Dengue Fever 台語叫做天狗熱，另外有一个khah古早ê名，號做「斷骨熱」，賴教授講伊mā m̄-bat聽--過。天狗熱ê病毒，透過埃及斑蠓kap白線斑蠓叮--人來傳染，病毒分做一般--ê kap出血--ê，一般ê天狗熱病毒無啥症頭。出血ê天狗熱有四型，若是hōo帶仝種病毒ê蠓叮--著，大部份ê人是無啥mih要緊，kan-ta干焦ē小可仔發炎niâ。所以，其實真濟人bat tio̍h過天狗熱，家己to m̄知--leh。Án-ne lán tī電視看--著，險仔khiau--去ê hit種天狗熱是按怎來--ê--leh？一般認為是去hōo帶無仝種出血型天狗熱病毒ê蠓叮--著，體內ê無仝種病毒抗體tshia̋ng-póng，tsiah ē出現嚴重ê症頭，m̄-koh詳細ê機制iáu無清楚。也就是講，若bat hōo帶出血天狗熱第一型病毒ê蠓叮--著，koh去hōo帶第二型iah是第三、第四型ê蠓叮--著，就ē出現天狗熱綜合症，像發燒、出癖、規身軀關節痠疼、想beh吐、拍寒拍熱、喙鼻出血、急性肝炎tsit寡症頭。M̄-koh tsit寡症頭，tio̍h ma-ná-lí-á iah是日本腦炎mā是ē有，iáu是ài去檢驗tsiah知影是m̄是天狗熱。
一般來講，天狗熱對大人來講無kài危險，有好好仔治療lóng ē好，致死率無到1 pha。Khah危險--ê是發生tī細漢囡仔，iah是身體khah lám ê大人。雖然天狗熱有預防射，m̄-koh ài khai tsiok濟錢，而且對細漢囡仔來講khah危險。像菲律賓tī 2015年，hōo囡仔注預防射，造成tsiok濟細漢囡仔注了，tio̍h天狗熱ê風險顛倒比無注--ê khah kuân，失去預防射beh預防ê意義。Khah有效ê防治辦法就是uì蠓仔落手，kā一寡積水ê所在清清--leh，hōo蠓仔無法度生湠，iah是tsuānn藥仔來thāu蠓仔。尤其埃及斑蠓主要bih tī室內，kap人類生活ê所在仝款，是對人類khah有威脅ê蠓。In lóng是tī北回歸線以南khah濟，南部ê天狗熱病情khah厚就是án-ne。另外一種白線斑蠓，主要tī室外生活，若是1500米以下ê所在lóng ē有，去外口tshit-thô就ài khah注意--leh。
編按：本文是8/16棲地復育台語講座－天狗熱按怎治？」 講座摘要記錄，主講者是台大獸醫系名譽教授賴秀穗。台灣蠻野心足生態協會舉辦ê「蠻野講堂」tuì 2019年3月份起kap李江却台語文教基金會合辦規劃十場有關生態環境議題ê台語講座，歡迎逐家tī逐個月第三禮拜五暗時七點到九點，同齊來「呷米共食廚房」（台北市中正區衡陽路9號3樓）擴展家己ê台語棲地（tshe-tē）！詳細資料ē-tàng看「台灣蠻野心足生態協會」FB專頁。
#棲地復育台語講座專欄，本文使用教育部推薦漢字kap臺灣閩南語羅馬字拼音方案。
台文通訊BONG報306期，2019年9月出刊。
--------------------------------------------
歡迎捐款贊助 李江却台語文教基金會 （捐款thang抵稅，匯款了後請通知02-23112199）
線上捐款(定期定額) https://ppt.cc/fF5bhx
線上捐款(單筆) https://ppt.cc/fcycox
郵政劃撥：19021486
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
