田園離療日誌——寒露篇（二）
/ 鄭清和
8月27（2025/10/18）
Tsiânn少看透早ê電視新聞，因為lóng是重覆前一暗--ê。21暗拄好無看，所以8月22 tshím起床就開電視看有新消息--無？看--leh看--leh，眼著嘉義縣番路鄉ê柿仔節，tī半天岩ê紫雲寺舉辦。Hit个所在我bat參加「一日遊」去hia挽柿仔。雄雄想起一句諺語：「紅柿若出頭，羅漢跤仔目屎流。」早期散赤人家，tsiânn濟查埔人去hōo人招，若無，就sì-kè討趁，做羅漢跤仔，tī紅柿開始黃ê時tsūn，天氣mā開始寒，羅漢跤仔無某thang攬燒， 寒天m̄知beh按怎過，想著無某無猴ê淒涼命運，目屎tsiânn自然就tin--落-來！
講著紅柿，我mā目屎流，因為我想著過往ê外媽kah媽媽。外媽ê名號做「紅柿」，我思念--伊；媽媽上愛食紅柿，我siàu念--伊。逐冬我lóng ē hiàm阮牽--ê買紅柿hōo媽媽食，m̄-koh今年已經無機會，媽媽搬去另外一个世界蹛--lah！
8月23暗時ê 7點出仔，有聽著tân雷聲，無大聲，m̄是脆雷，感覺真遠、tsiânn kuân，kánn-ná有一口khuì鬱tiâu--leh。無偌久，窗仔外有聽著雨tī tsa̍h雨棚仔跳舞ê跤步聲，氣象報告無講著ē落雨，是按怎雄雄有tsit tsūn走馬仔雨--neh？我起去網路點開江蕙kah伍思凱合唱ê hit首〈秋雨的彼一暝〉來聽。
Ē記得1996年hit站，我ná聽收音機ná寫高職食品加工科ê教科書，聽著tsit首歌ê時，隨khà電話去冊店hōo tshuā阮後生去買tshit-thô-mih仔ê阮牽--ê，hiàm伊kā我買錄音帶，伊問我歌名，我kan-na ē-hiáu講：「捶捶捶，捶我ê心肝。」冊店ê頭家娘m̄知佗一首，尾--à有一个少年ê查某店員知影歌名，tsiah買--著。Tsit首歌一直陪伴我解心內ê稀微，到kah kā hit本冊寫好。
一暝雨恬恬teh落
月茫茫暗淡ê路¹
雨水ê光影閃閃爍爍
伴阮ê稀微
車行過tse難忘ê城市
是秋雨ê hit一暝
Hit塊錄音帶已經拍m̄見揣無--ah，m̄-koh哀怨ê歌聲iáu留tī我ê腦海中。我特別下載歌詞tuè leh hng，愈唱我suah愈對作詞者熊天益先生有giâu疑，既然雨恬恬teh落，beh哪ē iáu有月娘--neh？Tsit首歌已經流行beh 30冬--ah，kám講lóng無人感覺無tùi-tâng？我tuè leh hng ê時，大主大意kā歌詞改做「路燈茫茫暗淡ê路」。
舊厝ê老厝邊世--à，目睭白內障8月24 beh開刀，因為in翁過身無偌久，無人kā伊載，阮牽--ê答應kā伊tàu-sann-kāng，所以我做ùn-tsiàng駛車，阮牽--ê kā伊扶插。隔工25回診，mā是阮翁仔某kā伊tàu跤手。
世--à因為考慮經濟問題，所以選用傳統ê開刀手術。手術後ài斟酌ê所在有khah濟，bē用得siunn出力搬重mi̍h，bē-tàng ànn腰去提mi̍h， bē-sái目睭bak著水……，禁忌一牛車車bē了。「Kan-na ē-tàng倒tī眠床，bē輸死人--leh！」世--à家己án-ne thuh臭。
