火車頭
/ 林宜潔
「101隻忠心ê狗」是我對外公kah外媽in兜ê記持。Éng過kan-na過年ē-tàng tńg去阿母ê故鄉——高雄，阿母in厝蹛tī火車頭後壁，阿母hit爿ê兄弟姊妹內底獨獨生有查某囝--ê就阮母--à一个。人講：『物以稀為貴』，我tī阿母後頭厝完全ē-tàng用chit句話來解soeh。啊若tī阿爸in兜，傳統大家庭ê查某囝是khah m̄值錢，兩爿比--起-來，我ê地位ē-tàng講是天差leh地。
每一冬tòe阿母ùi台北到高雄，有tang時仔是阿爸駛半暝仔ê車，mā bat坐過國內線，koh-khah sù常--ê是坐火車。Tī hit个年代beh tī大日搶著車票，tio̍h-ài tī開始賣票hit工透早5點進前，阿兄kah阿母一人顧一台電話，時間一下到就緊拚勢khà電話，chiah有機會買著車票。不而過，也有搶無著車票ê時chūn，tio̍h-ài等kah beh去ê hit工去松山機場排候補坐飛行機到高雄。逐擺外媽lóng ē先去錄影帶店借Disney ê電影，驚阮tńg--去ē無聊，先kā囡仔ē kah意ê mi̍h件lóng先chhoân--起-來。Koh-khah hō͘我ē記--得--ê是我細漢ê時，有一款鉛筆盒仔chiok時行，chit个盒仔ê機關kài濟，bē輸是機器人--leh，m̄-koh阿母無可能買hō͘--阮，講阮讀冊ē無注心。想bē到hit擺竟然tī外媽in兜看--著。我暢kah問講：「Che是beh hō͘ siáng--ê？」聽著阿媽應講是beh hō͘--阮--ê，真正是歡喜kah kiōng-beh飛--起-來。
外公生做緣投koh飄撇，伊騎ê o͘-tó͘-bái是我大學時chiok濟查埔同學騎ê「野狼125」，我mā bat tī阿母珍藏ê相簿--裡看著我坐tī頂頭kah「野狼125」hip過相--neh！伊騎hit台載外媽ê時，真正有夠phāⁿ--ê。伊少年ê時tī台電做守衛仔，上特別--ê是外公koh有另外一个身份——濟公師父ê童乩。便若外公leh替仙佛辦代誌，in兜門跤口就ē kheh chiok濟信徒sio爭beh參加。我bat tī門口lió過幾秒就hō͘阿母chhōa走--ah。
30冬前對醫療ê概念khah無，外媽得著癌症，無去使用正確ê治療方式，soah相信偏方，無偌久就tòe佛祖去修行。因為外媽ê離開，外公也tī hit時搬tńg去台南祖厝。現此時外公也無tī--leh--ah。Hit間tī高雄火車頭後站一樓ê厝，雖bóng阮無koh再去--過，m̄-koh火車經過鐵枝路ê聲音ē永遠跟tòe tī我ê頭殼內。
每一冬tòe阿母ùi台北到高雄，有tang時仔是阿爸駛半暝仔ê車，mā bat坐過國內線，koh-khah sù常--ê是坐火車。Tī hit个年代beh tī大日搶著車票，tio̍h-ài tī開始賣票hit工透早5點進前，阿兄kah阿母一人顧一台電話，時間一下到就緊拚勢khà電話，chiah有機會買著車票。不而過，也有搶無著車票ê時chūn，tio̍h-ài等kah beh去ê hit工去松山機場排候補坐飛行機到高雄。逐擺外媽lóng ē先去錄影帶店借Disney ê電影，驚阮tńg--去ē無聊，先kā囡仔ē kah意ê mi̍h件lóng先chhoân--起-來。Koh-khah hō͘我ē記--得--ê是我細漢ê時，有一款鉛筆盒仔chiok時行，chit个盒仔ê機關kài濟，bē輸是機器人--leh，m̄-koh阿母無可能買hō͘--阮，講阮讀冊ē無注心。想bē到hit擺竟然tī外媽in兜看--著。我暢kah問講：「Che是beh hō͘ siáng--ê？」聽著阿媽應講是beh hō͘--阮--ê，真正是歡喜kah kiōng-beh飛--起-來。
外公生做緣投koh飄撇，伊騎ê o͘-tó͘-bái是我大學時chiok濟查埔同學騎ê「野狼125」，我mā bat tī阿母珍藏ê相簿--裡看著我坐tī頂頭kah「野狼125」hip過相--neh！伊騎hit台載外媽ê時，真正有夠phāⁿ--ê。伊少年ê時tī台電做守衛仔，上特別--ê是外公koh有另外一个身份——濟公師父ê童乩。便若外公leh替仙佛辦代誌，in兜門跤口就ē kheh chiok濟信徒sio爭beh參加。我bat tī門口lió過幾秒就hō͘阿母chhōa走--ah。
30冬前對醫療ê概念khah無，外媽得著癌症，無去使用正確ê治療方式，soah相信偏方，無偌久就tòe佛祖去修行。因為外媽ê離開，外公也tī hit時搬tńg去台南祖厝。現此時外公也無tī--leh--ah。Hit間tī高雄火車頭後站一樓ê厝，雖bóng阮無koh再去--過，m̄-koh火車經過鐵枝路ê聲音ē永遠跟tòe tī我ê頭殼內。
