奴隸chiâⁿ做主人，翻身無hiah-nī輕可。現此時是網路時代，資訊流通真緊，soah koh-khah死。正義公平顛倒無法度看現現，hō͘假消息烏講做白，偏偏台灣人死個性：好騙歹教，sian教教bē ē，學bē乖。
親愛ê L，你閃過chit个錯亂ê時代，無啥mih損失。社會現況kap古早仝款，台奸一代一代出，榮華富貴人人欣羨，愈bē見笑愈大尾。歷史無清算，甚至顛倒páiⁿ，chiah是可惡。
目前是台奸、買辦，chiâⁿ做阿共ê細漢。局勢變化真大、真險，敵人手路愈來愈幼，m̄是過去hit種恐hat威脅，是落軟poa̍h感情、利益共生，kā你拍m̄知疼hit種有策略ê侵略。獨派iáu是票房毒藥，甚至比15冬前koh-khah無出手ê空間，hō͘中華民國派食死死。
寫到chia，躊躇kám beh kā你報告後山ê現況？你若知chit-má ê後山比15年前koh-khah烏暗，任由買辦chhiàng鬚、chiâⁿ做一个賊窟，m̄知你ē偌nī怨chheh、m̄甘願。
你過身進前講：「南美洲革命家Che Guevara（『切格瓦拉』）kan-na活37年，啊我明年就37歲--ah！」想bē到，chhoàn講chhoàn tio̍h。你真正kap革命家仝歲數就離世。
想起你行--過ê跤跡，對照你beh拍倒ê惡，無限感慨！
聽lín姊--à講，lín老母8/28過身。阮知影你kap lín母--à chiok親， 你是厝--裡唯一ê後生，lín母--à真惜--你，m̄-koh lín老爸chiok嚴。聽著lín母--à過身，chiah想起你mā已經過身15冬--ah！
在世ê時，你是全心投入政治改革ê社運人士。解嚴了，Pandora（『潘朵拉』）ê盒仔拍--開，農運、工運、婦運、環保運動鬧熱phut-phut，自由ê社會滾絞起改革ê大時代。工人運動正是你投入奉獻上濟心力ê階層。Ē記得你講過你欣羨波蘭團結工聯ē-tàng chiâⁿ做執政黨，工會幹部是坐烏頭仔車teh出入。你總是ǹg望有一工，台灣人ē-tàng有以工人為主體ê各行各業ê工會，有正港ē-tàng為勞方出聲、爭取勞權ê工會。M̄-koh你chit个ǹg望，到taⁿ iáu無法度實現。
20年前命運安排，tī超級大財團ê股東大會，你kioh-siàu好，竟然敢kā台頂ê企業家，hoah一聲「經營之鬼」，hō͘大頭家真bē爽，然後警察直接kā你拖出去bok。
當然，經營之鬼無hiah簡單放你煞，in兜ê法務人員開始揣法條來追殺--你。事件了後，工會幹部對你突然發難，並無諒解。你只好離開工會箍仔，tńg去後山教冊。
M̄-koh，法院ê傳票iáu是一張一張寄去lín後山ê厝--裡。你完全無beh chhap-siâu外來政權開ê法院，koh-khah免講in beh安ê罪名，用你單純ê志氣做無聲ê對抗。
Tńg去後山ê你，日子並無khah平靜。看黨國殖民教育iáu是leh用大中國思想，教「國文」ê你，定著教kah人格分裂。另外tī後山，弱勢族群被壓迫ê命運，你tī教學現場，koh-khah是沉重ê現實。有一段時間，你無做代課老師，tī病院做看護士。正港實踐左派信念來過日子，去做上基層、上倚弱勢ê khang-khòe。
後--來你『屢傳不到』，中華民國ê賊頭，提拘票，飛去後山kā你khok手銬押來台北。你無反抗、無屈服。過去工會親密ê戰友、兄弟，知影你hō͘人押來台北，趕緊chông人chông錢揣律師kā你保--出-來。雖然你lóng笑笑、態度輕鬆，m̄-koh，孤人面對財團ê追殺、國家機器替財團出頭、孤身一人出庭，hit種壓力m̄是凊彩人承擔ē起。阮知當時ê官司對你後--來精神狀態ê影響，留落日後ê病因。一句「經營之鬼」，上尾是付出性命ê代價！
當年，kap你同齊tī街頭作戰ê有志，濟濟去做官，mā有tńg去主流社會食死頭路。行過為理想拍拚ê年代，2008年保守勢力koh奪權成功以後，敬佩你iáu是tī基層堅持理想，無妥協、無反背當時ê初衷。
親愛ê L，你離開chit 15冬。你無參與--著ê台灣社會，看--起-來káⁿ-ná有進步，實際上是「進一步退兩步」ê局面。奴隸chiâⁿ做主人，翻身無hiah-nī輕可。現此時是網路時代，資訊流通真緊，soah koh-khah死。正義公平顛倒無法度看現現，hō͘假消息烏講做白，偏偏台灣人死個性：好騙歹教，sian教教bē ē，學bē乖。
親愛ê L，你閃過chit个錯亂ê時代，無啥mih損失。社會現況kap古早仝款，台奸一代一代出，榮華富貴人人欣羨，愈bē見笑愈大尾。歷史無清算，甚至顛倒páiⁿ，chiah是可惡。
目前是台奸、買辦，chiâⁿ做阿共ê細漢。局勢變化真大、真險，敵人手路愈來愈幼，m̄是過去hit種恐hat威脅，是落軟poa̍h感情、利益共生，kā你拍m̄知疼hit種有策略ê侵略。獨派iáu是票房毒藥，甚至比15冬前koh-khah無出手ê空間，hō͘中華民國派食死死。
寫到chia，躊躇kám beh kā你報告後山ê現況？你若知chit-má ê後山比15年前koh-khah烏暗，任由買辦chhiàng鬚、chiâⁿ做一个賊窟，m̄知你ē偌nī怨chheh、m̄甘願。
你過身進前講：「南美洲革命家Che Guevara（『切格瓦拉』）kan-na活37年，啊我明年就37歲--ah！」想bē到，chhoàn講chhoàn tio̍h。你真正kap革命家仝歲數就離世。
想起你行--過ê跤跡，對照你beh拍倒ê惡，無限感慨！
