籤詩57
/ 吳雪鳳
日花ùi青lèng-lèng ê樹葉縫直透--出-來。Hâm-chhiàu一蕊一蕊tī樹oe文文仔笑。Khah無一粒綠豆hiah大ê lâ-giâ，tī koân-koân ê枝oe垂一條幼絲線落--來，近近行倚--來ê查某囡仔káⁿ-ná無看--見，che若sio挵免不了ki-ki叫。
M̄知ùi tī時開始，我ê目睭有koh-iūⁿ，像電視廣告leh講「目睭bông霧，pû仔看做菜瓜」。路邊招牌寫「日式關東煮」，hiau-hēng，我看做「母式關東煮」，家己koh愛笑講，「kám有 “公式關東煮”」？幾若擺不時看têng-tâⁿ，chiah感覺代誌無啥tùi-tâng。
趁眼科按時回診ê日子kā醫師nauh：「Chit站仔我目睭無kài明，kám ē是koh出血？Ah是我老人目？」頂擺我目睭出血是chiâⁿ凶險，出血ê所在ài注射，目睭hia血筋只有一枝頭毛ê十份一hiah粗，若無細膩，一下仔就chheⁿ-mê。兩間病院ê醫師lóng講風險siuⁿ koân，m̄敢替我手術，一直到拄著chit-má ê視網膜專科醫師chiah治療好勢。
醫師聽我nauh，叫我坐hō͘倚近儀器， 聽伊指示目睭看頂koân、下跤、正爿、倒爿，sòa--落-來看中ng。結果一時仔就出--來，比出血khah好一屑屑仔ê歹消息，oân-á hō͘我聽loeh到tè跤尾冷--去。我面青sún-sún，醫生安慰講，先點藥仔看māi，伊ná拍病歷ná解soeh：「萬不幸藥水無效，iáu是ài考慮開刀。」暫時免tī我目睭仁來liô刀，我當然連聲應好，我ē tńg去乖乖點目藥水。
時間過一冬外，每一季tńg去病院回診ê檢查報告lóng無kài理想，我對藥水ê反應無好，一擺koh一擺檢測數字有夠歹看。有tang時仔，連驗光師to叫是我看bē著，無hō͘我掛矯正目鏡。Chéng頭仔tī我眼前30公分、一公尺、兩公尺ê所在比，問我kám看ē著。「我是看bē著he字母 “︁E” ê喙開tī佗位niâ，就m̄是chheⁿ-mê koh！」心內án-ne jiáng。
終尾，年初chit擺回診，醫師看過報告了後，kā我苦勸：「你早慢ài開刀，冗早做決定」，tùn-teⁿ--一-下koh講：「囥酒ē芳，囥病ē重，拖--落-去ke食力--ê，ē去拖累bat出血ê倒爿目睭，你考慮看māi。」講到chit个坎站，我iáu-koh m̄ tàm頭，喙硬應醫師講：「冊--裡ê字我iáu看有，iáu ē-tàng拍電腦！」我就m̄好講我連空氣中eng-ia mā看現現。
心內其實真知影愈來愈bông霧，kám騙ē過儀器檢測kah醫師ê老經驗？M̄-koh開刀--neh，想著目睭金金看醫師leh操作，我就驚kah phi̍h-phi̍h-chhoah。所擺，開刀chit件代誌就像石頭硩 tī我心肝頭，日夜lóng bē輕鬆。
自認性命遭逢羅孛關，想著來去我chiâⁿ信任ê行天宮拜拜，求神明kā我看手術運途如何。虔誠跪tī拜墊，beh哭beh滴雙手合十kā恩主公稟報我發生啥代誌，像囡仔sai-nai leh問是m̄是信任阮醫師ê醫術，緊開緊好m̄免驚？