暗時，阮牽--ê炒一盤khim胸hōo世--à配飯，伊隨khà電話來講有夠好食，問阮牽--ê看是按怎炒--ê，阮牽--ê回講無撇步，是用九層塔壓味niā-niā。園仔有種五欉九層塔，前一站仔sio連suà落雨，浸死兩欉，賰ê三欉hannh著日頭，葉仔suah lian-lian，本底想講ē死--去，想bē到kánn-ná做m̄-tio̍h代誌頭lê-lê ê囡仔，in ê命koh不止仔韌，慢慢仔復原--起-來。阮牽--ê若tī九層塔發kah真ōm ê時，就ē挽起來囥tī冰箱，煮食遇著ài壓味ê時，suah--一-寡，食--起-來ke tsiânn tio̍h味--neh！
網路流傳講九層塔ē致癌，衛生福利部有解sueh，講九層塔有一種號做「丁香酚」ê成份，但是毒性tsiok低，ē-tàng快速tī人體ê血iah是其他組織中代謝，lán人無食hiah-nī濟，免驚惶。所以，我繼續食，無leh驚，因為只是壓味niâ，m̄是飯照三頓leh食。
26去看目睭，想beh請教醫師看白內障ē-sái手術--未？因為tsiok歹掛號，所以天bâ霧光就出門。行到hit个搭leh稅--人ê khàm亞鉛phiánn ê停車場，hit兩欉徛tī門口雙爿ê松柏仔，in ê針葉尾溜有tsiok濟露水吊掛tī hia，ná精光ê囡仔ê目睭，掠我金金看，有夠古錐--ê--lah！
我用二tsáinn去摸，tsiânn涼--neh！涼意按手tsíng頭仔傳到頭殼內。金代文學家王寂tī〈菩薩蠻．回文題扇圖〉tsit首用回文技巧寫ê詞，內底hit句「碧空寒露松枝滴，滴枝松露寒空碧。」，tī我ê腦海se̍h-lin-long，一直tńg-se̍h、一直回轉：
碧空寒露松枝滴，
滴枝松露寒空碧；
山遠抱溪灣，灣溪抱遠山；
竹疏橫岸曲，曲岸橫疏竹；
寒鷺宿平灘，灘平宿鷺寒。
碧藍色ê天跤下，露水uì松仔枝滴--落-來；露水一滴一滴，滴tī松仔枝，寒冷ê天頂是碧藍色--ê。我攑頭看天，眼前浮出tsit幅畫。
想bē到拄tshiâu好9--月beh手術倒蕊，醫師tī進一步檢查ê時，發現我ê正蕊有一跡紅點，伊koh詳細檢查倒蕊，好佳哉，並無發現紅點。醫師講若兩蕊lóng有，就是糖尿病引起--ê，後日仔嚴重可能ē失明；kan-na一蕊有，是目睭中風ê現象，隨安排下晡目睭ài注射，而且逐個月注一遍，注到好，逐擺自費5,000箍，健保無支付。
正蕊注射了，目睭頭小可仔疼疼，目睭用紗布am--leh，講ài隔工睏--起-來tsiah ē-tàng拆。正蕊看無，倒蕊koh因為早起檢查ê時，有點『散瞳劑』，看mi̍h件霧sà-sà，kánn-ná寒天行tī bông霧中，跤步m̄敢hua̍h--出-去，kā阮牽--ê khiú-tiâu-tiâu，驚跋倒。阮牽--ê安搭--我：「Tuè我慢慢仔行，免驚！」，suà--lueh唱蕭煌奇hit首〈你是我的眼〉，伊kā歌詞改做：『我是你的眼！』，我有講bē出ê感動，kā伊khiú koh-khah ân--leh。
27早起回診，醫師講注射了正常，目藥水照時間點就ē-sái。另外，排9月初8 beh kā我ê正蕊拍雷射。
