作者：董力玄
自從tī厝--lih迎接過第一个囡仔，見擺想起hit个過程，lóng感覺chiok幸福、chiok甘願、chiok珍惜，所以第二擺知影有身，當然mā期待仝款ē-sái tī家己上熟sāi ê環境內、有家己上信任ê厝內人kap朋友陪伴，來完成chit件人生大事。
我尤其希望三歲半ê阿察thang參與chit个過程，做伙迎接弟弟。厝--lih ke一个囡仔，伊ê人生絕對是大大ê無仝，我相信陪我經過「胎內期」幾若個月ê準備、甚至親身見證弟弟ê出世，ē-sái hō͘伊心理上準備好勢，共同感受新生降臨ê歡喜，mā ke khah有能力接受生活起變化。
M̄-koh，「徛家生產（khiā-ke seng-sán）」需要天時地利人和，無到最後無法度知影結果如何，gún kan-na ē-sái以平常心做上好ê準備。
產前準備
第二胎無第一胎hiah-nī認真，kan-na按時產檢，參加美麗助產師ê「賦權生產課程」做複習。做khah濟準備--ê，顛倒是陪阿察認bat生產、準備做哥哥ê部份。
Chit胎ê產檢，lóng是阿察陪我去--ê，伊看我抽血、驗尿，mā看超音波內底ê弟弟ná來ná大；伊koh hām gún做伙上「賦權生產課」，上了對生囝ê過程ke chiok了解，知影子宮頭按怎擴張、知影胎兒ài tńg兩擺身chiah ē-sái通過產道出世。
平常時，伊kah意聽伊家己出世ê故事、看伊tī水--lih出世ê影片，我趁機會hō͘伊了解生產ê時媽媽ē變kah hām平常時無啥仝款，因為chiok疼，而且ài專心度過每一kái催陣（chhui-chūn，『宮縮』），所以可能無法度好好仔講話……gún choa̋n做伙討論到時beh請啥人來陪--伊，mā請伊考慮弟弟出世ê時，伊若是拄好leh睏，kám ài專工kā伊叫精神。
Koh有一項趣味--ê是，除了別人ê生產影片，gún koh去揣各種動物生產ê影片來看，啥mih象生囝、狗生囝、麒麟鹿生囝、龜生卵、雞仔生卵……lóng看--過，所以伊chiok了解嬰仔iah是卵ē tùi產道生--出-來。
我mā特別講伊紅嬰仔時期ê故事hō͘伊聽，講我按怎kā伊照顧，hō͘伊有心理準備，知影拄出世ê嬰仔是啥mih款，m̄-thang誤會叫是紅嬰仔有法度kah伊sńg。
另外一項重要準備是安排陪產團隊。Chit擺m̄-nā是陪--我niâ，koh ài考慮生產ê過程，阿察ài按怎kā安搭。頭殼內想--著ê適合ê人，m̄是家己ài chhōa囡仔就是beh上班，我真歹勢開喙。
佳哉落尾上好ê人選陸續出現！雖然in mā是lóng ài上班，m̄-koh我按算時間接近ê時，調查陪產團員ê時間，chiah來kah嬰仔溝通，相信伊ē揣上適合ê時間來出世。（最後證明有影是！）
等待ê hit工來到
知影每一个人生產ê過程lóng無仝，就算是仝一个人，逐胎ê生產mā bē sio仝，所以我chiok期待chit擺ē有啥款經驗。頂一胎是見紅後五工囡仔出世，積極產程差不多12點鐘，chit擺kám ē khah緊？
無疑悟，m̄-nā是緊，原來koh有提早ê狀況！36w+2d（編按：有身ê第36禮拜過兩工）hit工，我照常去產檢，雄雄就hō͘醫生通知「ui（編按：『胎盤』）鈣化而且變薄，已經成熟，若緊，後禮拜就ē-sái生--looh！」Chit-tang-chūn離預產期koh有一個月，聽著chit个消息正經是有hō͘驚--著！
Chit聲所有ê準備lóng ài趕緊到位，我liam-mi通知助產師kah陪產團，請逐家待命。M̄-koh，chit段時間soah拄著濟濟變數，可比我37週ê時助產師有四工ài出國、我38週ê時陪產員阿琤拍算beh去露營，koh拄著阿察感冒、我ê跤mā tī共學ê時chūn挵烏青--去……。
我一方面做各種準備（助產師若是拄好無法度來khioh囝，就ài揣備案），一方面kah腹肚內ê嬰仔溝通：請伊蹛到38週以後chiah出--來，請伊揀陪產員lóng無上班、bē-bái ê時間來……。
結果阿澈有家己ê意思，伊mā是leh等，等助產師tńg--來、等我跤骨ê烏青康復、等阿兄感冒好離。Gún一工等過一工，腹肚已經開始小可仔收縮，最後ê超音波mā看著伊姿勢已經準備好勢，m̄-koh伊無leh趕緊，最後有影等到一个逐家lóng ē-sái ê時間來出世！
（後期繼續）
咱來講看māi專欄，本文使用教育部推薦漢字kap傳統白話字方案。
台文通訊BONG報314期，2020年5月出刊。
歡迎捐款贊助 #李江却台語文教基金會 （捐款thang抵稅，匯款了後請通知02-23112199）
線上捐款(定期定額) https://ppt.cc/fF5bhx
線上捐款(單筆) https://ppt.cc/fcycox
郵政劃撥：19021486
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