誠心poa̍h-poe，清脆聲音迴響在拜埕，我一下看就是siūⁿ-poe！Che siūⁿ-poe指示像慈悲ê大手kā我罩tī腦海規年ê烏雲ia̍t走。神明to án-ne講--ah，免驚！是講，有恩主公ê siūⁿ-poe加油，sòa--落-來換煩惱空喙疼，驚麻醉無夠力，正經是「一日煩惱無夠，一暝煩惱來鬥」，懊惱hit時tī行天宮siuⁿ過樂暢，bē記得求籤、kan-na ē記得恩主公指示緊開刀m̄-thang拖。
人講「心思無定，抽籤算命」就我chit款，為著我che疾患，sì-kè問神開刀ē順序--無。Chit改來到城隍廟，向城隍爺稟明我狀況，拜託城隍爺hō͘我靈籤指示，城隍爺靈感，一下就賜我籤詩第57首，看he意思真好，心內有khah定著。過一兩日tńg去南部，刁工去我ê心靈導師王爺信仰hia，koh問一改開刀ê代誌，王爺無囉嗦，liam-mi就hō͘我指示是第57首。
57，57，57……Che kám m̄是城隍爺oân-á賜一支一模一樣--ê hō͘--我？我將城隍爺ê籤詩提出來看，siàⁿ拄siàⁿ就是仝一支，我雞母皮lóng起--來--ah。
籤詩án-ne寫：
勸君把定心莫虛，
前途清吉得運時，
到底中間無大事，
又遇神仙守安居。
Che是一首溫柔堅定、充滿祝福ê籤詩，尤其對一个beh開刀ê病人來講，是有夠好ê祝福，心情ná像pha碇無koh生驚。我知影籤詩m̄是魔法，神明mā m̄是主刀醫師，凡勢你ē笑我厚khiàn-sńg，南北廟宇行透透。M̄-koh tī我驚惶ê時，薄薄ê一張籤詩代表上天ê ŏ͘-ián，替起驚kah無主張ê我，安搭不安，káⁿ-ná是講：神明to án-ne講--ah，安--lah！
Iáu是ē驚疼，但是有神明ê祝福。Chit擺tńg來門診，我勇敢kā醫生講beh來開刀，已經順利kā所有手術前ê檢查做完，chit-má就照常過日，等待開刀hit工來到。
有hiah濟祝福，我一定ē手術成功平安無事。
M̄知ùi tī時開始，我ê目睭有koh-iūⁿ，像電視廣告leh講「目睭bông霧，pû仔看做菜瓜」。路邊招牌寫「日式關東煮」，hiau-hēng，我看做「母式關東煮」，家己koh愛笑講，「kám有 “公式關東煮”」？幾若擺不時看têng-tâⁿ，chiah感覺代誌無啥tùi-tâng。
趁眼科按時回診ê日子kā醫師nauh：「Chit站仔我目睭無kài明，kám ē是koh出血？Ah是我老人目？」頂擺我目睭出血是chiâⁿ凶險，出血ê所在ài注射，目睭hia血筋只有一枝頭毛ê十份一hiah粗，若無細膩，一下仔就chheⁿ-mê。兩間病院ê醫師lóng講風險siuⁿ koân，m̄敢替我手術，一直到拄著chit-má ê視網膜專科醫師chiah治療好勢。
醫師聽我nauh，叫我坐hō͘倚近儀器， 聽伊指示目睭看頂koân、下跤、正爿、倒爿，sòa--落-來看中ng。結果一時仔就出--來，比出血khah好一屑屑仔ê歹消息，oân-á hō͘我聽loeh到tè跤尾冷--去。我面青sún-sún，醫生安慰講，先點藥仔看māi，伊ná拍病歷ná解soeh：「萬不幸藥水無效，iáu是ài考慮開刀。」暫時免tī我目睭仁來liô刀，我當然連聲應好，我ē tńg去乖乖點目藥水。