Tsiânn少看透早ê電視新聞，因為lóng是重覆前一暗--ê。21暗拄好無看，所以8月22 tshím起床就開電視看有新消息--無？看--leh看--leh，眼著嘉義縣番路鄉ê柿仔節，tī半天岩ê紫雲寺舉辦。Hit个所在我bat參加「一日遊」去hia挽柿仔。雄雄想起一句諺語：「紅柿若出頭，羅漢跤仔目屎流。」早期散赤人家，tsiânn濟查埔人去hōo人招，若無，就sì-kè討趁，做羅漢跤仔，tī紅柿開始黃ê時tsūn，天氣mā開始寒，羅漢跤仔無某thang攬燒， 寒天m̄知beh按怎過，想著無某無猴ê淒涼命運，目屎tsiânn自然就tin--落-來！
講著紅柿，我mā目屎流，因為我想著過往ê外媽kah媽媽。外媽ê名號做「紅柿」，我思念--伊；媽媽上愛食紅柿，我siàu念--伊。逐冬我lóng ē hiàm阮牽--ê買紅柿hōo媽媽食，m̄-koh今年已經無機會，媽媽搬去另外一个世界蹛--lah！
8月23暗時ê 7點出仔，有聽著tân雷聲，無大聲，m̄是脆雷，感覺真遠、tsiânn kuân，kánn-ná有一口khuì鬱tiâu--leh。無偌久，窗仔外有聽著雨tī tsa̍h雨棚仔跳舞ê跤步聲，氣象報告無講著ē落雨，是按怎雄雄有tsit tsūn走馬仔雨--neh？我起去網路點開江蕙kah伍思凱合唱ê hit首〈秋雨的彼一暝〉來聽。
Ē記得1996年hit站，我ná聽收音機ná寫高職食品加工科ê教科書，聽著tsit首歌ê時，隨khà電話去冊店hōo tshuā阮後生去買tshit-thô-mih仔ê阮牽--ê，hiàm伊kā我買錄音帶，伊問我歌名，我kan-na ē-hiáu講：「捶捶捶，捶我ê心肝。」冊店ê頭家娘m̄知佗一首，尾--à有一个少年ê查某店員知影歌名，tsiah買--著。Tsit首歌一直陪伴我解心內ê稀微，到kah kā hit本冊寫好。
一暝雨恬恬teh落
月茫茫暗淡ê路¹
雨水ê光影閃閃爍爍
伴阮ê稀微
車行過tse難忘ê城市
是秋雨ê hit一暝
Hit塊錄音帶已經拍m̄見揣無--ah，m̄-koh哀怨ê歌聲iáu留tī我ê腦海中。我特別下載歌詞tuè leh hng，愈唱我suah愈對作詞者熊天益先生有giâu疑，既然雨恬恬teh落，beh哪ē iáu有月娘--neh？Tsit首歌已經流行beh 30冬--ah，kám講lóng無人感覺無tùi-tâng？我tuè leh hng ê時，大主大意kā歌詞改做「路燈茫茫暗淡ê路」。
舊厝ê老厝邊世--à，目睭白內障8月24 beh開刀，因為in翁過身無偌久，無人kā伊載，阮牽--ê答應kā伊tàu-sann-kāng，所以我做ùn-tsiàng駛車，阮牽--ê kā伊扶插。隔工25回診，mā是阮翁仔某kā伊tàu跤手。
世--à因為考慮經濟問題，所以選用傳統ê開刀手術。手術後ài斟酌ê所在有khah濟，bē用得siunn出力搬重mi̍h，bē-tàng ànn腰去提mi̍h， bē-sái目睭bak著水……，禁忌一牛車車bē了。「Kan-na ē-tàng倒tī眠床，bē輸死人--leh！」世--à家己án-ne thuh臭。
