（本文是2019年8月初7 ê講座摘要記錄，主講者是海島演劇劇團團長）
探討台灣歷史kap人權ê議題
8月份ê salon講座邀請著《海島演劇團》團長林志遠來分享。《海島演劇團》是一个2013年成立ê少年劇團，讀國立台灣藝術大學戲劇系kap電影系出業ê林志遠，因為讀大學ê時接觸著「蔡瑞月舞蹈社」，tsiah發現lán自細漢ê教育對台灣歷史ê認bat實在siunn欠缺，hōo伊開始研究台灣歷史kap人權ê議題，用相關ê內容來編劇，劇團ê真濟作品lóng kap「白色恐怖」ê主題有關聯。劇團mā kap蔡瑞月舞蹈社ê「文化論壇」活動合作，編劇、製作舞台劇。
搬啥人ê故事
頭一个作品ê主題是「烏跤病」，講「烏跤病之父」王金河ê故事；mā搬史明ê故事，兩齣戲lóng tī-leh故事內底探討台灣hōo日本人殖民ê影響。Koh有演出高俊明牧師ê故事，伊bat做過台灣基督長老教會總幹事，帶領長老教會發表「人權宣言」，主張應該ài hōo台灣tsiânn做一个新koh獨立ê國家，tse ē-sái講是「獨立」ê概念頭一擺出現tī台灣社會。Tng政府禁止羅馬字版本聖經ê時，長老教會主張每一个人lóng有權利用家己ê語言來讀聖經kap敬拜上帝。
史明早年去日本讀冊，受著「中日對抗」ê社會氣氛影響，伊開始思考「佗位tsiah是我ê國家」？後--來去中國做共產黨ê地下情報員。M̄-koh，等伊看著共產黨是按怎鬥爭、按怎分化族群，koh看著二二八事件國民黨政府按怎對待台灣人了後，tsiah了解中國kap台灣真正bē用得縛做伙，最後tńg來台灣推sak台獨運動。
因為「言論自由」ê議題tī現代社會khah受著重視，鄭南榕ê故事khah濟人知。伊tshuā頭主張解嚴ê「五一九綠色行動」，kap理念sio仝ê朋友tī龍山寺附近靜坐、演講，用12點鐘ê活動來宣傳理念。Tī伊出獄了後，組織「二二八和平日促進會」，舉辦遊行hōo人koh-khah了解--in，表達追求事件真相ê訴求。伊mā是當年頭一个tī公開場合發表「支持台灣獨立」言論ê社會運動人士。
《人權遊台灣》計畫
劇團一直leh做人權議題ê戲，m̄-koh，tiānn-tiānn一齣戲kan-na tī一、兩个縣市演出，實在tsiânn無彩。所以in決定今年beh tī各地演出，koh beh邀請kap故事相關ê受難者iah是歷史研究者來辦講座分享。
人權戲劇ê主題有講著受難者蔡錕霖ê故事，mā有講著hit-tang-tsūn一寡人無辜受著凌治ê過往。受難者陳新吉因為參加一个朋友ê聚會，suah無代無誌受著牽連hông掠去關，mā hông用暴力刑求。伊hit-tsūn kap朋友有約束，「若是有人ē-tàng出--去，lán一定ài kā tsia-ê代誌講hōo別人知。」伊出獄了後，開始書寫濟濟往過受難ê故事。另外一个讀美術出身ê陳孟和，利用伊家己ê專才，替「綠島人權文化園區」ê紀念空間重建計畫，提供非常精確kap幼膩ê重現細節。
劇團tsit兩冬製作演出ê戲是《回憶ê華爾滋》，講女性受難者張常美、施水環、丁窈窕ê故事。三个人lóng是hōo人無辜誣告，施水環kap丁窈窕hông掠去關了，最後hông銃殺行刑，kan-na賰張常美活--落-來。團長林志遠講，做tsit齣戲hōo伊有機會uì女性ê角度理解歷史。Uì in寫hōo厝內人ê批信，mā tsiah知影，原來in人tī監獄內底ê時，心肝底ê願望，lóng是一寡日常生活ê細項代誌，比如，有人寫批問講：「阿姊，我寄--tńg-去ê布料，你哪ē無愛收？我tsiok欣羨tsia-ê布料，ē-tàng tsiah-nī簡單倒tńg去我日思夜夢ê故鄉」，hōo人聽了tsiok心酸。Ǹg望透過劇團ê用心製作，hōo koh-khah濟人對台灣歷史有更加深刻ê認bat kap思考。
#台語sa攏有講座專欄，本文使用教育部推薦漢字kap臺灣閩南語羅馬字拼音方案。
台文通訊BONG報306期，2019年9月出刊。
--------------------------------------------
歡迎捐款贊助 李江却台語文教基金會 （捐款thang抵稅，匯款了後請通知02-23112199）
線上捐款(定期定額) https://ppt.cc/fF5bhx
線上捐款(單筆) https://ppt.cc/fcycox
郵政劃撥：19021486
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
