頭一擺登台演戲，是tī讀國民學校五年級ê時tsūn。
Hit年，是台灣省教育廳下令全台灣所有ê校園內lóng不准講「方言」ê第二冬。拄好gún鹽埕國校tng-leh籌備校慶活動，特別策劃tsiânn十个節目，準備beh踮瀨南街ê金城戲院對外公演。當年，鹽埕埔是全高雄市上鬧熱ê所在，有一點仔親像早期西門町tī台北市ê地位。尤其gún學校koh是「示範國校」，陳意校長就特別把握機會，指示ài用「國語」搬演一齣舞台劇，thang展現教學成果。學校選用中國古早24孝傳說中ê「孟宗哭竹」做為題材，安排由gún五年級ê學生擔當演出，做為校慶公演ê煞尾節目。Gún級任老師直接指定我擔任男主角，也就是hit个孝子孟宗ê角色。聽著ē-tàng踮金城戲院登台公演，我感覺tsiok光榮，當然mā歡喜接受。M̄-koh，因為一件囡仔人ê恩怨衝突，造成我tsit个男主角kan-na做一日，就拒絕再演ê換角事件。Tsit-má回想--起-來，mā iáu感覺當時ê天真，實在是幼稚koh好笑。
我照老師ê指示去學校ê禮堂，準備beh讀劇，排戲，suah看著我ê冤仇人——hit个查某班班長mā tī hia，心內感覺tsiok gāi-gio̍h。指導老師ná說明劇情ná發劇本hōo--gún。我掀開劇本，to iáu看無兩頁--leh，就隨kā指導老師講我無愛演--ah。因為劇中beh扮演我tsit个孝子ê老母--ê，竟然就是hit个查某班ê班長，我全校唯一ê冤仇人。伊hām我ê冤仇到tann to iáu未化解--leh，叫我tio̍h-ài跪踮冤仇人ê眠床邊，ná哭ná叫伊『媽媽……媽媽……』，tse是絕對無可能接受ê侮辱，為著尊嚴，我當然tio̍h-ài拒演啊！
Hit个囡仔時代ê恩怨，就因為我hām冤仇人分別是查埔班kap查某班ê班長。為著一件『男生』kap『女生』ê小誤會，兩个班長suah結囡仔冤。
Gún鹽埕示範國校，踢跤球ê風氣是全高雄市上有名--ê。每一日每一節下課ê時，學校ê運動埕lóng有tsiok濟查埔學生leh踢跤球。查某囡仔就lóng khah時行用樹奶箍仔縛ê長索仔，勾踮運動埕邊ê麻黃欉。Ná勾ná跳koh ná念『小皮球，香蕉油，滿地開花二十一，二五六，二五七，二八二九三十一……』。
Hit日，就親像平時，gún班ê『男生』，一下課就衝去運動埕踢跤球。當然難免有球ē踢出界外。『女生』若khioh著球，mā lóng ē照慣例tàn tńg來場內還『男生』。Tse tī gún學校，本來就是逐日lóng有，無稀罕ê代誌。但是hit擺，m̄知是按怎，踢tuì『小皮球，香蕉油』方向ê界外球特別有khah濟。跳樹奶索仔ê『女生』khioh球khioh到開始leh懊惱，就有人罵講，『到底會不會踢啦？是故意的hioh？』Gún班ê『男生』mā無客氣應講，『幫撿個球，就那麼了不起？誰稀罕啦？』
想bē到to iáu過無一分鐘--leh，suah突然koh有一粒球飛出場外，直接去挵著一个跳索仔ê『女生』，『女生』驚--著，就隨哭--出-來。Tsit時，上課鐘聲tân--ah，逐个mā bē赴thang pué-huē啥，就隨人tńg去教室--ah。
Gún入來到教室無偌久，科任老師to iáu未到--leh，查某班班長suah雄雄先出現tī gún教室門口。伊排出一个茶鈷ê姿勢，一手插腰，一手kí向教室內，大聲huah講，『班長給我出來！』
因為tú-tsiah下課ê時，我hōo老師叫去辦公室，無tī運動埕參加踢球，所以m̄知影到底發生啥mih風波。查某班長tsiok tshiah，一直大聲hat，質問--我。我一時聽無，mā lóng應bē出--來。伊氣phut-phut，最後講出一句：『男生欺負女生，你這班長怎麼當的？……臭男生……給我記住……』講煞koh出力tsàm一下塗跤，就越頭走--ah。
我感覺冤枉，mā tsiok無面子。Tī學校，無論各方面，我lóng算是學生囡仔ê頭人。Tsit擺竟然有查某班班長敢來gún教室kā我tshiàng聲，tse對我kap gún班ê尊嚴是tsiok嚴重ê傷害。經過討論，我決定照同學ê共識，暫時容忍，m̄免去報復；但是此後mā無愛koh tshap--伊--ah，因為伊無禮貌。
代誌就án-ne，暫時互相lóng無koh再追究。想bē到一個月後，我去排戲，tsiah知影演孝子孟宗in老母--ê，竟然ē是tsit个冤仇人。當時我瘦猴瘦猴，若演散赤人ê囡仔，其實有ha̍h。啊hit个查某班長因為已經開始發育，看身材外形實在mā小可有成大人，莫怪派伊來演老母。問題是我hām伊有冤仇iáu未化解，叫我tio̍h跪踮伊眠床邊，koh ài一直叫伊『媽媽……媽媽』，tse，我哪做ē到--lah？
因為我堅持m̄肯妥協，學校mā揣無別个適合演老母ê『女生』。老師無法度，只好派別人替換我去演孝子。另外，tsiah koh叫我改演一个神仙下凡，賞賜筍仔hōo孟宗ê角色。我想想--leh，感覺神仙比媽媽khah大，gún班ê同學mā lóng贊成，就歡喜kā接受。
為著hit擺演出神仙，學校要求家長支援。害gún老爸ke khai錢，特別為我量身軀，做一軀神仙專用ê長袍thang做戲服。當然是kan-na登台演出一擺，就完全無路用--ah。若beh講影響，國校時代ê hit擺人生戲劇首演，m̄知hām後--來我讀電影戲劇，投入影劇編導工作，有關係iah無？Tse，我就m̄敢講--ah？
#台灣人寫真 專欄，本文使用教育部推薦漢字kap臺灣閩南語羅馬字拼音方案。
台文通訊BONG報311期，2020年2月出刊。
歡迎捐款贊助 #李江却台語文教基金會 （捐款thang抵稅，匯款了後請通知02-23112199）
線上捐款(定期定額) https://ppt.cc/fF5bhx
線上捐款(單筆) https://ppt.cc/fcycox
郵政劃撥：19021486
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