暗時，阮牽--ê炒一盤khim胸hōo世--à配飯，伊隨khà電話來講有夠好食，問阮牽--ê看是按怎炒--ê，阮牽--ê回講無撇步，是用九層塔壓味niā-niā。園仔有種五欉九層塔，前一站仔sio連suà落雨，浸死兩欉，賰ê三欉hannh著日頭，葉仔suah lian-lian，本底想講ē死--去，想bē到kánn-ná做m̄-tio̍h代誌頭lê-lê ê囡仔，in ê命koh不止仔韌，慢慢仔復原--起-來。阮牽--ê若tī九層塔發kah真ōm ê時，就ē挽起來囥tī冰箱，煮食遇著ài壓味ê時，suah--一-寡，食--起-來ke tsiânn tio̍h味--neh！
網路流傳講九層塔ē致癌，衛生福利部有解sueh，講九層塔有一種號做「丁香酚」ê成份，但是毒性tsiok低，ē-tàng快速tī人體ê血iah是其他組織中代謝，lán人無食hiah-nī濟，免驚惶。所以，我繼續食，無leh驚，因為只是壓味niâ，m̄是飯照三頓leh食。
26去看目睭，想beh請教醫師看白內障ē-sái手術--未？因為tsiok歹掛號，所以天bâ霧光就出門。行到hit个搭leh稅--人ê khàm亞鉛phiánn ê停車場，hit兩欉徛tī門口雙爿ê松柏仔，in ê針葉尾溜有tsiok濟露水吊掛tī hia，ná精光ê囡仔ê目睭，掠我金金看，有夠古錐--ê--lah！
我用二tsáinn去摸，tsiânn涼--neh！涼意按手tsíng頭仔傳到頭殼內。金代文學家王寂tī〈菩薩蠻．回文題扇圖〉tsit首用回文技巧寫ê詞，內底hit句「碧空寒露松枝滴，滴枝松露寒空碧。」，tī我ê腦海se̍h-lin-long，一直tńg-se̍h、一直回轉：
碧空寒露松枝滴，
滴枝松露寒空碧；
山遠抱溪灣，灣溪抱遠山；
竹疏橫岸曲，曲岸橫疏竹；
寒鷺宿平灘，灘平宿鷺寒。
碧藍色ê天跤下，露水uì松仔枝滴--落-來；露水一滴一滴，滴tī松仔枝，寒冷ê天頂是碧藍色--ê。我攑頭看天，眼前浮出tsit幅畫。
想bē到拄tshiâu好9--月beh手術倒蕊，醫師tī進一步檢查ê時，發現我ê正蕊有一跡紅點，伊koh詳細檢查倒蕊，好佳哉，並無發現紅點。醫師講若兩蕊lóng有，就是糖尿病引起--ê，後日仔嚴重可能ē失明；kan-na一蕊有，是目睭中風ê現象，隨安排下晡目睭ài注射，而且逐個月注一遍，注到好，逐擺自費5,000箍，健保無支付。
正蕊注射了，目睭頭小可仔疼疼，目睭用紗布am--leh，講ài隔工睏--起-來tsiah ē-tàng拆。正蕊看無，倒蕊koh因為早起檢查ê時，有點『散瞳劑』，看mi̍h件霧sà-sà，kánn-ná寒天行tī bông霧中，跤步m̄敢hua̍h--出-去，kā阮牽--ê khiú-tiâu-tiâu，驚跋倒。阮牽--ê安搭--我：「Tuè我慢慢仔行，免驚！」，suà--lueh唱蕭煌奇hit首〈你是我的眼〉，伊kā歌詞改做：『我是你的眼！』，我有講bē出ê感動，kā伊khiú koh-khah ân--leh。
27早起回診，醫師講注射了正常，目藥水照時間點就ē-sái。另外，排9月初8 beh kā我ê正蕊拍雷射。
1 編註：〈秋雨的彼一暝〉，熊天益作詞、作曲，歌詞漢羅用字有調整。