時間過一冬外，每一季tńg去病院回診ê檢查報告lóng無kài理想，我對藥水ê反應無好，一擺koh一擺檢測數字有夠歹看。有tang時仔，連驗光師to叫是我看bē著，無hō͘我掛矯正目鏡。Chéng頭仔tī我眼前30公分、一公尺、兩公尺ê所在比，問我kám看ē著。「我是看bē著he字母 “︁E” ê喙開tī佗位niâ，就m̄是chheⁿ-mê koh！」心內án-ne jiáng。
終尾，年初chit擺回診，醫師看過報告了後，kā我苦勸：「你早慢ài開刀，冗早做決定」，tùn-teⁿ--一-下koh講：「囥酒ē芳，囥病ē重，拖--落-去ke食力--ê，ē去拖累bat出血ê倒爿目睭，你考慮看māi。」講到chit个坎站，我iáu-koh m̄ tàm頭，喙硬應醫師講：「冊--裡ê字我iáu看有，iáu ē-tàng拍電腦！」我就m̄好講我連空氣中eng-ia mā看現現。
心內其實真知影愈來愈bông霧，kám騙ē過儀器檢測kah醫師ê老經驗？M̄-koh開刀--neh，想著目睭金金看醫師leh操作，我就驚kah phi̍h-phi̍h-chhoah。所擺，開刀chit件代誌就像石頭硩 tī我心肝頭，日夜lóng bē輕鬆。
自認性命遭逢羅孛關，想著來去我chiâⁿ信任ê行天宮拜拜，求神明kā我看手術運途如何。虔誠跪tī拜墊，beh哭beh滴雙手合十kā恩主公稟報我發生啥代誌，像囡仔sai-nai leh問是m̄是信任阮醫師ê醫術，緊開緊好m̄免驚？
誠心poa̍h-poe，清脆聲音迴響在拜埕，我一下看就是siūⁿ-poe！Che siūⁿ-poe指示像慈悲ê大手kā我罩tī腦海規年ê烏雲ia̍t走。神明to án-ne講--ah，免驚！是講，有恩主公ê siūⁿ-poe加油，sòa--落-來換煩惱空喙疼，驚麻醉無夠力，正經是「一日煩惱無夠，一暝煩惱來鬥」，懊惱hit時tī行天宮siuⁿ過樂暢，bē記得求籤、kan-na ē記得恩主公指示緊開刀m̄-thang拖。
人講「心思無定，抽籤算命」就我chit款，為著我che疾患，sì-kè問神開刀ē順序--無。Chit改來到城隍廟，向城隍爺稟明我狀況，拜託城隍爺hō͘我靈籤指示，城隍爺靈感，一下就賜我籤詩第57首，看he意思真好，心內有khah定著。過一兩日tńg去南部，刁工去我ê心靈導師王爺信仰hia，koh問一改開刀ê代誌，王爺無囉嗦，liam-mi就hō͘我指示是第57首。
57，57，57……Che kám m̄是城隍爺oân-á賜一支一模一樣--ê hō͘--我？我將城隍爺ê籤詩提出來看，siàⁿ拄siàⁿ就是仝一支，我雞母皮lóng起--來--ah。
籤詩án-ne寫：
勸君把定心莫虛，
前途清吉得運時，
到底中間無大事，
又遇神仙守安居。
Che是一首溫柔堅定、充滿祝福ê籤詩，尤其對一个beh開刀ê病人來講，是有夠好ê祝福，心情ná像pha碇無koh生驚。我知影籤詩m̄是魔法，神明mā m̄是主刀醫師，凡勢你ē笑我厚khiàn-sńg，南北廟宇行透透。M̄-koh tī我驚惶ê時，薄薄ê一張籤詩代表上天ê ŏ͘-ián，替起驚kah無主張ê我，安搭不安，káⁿ-ná是講：神明to án-ne講--ah，安--lah！
Iáu是ē驚疼，但是有神明ê祝福。Chit擺tńg來門診，我勇敢kā醫生講beh來開刀，已經順利kā所有手術前ê檢查做完，chit-má就照常過日，等待開刀hit工來到。
有hiah濟祝福，我一定ē手術成功平安無事。
