我ê少年阿媽
/ 田美瑜
舊年歇熱因為一寡因端，阿爸、阿母kah我參詳，講歇熱beh送我去台北kah阿媽蹛。印象中ê阿媽是三寶身體，tiānn-tiānn講伊頭眩目暗，無，就是leh掠兔仔。我想，蹛tī hia應該tsiânn自由自在，就tìm頭答應。
阿媽已經是半ló老ê婦jîn人，不而過阿媽留長頭毛，頭毛烏sìm-sìm，伊ê穿插koh tsiânn時行，行tī伊ê後壁，叫是伊是佗位來ê少年家。便若拄著厝邊隔壁lóng叫伊「“siàu-liân” 阿媽」，是因為阿媽拄著別人面lóng笑笑--hiooh？哪ē叫伊『笑臉』阿媽--leh？後--來tsiah知影，in是講「少年阿媽」。
來台北了後，我感覺阿媽tsiânn趣味，因為伊kah我仝款，mā ē逐工sńg手機仔，問伊leh做啥mi̍h，伊講伊kā舊厝無leh用ê冊桌kah椅仔提去kah面友換mi̍h件。本底想無阿媽是leh pìnn啥báng，有一工阿媽喙笑目笑，手--裡提換--來ê禮券，招我去se̍h百貨公司，koh講beh買tshit-thô-mih仔hōo--我，我tsiah相信伊講--ê是tsiânn實--ê。
少年阿媽齣頭tsiânn濟，伊ē kah我搶用電腦。怪奇！老大人kám m̄是lóng bē-hiáu用電腦？伊suah tī電腦頭前坐規工，大聲kā叫lóng無聽--著，我真giâu疑伊是m̄是leh拍電動。斟酌kā看，阿媽竟然是leh寫台語文章，伊講「話是風，字是蹤」，所以ài kā台語寫--落-來。
Mài看阿媽寫--ê是台語文章，suah三不五時làu英語。伊講伊以早出業了後，本底是去英語補習班教英語，後--來是因為有囡仔tsiah換khang-khuè。所致阿媽有時仔ē教我背英語ê撇步，講學英語ài知影伊ê規則，koh kah我做伙看英語節目，去圖書館揣英語雜誌做伙聽。伊講語言不管是台語、華語、英語lóng tsiânn重要，因為tse是lán溝通ê工具。
Tī厝--裡電腦搶bē贏阿媽，感覺真無聊。阿媽講我ē-sái sńg Wii Sports，內底有桌球、羽毛球、比劍、射箭……，阿媽koh招我做伙sńg羽毛球。看阿媽hiah-nī lám身，想講伊一定ē輸kah褪褲，就kah伊拚輸贏。想bē到輸kah褪褲ê人是我，因為伊逐工lóng leh sńg tsit款運動。伊講伊是lám-lám馬mā有一步踢，koh講語言是「tsia̍p講喙ē順」，其他ê代誌就是ài「tsia̍p做手tsiah bē鈍」。
問阿媽是按怎ài學hiah-nī仔濟mi̍h件，伊講人ài活到老、學到老。伊mā tiānn-tiānn分享一寡tī面冊ē用--著ê步數。有時仔看伊tsiânn忝頭--ah，換我趕伊去歇睏，伊suah講做代誌就是ài綿死綿爛做，tsiah ē成功。
我想，阿媽伊學逐項mi̍h件ê態度bē輸少年家，莫怪厝邊隔壁ē叫伊「少年阿媽」。
阿媽已經是半ló老ê婦jîn人，不而過阿媽留長頭毛，頭毛烏sìm-sìm，伊ê穿插koh tsiânn時行，行tī伊ê後壁，叫是伊是佗位來ê少年家。便若拄著厝邊隔壁lóng叫伊「“siàu-liân” 阿媽」，是因為阿媽拄著別人面lóng笑笑--hiooh？哪ē叫伊『笑臉』阿媽--leh？後--來tsiah知影，in是講「少年阿媽」。
來台北了後，我感覺阿媽tsiânn趣味，因為伊kah我仝款，mā ē逐工sńg手機仔，問伊leh做啥mi̍h，伊講伊kā舊厝無leh用ê冊桌kah椅仔提去kah面友換mi̍h件。本底想無阿媽是leh pìnn啥báng，有一工阿媽喙笑目笑，手--裡提換--來ê禮券，招我去se̍h百貨公司，koh講beh買tshit-thô-mih仔hōo--我，我tsiah相信伊講--ê是tsiânn實--ê。
少年阿媽齣頭tsiânn濟，伊ē kah我搶用電腦。怪奇！老大人kám m̄是lóng bē-hiáu用電腦？伊suah tī電腦頭前坐規工，大聲kā叫lóng無聽--著，我真giâu疑伊是m̄是leh拍電動。斟酌kā看，阿媽竟然是leh寫台語文章，伊講「話是風，字是蹤」，所以ài kā台語寫--落-來。
Mài看阿媽寫--ê是台語文章，suah三不五時làu英語。伊講伊以早出業了後，本底是去英語補習班教英語，後--來是因為有囡仔tsiah換khang-khuè。所致阿媽有時仔ē教我背英語ê撇步，講學英語ài知影伊ê規則，koh kah我做伙看英語節目，去圖書館揣英語雜誌做伙聽。伊講語言不管是台語、華語、英語lóng tsiânn重要，因為tse是lán溝通ê工具。
Tī厝--裡電腦搶bē贏阿媽，感覺真無聊。阿媽講我ē-sái sńg Wii Sports，內底有桌球、羽毛球、比劍、射箭……，阿媽koh招我做伙sńg羽毛球。看阿媽hiah-nī lám身，想講伊一定ē輸kah褪褲，就kah伊拚輸贏。想bē到輸kah褪褲ê人是我，因為伊逐工lóng leh sńg tsit款運動。伊講伊是lám-lám馬mā有一步踢，koh講語言是「tsia̍p講喙ē順」，其他ê代誌就是ài「tsia̍p做手tsiah bē鈍」。
問阿媽是按怎ài學hiah-nī仔濟mi̍h件，伊講人ài活到老、學到老。伊mā tiānn-tiānn分享一寡tī面冊ē用--著ê步數。有時仔看伊tsiânn忝頭--ah，換我趕伊去歇睏，伊suah講做代誌就是ài綿死綿爛做，tsiah ē成功。
我想，阿媽伊學逐項mi̍h件ê態度bē輸少年家，莫怪厝邊隔壁ē叫伊「少年阿媽」。
